Հայ ժողովուրդը թող պատրանքներ չտածի, այսպես կոչված, քաղաքակիրթ աշխարհի մասին...

«Հունվարի 17-ին Բաքվում մեկնարկեց Արցախի ղեկավարության դեմ Ադրբեջանի կողմից բեմադրված դատավարություն կոչվող տրագիկոմեդիան։ Բովանդակային մասով թեմային հետագայում կանդրադառնամ։ Հիմա բոլորիս ուշադրությունը ցանկանում եմ հրավիրել մեկ կարևոր հանգամանքի վրա։

 

1992 թվականին հակամարտության խաղաղ կարգավորման նպատակով ձևավորվեց ԵԱՀԿ Մինսկի խումբը։ Հետագայում գործընթացն առավել արդյունավետ կազմակերպելու նպատակով 1997 թվականին հաստատվեց Մինսկի խմբի համանախագահությունը՝ ի դեմս Ռուսաստանի, Ֆրանսիայի և ԱՄՆ-ի։ Այս տարիների ընթացքում այդ երկրների պաշտոնական ներկայացուցիչները՝ համանախագահները, բազմիցս եղել են տարածաշրջանում, որոնց ընթացքում այցելել են նաև Ստեփանակերտ, հանդիպել այժմ Բաքվի բանտում գտնվող Արցախի ղեկավարության հետ, նրանց հետ ունեցել պաշտոնական շփումներ։ Ադրբեջանն այդ մարդկանց մեղադրում է սեպարատիզմի մեջ։ Այստեղ հարց է առաջանում՝ իսկ ո՞ւմ հետ էին այսքան ժամանակ հանդիպում Ռուսաստանի, Ֆրանսիայի և ԱՄՆ-ի ներկայացուցիչները։ Եթե այդ մարդիկ, ինչպես Ադրբեջանն է մեղադրում, անօրինական կառույց են ստեղծել և ղեկավարել, այսինքն՝ ի սկզբանե ակնհայտ հանցագործ են եղել, ինչպես էիք իրենց հետ վարում պաշտոնական բանակցություններ։ Իսկ եթե ոչ, որն այդպես է, ապա ինչու հիմա ծպտուն չեն հանում։ Այս հարցերը չեմ բարձրացնում պատասխանի ակնկալիքով։ Այլ ցանկանում եմ, որ հայ ժողովուրդը պատրանքներ չտածի, այսպես կոչված, քաղաքակիրթ աշխարհի մասին։

 

Միշտ հիշեք, որ կա միայն մեկ շարժիչ ուժ, որը շահն է։ Դա ո՛չ լավ է, ո՛չ վատ։ Դա ուղղակի այդպես է, որի հետ միշտ պետք է հաշվի նստել և փորձել ի նպաստ քեզ օգտագործել։ Նաև երբեք չպետք է մոռանանք Չարենցի պատգամը. «Ով հայ ժողովուրդ, քո միակ փրկությունը քո հավաքական ուժի մեջ է»։ Իսկ Արցախի ռազմաքաղաքական ղեկավարության գերության մեջ հայտնվելու հանգամանքները, ինչպես նաև ներկա վարչախմբի հնարավոր գործողությունները և (կամ) անգործությունը առանձին թեմա է, որը, համոզված եղեք, մանրամասն և որ կարևոր է, հրապարակային քննվելու է, և դրա ժամանակը մոտ է։ Ոչինչ չի մոռացվել և ոչինչ չի մոռացվելու», - ասված է ՀԱՊ կուսակցության նախագահ, քաղբանտարկյալ ԱՐԹՈՒՐ ՎԱՐԴԱՆՅԱՆ անունով ֆեյսբուքյան էջում։