Երեկոյան մարզվելը նվազեցնում է շաքարային դիաբետի զարգացման հավանականությունը․ գիտնականներ

Շաքարային դիաբետի զարգացման բարձր հավանականության դեպքում գիտնականները խորհուրդ են տալիս երեկոյան մարզվել։ Հետազոտությունները ցույց են տվել, որ այս սովորությունն արագացնում է նյութափոխանակությունն ու թույլ է տալիս վերահսկողության տակ պահել արյան մեջ շաքարի մակարդակի բարձրացումը գիշերվա ժամերին։

Ավստրալական կաթոլիկ համալսարանի գիտնականների հետազոտությանը մասնակցել է 24 տղամարդ, որոնք վարում էին պասիվ կենսակերպ և օգտագործում յուղոտ մթերք։ Միևնույն ժամանակ բոլոր կամավորների մոտ բարձր էր երկրորդ տիպի շաքարային դիաբետի զարգացման հավանականությունը։ Հետազոտությունը ցույց է տվել, որ առավոտյան ու երեկոյան մարզումները գրեթե նույն կերպ էին անդրադառնում կամավորների աերոբային սպորտային ցուցանիշների վրա, մինչդեռ միայն երեկոյան մարզումներն էին նպաստում արյան մեջ շաքարի ցուցանիշների նվազման։

Ինչպես նշել են գիտնականները, իրենց հետազոտության արդյունքները հատկապես կարևոր են շաքարային դիաբետով հիվանդների համար, որոնց չի հաջողվում ինչպես հարկն է վերահսկողության տակ պահել արյան մեջ շաքարի մակարդակը։ Շատ հաճախ երկրորդ տիպի շաքարային դիաբետով հիվանդների մոտ շաքարի ցուցանիշները կտրուկ բարձրանում են հենց գիշերվա ժամերին, երբ նրանք քնած են ու չեն կարող վերահսկողության տակ պահել գլյուկոզայի մակարդակը։

Սակայն այս հետազոտության արդյունքները թույլ են տալիս հնարավորինս ազատվել այս խնդրից ու կանխել գլյուկոզայի մակարդակի գիշերային տատանումները, ինչն էլ ի հերթին օգնում է նվազեցնել նաև արյան մեջ խոլեստերինի ցուցանիշները՝ կանխելով օրգանիզմում խոլեստերինի բարձր մակարդակով պայմանավորված հիվանդությունների զարգացումը, գրում է բրիտանական The Daily Mail պարբերականը։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝