Լիբանանցի կնոջը թրաֆիքինգի են ենթարկել Երեւանում. նա հայտնվել է փողոցում

Տիկին Ռիտան, ով աշխատում է երեւանյան կրպակներից մեկում, ահազանգել է «Իրավունք»-ի խմբագրություն եւ պատմել ահասարսուռ մի դեպքի մասին, որն առնչվում է լիբանանցի մի տիկնոջ՝ Ալինայի հետ: Անծանոթ կինը տիկին Ռիտայից սովորական մի տոպրակ է խնդրել, որից հետո տվյալ կնոջ հանդեպ կրպակի աշխատակցի հետաքրքրությունն է՛լ առավել է մեծացել:
«Այդ կնոջը տեսնելիս հետաքրքրություն էր առաջացել, թե նա ինչ գործ ունի փողոցում, քանի որ արտաքնապես նա աչք էր ծակում: Ինքը չէր կարողանում խոսել ու խոսելիս էլ, արեւմտահայերեն էր խոսում, եւ ես այնքան էլ լավ չէի հասկանում իրեն, դողացնում էր: Տեսնելով, որ նրա ինքնազգացողությունը վատ է, փորձել եմ վերջինիս օգնություն ցուցաբերել: Զանգահարել եմ ոստիկանություն, շտապօգնություն, որպեսզի առաջին օգնություն ցույց տան այդ կնոջը: Այս ցուրտ եղանակին նա ամառային հագուստով էր եւ հողաթափերով: Ինքս առաջին պահից զգացի, որ նա Սիրիայից է կամ էլ Լիբանանից, բայց հետո, երբ այդ կինը մի քիչ տաքացավ, սկսեց պատմել իր մասին: Նա ասաց, որ եկել է Հայաստան Լիբանանից եւ Խանջյան 34 հասցեում գտնվող մի հյուրանոցում է տեղավորվել: Այդտեղ տեսնելով, որ այս կինը գրագետ կին է, գիտի շուրջ 6 լեզու՝ արաբերեն, հնդկերեն, թուրքերեն, ֆրանսերեն, անգլերեն եւ գերմաներեն է նաեւ այժմ սովորում, իրեն «օգտագործել» են, թրաֆիքինգի են ենթարկել եւ աշխատեցրել՝ որպես հավաքարար՝ այն միտումով, որ վերջինիս համար հետագայում լավ կլինի: Օրվա մեջ էլ ընդամենը մեկ անգամ նրան ուտելիք են տվել, որ «յոլա» գնա, եւ ինքն էլ «յոլա» է գնացել: Հետագայում, հավանաբար, ինքն ասել է, բայց դե այսպես ո՞նց կլինի, ինչից հետո դուրս են հանել: Դուրս հանելուց հետո այդ կինը վատացել է եւ հետո բերել են արդեն հիվանդանոց: Առաջին հիվանդանոցում է եղել: Որոշ ժամանակ անց գլխավոր բժիշկը, թե տնօրենը, իրեն ոստիկանությամբ դուրս է հանել եւ իր իրերը բոլորը գողացել են: Ե՛վ ճամպրուկը, ե՛ւ իր պայուսակը, որտեղ ունեցել է գումար, անձնագիր: Մի խոսքով, այժմ այդ կինը ոչինչ չունի: Միայն մեկ կամ երկու հագուստ ունի եւ դողացնում էր, վատ էր զգում իրեն: Ես ինքս անգամ մտածում էի, թե այդ կնոջն ինչպես օգնեմ: Ինքը զանգահարեց Լիբանանի դեսպանատուն, խոսեց եւ, ցավոք սրտի, Լիբանանի դեսպանությունն էլ իրեն չկարողացավ օգնել, որ գոնե գումար տրամադրի, եւ այդ կինը հետ վերադառնա Լիբանան», - մեզ հետ զրույցում պատմեց տիկին Ռիտան:
Ըստ մեր զրուցակցի` լիբանանցի կինը նշել է, թե ինքը կարծել է, որ Հայաստանն այնքան լավ տեղ է, որ ապագայում իր համար լավ կլինի մնալ այստեղ, բայց, փաստորեն, այստեղ ավելի քան վատ է եղել իր համար:
«Այդ կնոջ խոսքով դեռեւս Լիբանանի վիճակը մի փոքր պարզ է, որտեղ պատերազմական վիճակ է, սակայն Հայաստանում վիճակը եւս նրան զարմացրել է: Այդքան անտարբերությո՞ւն մարդկանց նկատմամբ: Ես ինքս նրան փորձելով օգնել՝ նույնիսկ ոստիկանություն եմ մի քանի անգամ զանգահարել: Ինքս պարզեցի, որ այդ կինը ոստիկանությունում նաեւ գործ ունի: Հենց ինքը բողոքել է եւ դեռեւս ոստիկանությունում է իր գործը: Ինձ հետ հեռախոսով խոսող ոստիկանն ասաց, թե այդ կնոջն ասեմ՝ հաջո՛ղ, հերի՛ք է իր հեքիաթներն այստեղ-այնտեղ պատմի: Ես ինքս ոստիկանին ասացի՝ դուք մարդ չե՞ք, ինքը միայն մարդկային վերաբերմունք է ուզում: Զանգահարել եմ նաեւ շտապօգնություն, եկել են եւ ասել, որ այդ կնոջը եթե դրսում թողնենք մնա, կմահանա, որովհետեւ դողացնում էր, ոտքերը, ձեռքերը, ուսերը ուռած էին եւ չգիտեր էլ, թե ինչ խոսեր: Ես եւս չգիտեմ, թե ինչ անեմ եւ ինչպես նրան օգնեմ, քանի որ ինքս էլ իմ տունը չունեմ եւ վարձով եմ ապրում, որպեսզի այս կնոջը տանեմ իմ տուն, հետագայում իր համար քիչ-քիչ գումար հավաքեմ եւ իրեն ուղարկեմ Լիբանան: Իսկ հիվանդանոցից առանց առաջին բուժօգնություն ցուցաբերելու են դուրս հանել: Իր մոտ ոչ մի գումար չի եղել, իսկ բոլորս էլ լավ գիտենք, որ լաբորատոր բոլոր հետազոտությունները վճարովի համակարգով են անցկացվում, բուժումը եւս վճարովի է: Իրեն հիվանդանոցից դուրս են հանել՝ ոտքի տակ գցելով եւ փշրելով իր ունեցածը, ինչ եղել է: Նա մի կին է, ում հանդեպ ես ինքս եւս խղճահարությունից դրդված՝ պարզապես մարդկային վերաբերմունք եմ ցուցաբերել: Պատկան մարմիններն էլ բացարձակապես անտարբերության մատնված վերաբերմունք են դրսեւորել: Ոչինչ չունի այդ կինը», - ցավով նշեց տիկին Ռիտան եւ նաեւ հավելեց, որ մի աղջիկ էլ է փորձել օգնություն ցույց տալ այդ կնոջը, որպեսզի գոնե «Կարմիր խաչ» փորձի դիմել:
«Ես ինքս նույնիսկ «Արմենիա» հեռուստաընկերություն եմ զանգահարել, որպեսզի գան եւ իրեն նկարեն: Նշեցին, որ իրենք շատ զբաղված են եւ ունեն այլ նկարահանումներ ու հնարավոր չէ: Այս ամենի մասին բարձրաձայնելուց հետո ես միայն կնշեմ մեկ բան, որ մարդկային այս անտարբերությունը պետք է վերացնե՛լ», - եզրափակելով խոսքը՝ շեշտեց տիկին Ռիտան:
ԴԻԱՆԱ ՄԱՆՈՒԿՅԱՆ