Թող իր «Սիցիլիա» ակումբն աշխատացնի. Աբգարյանի խորհուրդն Ալենին

ԱԺ նախագահ Ալեն Սիմոնյանը սոցցանցում գրառում է կատարել եւ ի հեճուկս տրանսպորտի գնի թանկացման դեմ այս օրերին պայքարող Երեւանի նախկին քաղաքապետ Հայկ Մարությանի՝ անուղղակիորեն մեղադրել է վերջինիս՝ իր մոնոներկայացումների տոմսերը 100 կամ 50 դրամի փոխարեն՝ 20 հազար դրամով վաճառելու մեջ: Այս մասին «Իրավունք»-ը զրուցել է Երեւանի ավագանու «Ազգային առաջընթաց» խմբակցություն անդամ ԻԶԱԲԵԼԼԱ ԱԲԳԱՐՅԱՆԻ հետ: Հիշեցնենք, որ Երեւանի ավագանու արտահերթ ընտրություններին Հայկ Մարությանն էր «Ազգային առաջընթաց»-ի քաղաքապետի թեկնածուն:

«ԱԼԵՆ ՍԻՄՈՆՅԱՆԻ ԳՈՐԾԸ ՉԷ, ԹԵ ՄԱՐՈՒԹՅԱՆ ՀԱՅԿԸ ԻՆՉ ԿԱՆԻ»

— Ըստ Ալեն Սիմոնյանի «մի քանի նորաթուխ արդարության մարտիկներ են հայտնվել» եւ անընդհատ իրեն են նշում՝ գրեթե 15 տարի առաջվա տեսանյութերի եւ լուսանկարների վրա, որտեղ ինքն էր ժամանակին տրանսպորտի թանկացման դեմ պայքարում: Նա հարց է բարձրացնում. «Բա էն ժամանակ, որ իրականում խնդիր կար, իշխանավորին մոտիկից տեսնել չկար ու շենքի մուտքերում մարդկանց ծեծել կար, ո՞ւր էիք, հը՞ն, հիմա, արի ու տես, եկել են: Էն ժամանակ հարմար չէր, չէին եկել»:

— Դեռ չեմ ծանոթացել Ալեն Սիմոնյանի տեղադրած նյութին, բայց, այնուամենայնիվ, եթե հարց է տրվում, թե ո՞ւր էր Հայկ Մարությանը 15 տարի առաջ, ասեմ, որ նա թե՛ 15 տարի առաջ, թե՛ այսօր այնտեղ է, որտեղ արդարության համար պայքար է գնում եւ Ալեն Սիմոնյանը դա պետք է, որ շատ լավ հիշի:

— ԱԺ նախագահը նաեւ հարց է բարձրացնում, թե ինչո՞ւ մտահոգներով չեք հավաքվում, բողոքի ձայն բարձրացնում 20 հազար դրամանոց մոնոներկայացումների դեմ: Այս մասին ի՞նչ կասեք:

— Դա Ալեն Սիմոնյանի գործը չէ, թե Մարության Հայկը ինչ կանի եւ նա իրավունք չունի Մարությանին խորհուրդ տալ, թե նա ինչով պիտի զբաղվի: Նույն հաջողությամբ կարող ենք Ալեն Սիմոնյանին խորհուրդ տալ, որ նա իր «Սիցիլիա» ակումբն աշխատացնի:

«ՀԱՄԱԿԱՐԾԻՔ ԵՄ՝ ԺՈՂՈՎՈՒՐԴՆ ԱՐԴԵՆ ԲՈԼՈՐԻՆ ՇԱՏ ԼԱՎ ՃԱՆԱՉՈՒՄ Է»

— Ալեն Սիմոնյանն նշում է, թե 15 տարի առաջ ու հիմա ո՛չ տրանսպորտն է նույնը, ո՛չ քաղաքը, ո՛չ էլ 100 դրամը: Սակայն, հիմա էլ ոչինչ չի փոխվել, անգամ եթե ավտոբուսներ են ներմուծվել, միեւնույնն է, ո՛չ կանգնելու տեղ կա, ո՛չ շնչելու:

— Ալեն Սիմոնյանը նախ թող համեմատի, թե որքան արժե թոշակառույի համար թթվասերն ու կաթնաշոռը 15 տարի առաջ եւ որքան արժե հիմա եւ ինչ փոփոխություն է տեղի ունեցել թոշակի հետ: Այդ փոքր հետազոտությունը երբ անի, գուցե հասկանա, որ նման բաներ ասել, պարզապես, չի կարելի:

— Ըստ Ալեն Սիմոնյանի, Երեւանում տրանսպորտի համակարգը պետք է կայանա եւ պետությունն ամեն բան արել է ու անելու է այն կայացնելու համար, իսկ ժողովուրդը բոլորին էլ լավ ճանաչում է եւ ամեն ինչ լավ հասկանում է: Արդյո՞ք ժողովուրդը ճանաչում ու հասկանում է բոլորին:

— Այս առումով Ալեն Սիմոնյանի հետ համակարծիք եմ եւ կարծում եմ որ ժողովուրդն արդեն բոլորին շատ լավ ճանաչում է եւ հատկապես վերջին որոշումներից հետո շատ լավ հասկանում է, թե իրականում ով է ժողովրդի մասին մտածում, իսկ ով է մտածում ուղղակի եկամուտներ ապահովելու մասին:

«ԺՈՂՈՎՈՒՐԴԸ ՊԱՏՐԱՍՏ ՉԷ ՎՃԱՐԵԼ ԱՎԵԼԻՆ ՏՐԱՆՍՊՈՐՏԻ ՀԱՄԱՐ»

— Ի տարբերություն ավագանիների՝ պատգամավորները, անգամ ընդդիմադիր պատգամավորները ստանում են պարգեւավճարներ: Անարդար չե՞ք համարում, որ ավագանին չի ստանում նույնիսկ աշխատավարձ այլ ստանում է փոխհատուցում՝ աշխատավարձի նվազագույնի չափով:

— Իհարկե, դա անարդար է ու եթե հաշվի առնենք Երեւանի ավագանու աշխատանքի մասշտաբները, քաղաքացիների դիմումների քանակը, ավագանու կատարած ծախսը, ապա միանշանակ անարդար է: Նույնիսկ անարդար է այն որոշումը, որ եթե նիստի ընթացքում վատ ես զգացել եւ կեսից դուրս ես եկել, ապա ամբողջ ամսվա ծախսերիդ փոխատուցումը չես ստանա: Իսկ դա անսահման հեռախոսազանգեր են, հանդիպումներ են, որոնք անում են ավագանիները: Բնականաբար, շատ են հարցնում, թե ինչի՞ դիմաց ենք աշխատում, մեր շահը ո՞րն է: Այստեղ շահ չկա: Սա հասարակական աշխատանք է՝ հանուն քաղաքի:

— Ինչպե՞ս եք գնահատում հանրային տրանսպորտի թանկացման դեմ այս օրերին ընթացող բողոքի եւ իրազեկման ակցիանները: Կհաջողվի՞ իրավիճակ փոխել:

— Ես կարծում եմ, որ անպայման հաջողություն կունենա, որովհետեւ սա մեր կազմակերպած ակցիան չէ: Սա ժողովրդից եւ օրհասական անհրաժեշտությունից բխած ակցիա է: Ես տեսնում եմ, որ իշխանությունը թիրախավորել է հենց Հայկ Մարությանի անձը՝ չհասկանալով, որ եթե անգամ նա չլինի, լինի մեկ ուրիշը, միեւնույնն է, ժողովուրդը պատրաստ չէ վճարել ավելին:

«ՓՆԹԻ, ԿԻՍԱՏ-ՊՌԱՏ ՈՐՈՇՈՒՄՆԵՐԻ ՀԵՏԵՎԱՆՔՈՎ ՔԱՂԱՔԱՑԻՆ ՀՈՒՆԻՑ ԴՈՒՐՍ Է ԳԱԼԻՍ»

— Քաղաքացիների հայտարարագրումն էլ իրենց հերթին են քաոս ստեղծել: Դրան ինչպե՞ս եք վերաբերում:

— Ես, որպես ավագանու անդամ, ավելի շուտ եմ ընկել այդ թղթաբանության մեջ: Մենք  հակակոռուպցիոնին ենք ներկայացնում հայտարարագիր եւ հիմա էլ հարկայինն ավելացավ: Պետք է ասեմ, որ հարկայինի մասով պետությունը չի արել ամեն ինչ, որպեսզի քաղաքացին հեշտ լրացնի: Ինքս չունեի ID քարտ եւ ստպված հասա Սեւան, քանի որ Երեւանում ահռելի հերթեր են, որպեսզի ձեռք բերեմ քարտը: Այդ ամենn անիմաստ է եւ ստեղծում է քաղաքացիների համար ֆինանսական ծախս եւ ժամանակի կորուստ: Եթե ցանկանում են մի բան կազմակերպել, ապա այնպես պետք է կազմակերպեն, որ քաղաքացին դա անի հեշտությամբ եւ հավելյալ ֆինանսական ծախս չունենա:

— Նույնը հանրային տրանսպորտի առումով եղավ: Հիմա այդ QR կոդերը չեն աշխատում եւ գրեթե ամեն երկրորդը տրանսպորտից օգտվում է անվճար: Այսինքն՝ քաղաքապետարանը փոխարենը բյուջե լցնի, մի բան էլ աշխատում է անօգուտ եւ դրան գումարած դժվարացնում քաղաքացու տեղաշարժվելու հնարավորությունը:

— Դուք շատ ճիշտ ասացիք՝ դա նույնն է եւ նույն ձեռագիրը եւ այդ ձեռագիրը կոչվում է ոչ բանիմաց, անփույթ, փնթի, կիսատ-պռատ որոշումներ: Դրա հետեւանքն այն է, որ քաղաքացին հունից դուրս է գալիս:

ԸՆՆԴԴԻՄՈՒԹՅԱՆ ՀՐԱՎԻՐԱԾ ՆԻՍՏԻՆ ՆԵՐԿԱ ՉԷԻՆ «ԱԶԳԱՅԻՆ ԱՌԱՋԸՆԹԱՑ»-ԻՑ ԵՐԿՈՒ ԱՎԱԳԱՆԻ

—  Երեւանի ավագանու ընդդիմության հրավիրած վերջին արտահերթ նիստի ժամանակ Ձեր խմբակցության անդամները՝ բոլորը ներկա՞ էին: Իրականում ո՞ւմ մեղքով այն տապալվեց:

— Մենք ունեինք երկու բացակա, ովքեր հիվանդ էին: Նրանք «Ազգային առաջընթաց» կուսակցության անդամներ էին, սակայն դա էական որեւէ բան չէր փոխի, որովհետեւ առանց իշխանական ուժերի ներկայության՝ մենք չէինք կարող քվորում ապահովել՝ հաշվի առնելով նաեւ, որ մենք ունենք «Հանրային Ձայնից» Արտակ Գալստյան, ով չի կարող մասնակցել նիստերին եւ ստացվում է, որ առանց այդ ձայնի՝ ամեն դեպքում, մենք չենք կարող ունենալ քվորում:

— Այդ դեպքում նիստ հրավիրելու իմաստը ո՞րն էր, եթե ամեն դեպքում հաշվելով պարզ է դառնում, որ քվորում չէր լինելու:

— Տեսեք, ընդդիմությանը քաղաքացները տվել են մանդատ եւ գործուղել են ավագանու դահլիճ, որպեսզի քաղաքացիների պատվիրակած հարցերն այդ դահլիճում հնչեն եւ լուծվեն: Եթե գար իշխանությունը եւ նրա հետ կոալիցիա կազմած խմբակցությունը, կարող էր լինել նաեւ ժողովրդի համար կարեւոր եւ հետաքրքիր բանավեճ՝ օրվա կարեւոր թեմայի շուրջ: Սակայն իշխանությունը վախեցավ եւ նույնիսկ այդ բանավեճը չստացվեց:

«ՍԱ ԻՐԱԿԱՆՈՒՄ ԽԱՅՏԱՌԱԿՈՒԹՅՈՒՆ Է ԵՎ ԲՆԱՎ ՈՉ ԺՈՂՈՎՐԴԱՎԱՐԱԿԱՆ ԿԱՌԱՎԱՐՄԱՆ ՁԵՎ»

— Ինչպես ասացիք՝ «Հանրային Ձայն» խմբակցությունից Արտակ Գալստյանի բացակայության պատճառով, երբ իշխանությունը չցանկանա, կարող է քվորում չապահովել, եւ ստացվում է, որ ընդդիմությունը քաղաքապետարանում ոչ մի տեսակի հարց չի կարող լուծել: Ինչպես իշխանությունը ցանկանա, այնպես էլ կանի, քանի որ մեկ ձայն միշտ պակասելու է: Ինչո՞ւ «Հանրային Ձայն»-ը չի լուծում այդ հարցը:

— Այո, իշխանությունն այդ մարդուն չի բերում դահլիճ, պատանդ է պահում՝ լավ գիտակցելով, որ նա գա նիստերին կարող է իշխանությունը խնդիր ունենա: Սա իրականում խայտառակություն է եւ բնավ ոչ ժողովրդավարական կառավարման ձեւ: Անգամ Արտակ Գալստյանին չեն զրկում մանդատից, ինչպես Հայկ Մարությանին զրկեցին, չգիտես՝ ինչո՞ւ: Անգամ Գրիգորի Երիցյանին զրկեցին մանդատից, ընդամենը հանձնաժողովի նիստին չմասնակցելու համար: Նույնը եղավ «Մայր Հայաստան» խմբակցության ավագանու հետ՝ Աղեկյան Սոնայի: Բայց ինչպես տեսնում ենք, իշխանությունը պինդ պահում է եւ ձեռք չի տալիս ավագանու այն անդամներին, որոնց չգալն իրենց ձեռնտու է:

— Գործա՞րք է:

— Ես դժվարանում եմ ասել այս պահին:

ՆԱՆԱ ՍԱՐԳՍՅԱՆ