Մեր տարածքները փրկելու համար 2025թ.-ին կատարելու ենք միակ ճիշտ քայլը. Բալասանյան

Ըստ ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆԻ, ԱՄՆ նորընտիր նախագահ Դոնալդ Թրամփը աշխարհը հետ է տանում 19-րդ դար, երբ պետությունների համար մոդայիկ էր տարածքներ գնելը։

«Հիմա Թրամփը որոշել է վերականգնել հին ավանդույթները՝ օգտվելով որոշ պետությունների ծանր վիճակից։ Բայց դա հիմնավորում է հետեւյալ կերպ՝ ԱՄՆ շահերը առաջին հերթին։ Դանիային առաջարկում է վաճառել Գրենլանդիան, Կանադային՝ դառնալ ԱՄՆ 51-րդ նահանգը, Պանամային՝ իրեն զիջել ջրանցքը։ Այս 3 պետություններից յուրաքանչյուրը յուրովի է փորձում դիմադրել։ Դանիայի վարչապետը այս առաջարկին պատասխանում է ռուսական վտանգից պաշտպանվելու համար հանրությանը տուշոնկա գնելու հայտարարությամբ, Կանադայի՝ ԱՄՆ սահմանակից նահանգներ փորձում են ռենջերների թիվն ավելացնել, իսկ Պանամայից ձայն ծպտուն չկա։ Եվ բոլոր դեպքերում առաջին պլան է մղվում Ձերդ գերազանցություն ՓՈՂԸ։ Առաջին հայացքից սա կարող է մեզ չվերաբերվել։ Բայց դա միայն առաջին հայացքից։ ՀՀ արտաքին պարտքը խփում է բոլոր ռեկորդները եւ շարունակում աճել։ Մենք Կանադայից ինչո՞վ ենք լավը, կամ մեր ղեկավարները Թրյուդոյից արդյոք ավելի սկզբունքային են: Ուշադիր եղեք Սյունիքին։ Մի օր էլ Թրամփը իր հակաիրանական քաղաքականության համատեքստում ՀՀ-ին կարող է առաջարկել պետական պարտքը մարելու դիմաց իրեն վաճառել Սյունիքը։ Անհավանակա՞ն բան եմ ասում, բնա՛վ։ Բրիտանական համագործակցության անդամ, ՆԱՏՕ-ի անդամ, ԵԱՀԿ անդամ Կանադայում էլ չէին կարող մտածել, թե մի օր իրենց առջեւ նման հարց կդրվի։ 2025թ շատ հետաքրքիր է լինելու, եւ մեր տարածքները փրկելու համար մենք կատարելու ենք միակ ՃԻՇՏ քայլը։ Աստված մեզ հետ»,- նշել է նա։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝