Աղբահանության վճարը՝ ըստ մետրերի. ՔՊ-ն շարունակում է ծանրացնել քաղաքացիների կյանքը

«Իրավունք» թերթի էջերից տեղեկացա, որ. «Աղբահանության վճարը, սովորաբար, գանձվում էր մարդաքանակի հիման վրա՝ բնակարանում փաստացի ապրող մարդկանց թվով։ Սակայն այժմ ՔԱՂԱՔԱՊԵՏԱՐԱՆԸ ՈՐՈՇԵԼ Է փոխել սկզբունքը և ՎՃԱՐԸ ՍԱՀՄԱՆԵԼ ԸՍՏ ՔՄ-ԵՐԻ, այսինքն՝ յուրաքանչյուր քմ-ի համար 13 դրամ սակագին կհաշվարկվի»:

Հայրենակիցնե'ր, ձեզ մոտ հարց չի՞ ծագում, ինչո՞ւ երբ ՔՊ-ն զավթեց իշխանությունը, ԱՆՄԻՋԱՊԵՍ չմտցրեց այս սակագինը: Կպատասխանեք, դե, այն ժամանակ զբաղված էին աղբահանությունն իրենցով անելու գործընթացով: Իրավացի եք... Հիշեցնեմ, 2019 թ. սեպտեմբերին ՇԱՐՈՒՆԱԿՎՈՒՄ էր քաղաքապետարան - «Սանիթեք» հակամարտությունը: Հիշեցնեմ նաեւ, որ երկու պայմանագրով քաղաքապետարանը տարեկան 5 միլիարդ 200 միլիոն դրամ էր պարտավոր վճարել «Սանիթեք»-ին:

Բռռռ... Տեղեկանալով այս ՄԻԼԻԱՐԴՆԵՐԻ մասին, հասկանում ես, որ հակամարտությունը հենց այնպես չի սկսել: Ինչեւէ, այսօր արդեն ««Սանիթեքին» չեն վճարվում այդ գումարները: Սակայն, այժմ էլ որոշել են ԱՎԵԼԱՑՆԵԼ քաղաքացիներից գանձվող գումարը՝ ելնելով բնակարանի ՄԵՏՐԱԺԻՑ:

Եվ այսպես, վերադառնանք մեր հարցին. «Ինչո՞ւ հիմա, այլ ոչ, օրինակ, 2020 թ-ին»: Կարող ենք ենթադրել, որ պատճառն այն է, որ 2020 թ. հունվարին ԱՎԵԼԻ ՇԱՏ ՄԱՐԴ ԷՐ ԱՊՐՈՒՄ Հայաստանում, քան այսօր: Եվ քանի որ, աղբահանության գումարները գանձվում էին ըստ ՄԱՐԴԿԱՆՑ ՔԱՆԱԿԻ, ապա այսօր` Նիկոլենց իշխանության 7-րդ տարում, ՊԱԿԱՍԵԼ են մուծումները: Ընդ որում նշենք, որ լավ պայմաններից մարդիկ չեն թողում իրենց կահավորված բնակարանները եւ գնում ու օտարության մեջ վարձակալում ինչ-որ խեղճ ու կրակ տներ: Այսինքն, այն, որ ՀԱՅԵՐԸ ԼՔՈՒՄ են իրենց Հայրենիքը մեղավոր է հենց Նիկոլի կառավարությունը եւ այդ կառավարության վարած քաղաքականությունը: Սակայն սեփական ՍԽԱԼՆԵՐԸ ՈՒՂՂԵԼՈՒ ՓՈԽԱՐԵՆ, սրանք, ինչպես միշտ, որոշել են մարդկանց կաշիները քերթել:

Օրինակի համար վերցնենք միջին կարգի ընտանիք, միջին կարգի բնակարանային պայմաններով: ՔՊ-ականների վարած քաղաքականության հետեւանքով ԵՐԻՏԱՍԱՐԴ ԸՆՏԱՆԻՔԸ ՀԵՌԱՑԵԼ է Հայաստանից, եւ այժմ, այդ կիսադատարկ բնակարանում ապրում են այդ երիտասարդ ընտանիքի զառամյալ ԾՆՈՂՆԵՐԸ: Իհարկե, նախկին գանձումները ԱՊԱՀՈՎԵԼՈՒ նպատակով, արդեն պետք է գանձել ոչ թէ ըստ ՄԱՐԴԿԱՆՑ ՔԱՆԱԿԻ, այլ բնակարանի քառակուսի մետրերի: Ավելի աբսուրդային որոշում դժվար կլիներ ակնկալել, եթե մենք չապրեինք Նիկոլստանում, ուր ամեն օր ԱԲՍՈՒՐԴԱՅԻՆ ՈՐՈՇՈՒՄՆԵՐ են ընդունվում: Դա նույնն է, եթե վաղն էլ «Վեոլիա Ջուր» ընկերությունը սկսի ջրի վարձը գանձել ըստ քառակուսի մետրերի, այլ ոչ թե ըստ խմած ջրի լիտրերի: Եվս մեկ դիտարկում, եթե Հայաստանում աշխատող օտարերկրացիները մի տաս հոգով ապրում են վարձակալությամբ վերցրած մեկ սենյականոց բնակարանում, ապա ըստ փոխքաղաքապետի մտքի փայլատակումի, նրանց կերած բանանի կեղեւի քանակը ավելի քիչ է լինելու, քան երկու սենյականոցում ապրող երկու թոշակառուների եւ թոշակառուները ավելի շատ գումար պետք է վճարեն` ելնելով բնակարանի մետրաժից, քան երիտասարդ ԱՇԽԱՏՈՂ 10 օտարերկրացիները:

Արդյոք արժի՞ հիշել արագաչափերի պատմությունը, կամ 10-ից ավելի անգամ ԲԱՐՁՐԱՑՎԱԾ կայանատեղի վճարումները, ավելացած հարկերն ու դրանց բարձրացումը... Դեռ զարմանում ե՞նք, դեռ կարո՞ղ ենք զարմանալ, կասեր Պ. Սեւակը...

Չենք զարմանում, պարզապես արձանագրում ենք` ՎԵՑԸ ՏԱՐԻ սեփական ԱՆԿԱՐՈՂՈՒԹՅՈՒՆՆ ու ԹԵՐՈՒԹՅՈՒՆՆԵՐԸ ուրիշի վրա բարդելով է մինչ օրս ՔՊ-ն ԻՇԽԱՆՈՒԹՅԱՆ ՂԵԿԻՆ...

ԱԼԼԱ ՀԱԿՈԲՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝