Մահացել է եզդի սրբազան Խեյրի Ջընդին

Նա երեկ առավոտյան կյանքից հեռացավ Էրբիլի հիվանդանոցներից մեկում՝ ինսուլտի հետևանքով, որը տեղի էր ունեցել մեկ շաբաթ առաջ։ Շեխ Խեյրի Ջընդին հանդիսանում էր եզդի ժողովրդի անվանի հոգևորական ու հերոս շեխ Միրզայի ժառանգորդը ու բնակվում էր Վալատ Շեխ-ի Մահըդ շրջանի Բեթնար գյուղում։ Նա Շեխուբաքր հոգևոր դասի երեցներից էր և երկար տարիներ եղել է աշխարհի եզդիների գլխավոր սրբավայր Լուսապայծառ Լալըշի ու Շեխուբաքր սրբավայրի հոգևոր սպասավորը։ Իր ողջ կյանքը նվիրել է եզդի ժողովրդի հավատքին ծառայելուն։

 

Անձամբ ճանաչելով և շփվելով շեխ Խեյրի Ջընդիի հետ՝ ես միշտ մի նոր հոգևոր գիտելիք էի ավելացնում իմ ներաշխարհում։ Նրա բարյացակամ վերաբերմունքը, իմաստությունը և հավատքի հանդեպ անսասան նվիրվածությունը թողնում էին խոր հետք։ Նա ոչ միայն հոգևոր առաջնորդ էր, այլև լուսավոր ճանապարհի ուղեկից, ում խոսքերը ներշնչում էին, իսկ գործերը՝ հիացնում։

 

Այս ցավալի առիթով իմ անունից հայտնում եմ խորին ցավակցություններս Ֆակիր Խեյրիի ընտանիքին և մաղթում համբերություն ու մխիթարություն։ Աղոթքս եմ հղում առ Աստված, որպեսզի իր ողորմությամբ ընդունի նրա հոգին ու բնակեցնի իր անսահման դրախտում և սփոփանք պարգևի նրա ընտանիքին ու բոլոր նրանց, ովքեր կիսում են այս անդառնալի վիշտը։

 

Հավերժ փառք իր անմնացորդ նվիրումին, և թող նրա հիշատակը մնա օրհնության ու լուսավորության աղբյուր մեզ բոլորիս համար», - գրել է ՀՀ Եզդիների Ազգային Միության նախագահ Խդր Հաջոյանը։