«15 ՏԱՐՎԱ ԸՆԴՄԻՋՈՒՄԻՑ ՀԵՏՈ ՀԱՅ ԾԱՆՐՈՐԴՈՒՀԻՆ ՎԵՐՋԱՊԵՍ ԱԱ-Ի ՄԵԴԱԼ ՆՎԱՃԵՑ»

Սպորտ 27 Դեկտեմբեր, 2024 20:40

Iravunk. com -ի մարզական թղթակիցը զրուցել է Բահրեյնի մայրաքաղաք Մանամայում կայացած Ծանրամարտի մեծահասակների Աշխարհի առաջնությունում կանանց 55 կգ քաշայինների պայքարում բրոնզե մեդալ նվաճած, Եվրոպայի գործող չեմպիոն, ծնունդով գյումրեցի, 19-ամյա ԱԼԵՔՍԱՆԴՐԱ ԳՐԻԳՈՐՅԱՆԻ հետ։

- Ողջույն, Ալեքսանդրա։ Շնորհավորում ենք մեծահասակների Աշխարհի առաջնությունում մեկնարկի, բրոնզե մեդալ նվաճելու առթիվ։

- Շատ շնորհակալ եմ։ Այս ԱԱ֊ում նվաճած բրոնզե մեդալից հետո ինձ շատ լավ եմ զգում և չեմ կարողանում նույնիսկ հավատալ հաջողությանս։ Գոհ եմ ելույթիցս, իմ կարծիքով, քիչ բան չէ ընդամենը 19 տարեկանում լինել Աշխարհի առաջնության մրցանակակիր։ Նշեմ, որ պոկում վարժությունն այդքան էլ լավ չստացվեց և ընդհանուր հաշվարկով 12֊րդն էի։ Կարելի է ասել, մեդալ նվաճելու հույսս արդեն կորցրել էի, սակայն գիտեի, որ հրում վարժությունում ուժեղ եմ ու կհաջողվի կորցրածը որոշ չափով հետ բերել։ Բավականին դժվար էր պայքարը, բայց ինձ հաջողվեց հաղթահարել իմ առջև դրված դժվարությունները և պատվոհարթակի երրորդ աստիճանին կանգնել։ Արդեն մի քանի անգամ է, որ պոկման ժամանակ այդքան էլ վստահ չեմ հանդես գալիս, սակայն այս մրցաշարում բախտի գործոնն էր իմ կողմից։ Ոչ մեկը չէր էլ կարող պատկերացնել, որ չինացի ծանրորդը 0 կստանա ու ես կդառնամ մեդալակիր։ Կարծում եմ, այդ մեդալն ինձ համար էր նախատեսված, միայն ցավում եմ, որ չինուհին վնասվածք ստացավ։ Երբ պոկումից հետո բավական հետ էի մրցակիցներից, մարզիչներն հավատում էին ինձ, նրանք շատ ոգևորում ու հիշեցնում էին, որ սովորաբար հրում վարժության ժամանակ ավելի վստահ եմ հանդես գալիս։ Դա էլ օգնեց, որ հրման 120 կգ ֊ով երիտասարդների ռեկորդ սահմանեմ ու նաև փոքր արծաթե մեդալ նվաճեմ։

- Ալեքսանդրա, հաշված օրեր են մնացել այս տարվա ավարտին ու շուտով կգա Նոր տարին։ Ինչպես կամփոփես 2024 թվականը։

- Ընդհանուր առմամբ, 2024֊ը շատ լավ տարի էր ինձ համար։ Տարին մեկնարկեցի Եվրոպայի առաջնության ոսկե մեդալով, ապա ուսի վիրահատության եմ ենթարկվել, վերականգնվելուց հետո երիտասարդների Աշխարհի բրոնզե մեդալակիր եմ դարձել։ Աշնանը հաղթել եմ Երիտասարդների Եվրոպայի առաջնությանը ու այս տարին եզրափակում եմ Աշխարհի մեծահասակների առաջնության բրոնզե մեդալով։ Իսկ ահա Ալեքսանդրայի անձնական մարզիչը ՔՐԻՍՏԻՆԵ ՊԵՏՐՈՍՅԱՆԸ, մեզ հետ բացառիկ զրույցում այսպես մեկնաբանեց. - Ես գոհ եմ Ալեքսանդրայից։ Ճիշտ է, պոկում վարժությունում չհաջողվեց լավ հանդես գալ, սակայն հրումում նա լավ հանդես եկավ, բրոնզե մեդալ նվաճեց, ռեկորդ էլ սահմանեց։ Հարկ է նշել, որ 2009֊ից հետո, այսինքն շուրջ 15 տարի աղջիկների Աշխարհի մեծահասակների առաջնությունում մեդալ չի հաջողվել նվաճել որևէ մարզուհու ու հիմա Ալեքսանդրան նվաճեց այս բրոնզե մեդալը։ Ես շատ մեծ արդյունք եմ սա համարում։ Նշեմ, որ շատ դժվար է մեկ տարվա ընթացքում չորս անգամ մասնակցել միջազգային մրցաշարի, վիրահատության էլ ենթարկվել ու մեդալ նվաճել։

Հավելենք, որ Ալեքսանդրա Գրիգորյանը արժանացավ տարվա լավագույն կին մարզիկ կոչմանը։