Դեղին մամուլը TASS-ի ոճը չէ. Միխայիլ Պետրով

Փորձի փոխանակման հիմքում թերեւս երկուստեք արդյունավետ աշխատանքներ իրականացնելն է: Այդ ամենը լրատվական ոլորտում նույնպես կարեւոր շարժառիթներից մեկն է: «Իրավունք»-ը զրուցել է ռուսական ՏԱՍՍ հանրահայտ գործակալության գլխավոր խմբագիր ՄԻԽԱՅԻԼ ՊԵՏՐՈՎԻ հետ, ով իր հստակ դիրքորոշումն է տվել տարբեր կարեւոր հարցերի շուրջ, ինչպես նաեւ ընդգծել մեդիաարտադրանքի ոլորտում ճիշտ գործելաոճով աշխատելու գաղտնիքների մասին:

— Պարոն Պետրով, ինչպիսի՞ն է Ձեր վերաբերմունքը դեղին մամուլի նկատմամբ:

— Պետք է նշեմ, որ դա մի փոքր անսպասելի, բայց, միեւնույն ժամանակ, նաեւ հետաքրքիր հարց էր: Ես հուսով եմ, որ գործընկերներս նույնպես կկիսեն իմ տեսակետը: Կարծում եմ, որ յուրաքանչյուր լրատվամիջոց ունի իր լսարանը, ունի իր տնօրինությունը եւ ունի իր ընթերցողներին: Ինչ խոսք, մեկը ձգտում է մեծացնել իր լսարանի թիվը՝ ոչ այնքան ճշգրիտ տեղեկատվության հրապարակման միջոցով: Թերեւս, այդպիսի իրավիճակների ականատեսը մենք լինում ենք բավականին հաճախ:

Չմոռանանք նաեւ, որ կա նաև դրա  հակառակ կողմը: Բոլորս էլ գիտենք, որ իր արժեքներին հավատարիմ մնացող լրատվամիջոցը ձգտում է հակառակը լինել: Նա շարունակում է լինել այնպիսին, ինչպիսին համարվում է որակյալ լրատվամիջոցը: Իր արժեքներին հավատարիմ մնացող լրատվամիջոցի նպատակն է՝ հաղորդել միայն կարեւոր, հստակ փաստերով, ստուգված եւ ամենահուսալի աղբյուրներից տեղեկատվություն: Ինչ խոսք, լրատվամիջոցներից յուրաքանչյուրն ունի իր աշխատելաոճը, եւ թող դատեն՝ յուրաքանչյուրին իր կատարած աշխատանքին համապատասխան կերպով:

Այս ամենին զուգահեռ՝ պետք է միայն նշեմ, որ դեղին մամուլը դեռեւս TASS-ի ոճը չէ: Բոլոր ժամանակներում մենք փորձում ենք տեղեկատվություն տրամադրել, որը ճշգրիտ է, հուսալի է, եւ եթե կան ընթերցողներ, որոնք գնահատում են մեր աշխատանքը, ապա, ինչու ոչ, մենք էլ աշխատում ենք մեր հանրության համար: Հետեւաբար, դեղին մամուլն այնքան էլ նշանակալի դեր չի կարող ունենալ:

— Ձեր վիճակագրության համաձայն` ո՞ր հոդվածներն են ավելի շատ կարդում՝ քաղաքակա՞ն, սպորտայի՞ն, թե՞ մշակութային:

— Մենք իսկապես վիճակագրություն ենք կատարում եւ տեսնում ենք, թե մեր ո՞ր նյութերն են պահանջված, որո՞նք են ավելի շատ կամ քիչ կարդում, բայց, իհարկե, ամենակարեւորը նաեւ քաղաքական իրադարձություններն են, որոնք միշտ պահանջարկ ունեն: Մենք տեսնում ենք, որ երբ ինչ-որ կարեւոր եւ խոշոր իրադարձություն է տեղի ունենում, մեր ընթերցողների հոսքը մեծանում է, քանի որ բոլորն ուզում են համոզվել, թե՝ իսկապե՞ս նման իրադարձություն տեղի է ունեցել, եւ այդ տեղեկատվությունը պաշտոնական է, իսկ TASS-ը  հենց այդպիսի պաշտոնական գործակալություն է:

Բայց նման խոշոր իրադարձությունների հետ մեկտեղ մենք տեսնում ենք, որ կարդացվում են նաեւ նույն սպորտային նորությունները: Թերեւս տեղյակ ենք, որ մենք մասնագիտացված սպորտային հրատարակություն չենք, բայց մենք կարող ենք ասել, որ, այնուամենայնիվ, մեր մարզական խմբագրությունն ամեն ինչ անում է, որպեսզի այդ ուղղվածության լուրերը եւս հետաքրքիր լինեն մեր լսարանի համար:

Պետք է նշեմ նաեւ այն մասին, որ մեզ մոտ մշակութային լուրերը եւս լավ ընթերցվում են: Թերեւս այդ ամենի հիմնական դրդապատճառներից մեկն էլ նաեւ այն է, որ մենք ունենք շատ լավ դպրոցներ եւ լավ շփումներ մշակույթի ոլորտի առանցքային նշանակության ներկայացուցիչների հետ՝ սկսած ամենաավագ ներկայացուցիչներից մինչեւ ներկայիս երիտասարդ, սկսնակ, բայց, այնուամենայնիվ, հուսալի գործիչները:

Սրանով միանշանակ ասել, որ մի ոլորտը ինչ-որ մեկին հետաքրքիր է, իսկ մյուսը՝ ոչ, երեւի թե, դժվար է:

— Վիճակագրության համաձայն` ո՞ր սոցիալական ցանցերում են ավելի շատ կարդում TASS-ը:

— Այս պահին ամենատարածվածը տելեգրամյան տարբերակն է: Այն իսկապես լայն թափ է հավաքում եւ արդեն ունի բավարար թվով բաժանորդներ: Իմ կարծիքով` մենք շուտով կհասնենք 500.000 բաժանորդների տելեգրամյան ալիքում: Երկրորդ ամենատարածված տեղը շփման մեջ է եւ ավելի փոքր չափով բաժանորդներ կան Օդնոկլասնիկիում, TikTok-ում եւ նույնիսկ այլ բլոգներում: Իսկապես, մենք փորձում ենք լինել ամենուր, որպեսզի մեր բաժանորդներին եւս հարմար լինի կարդալ մեր տեղեկություններն այն վայրերում, որոնք կարող են լինել աշխարհի մի ծայրում կամ` մյուս:

— Իսկ ընդհանուր առմամբ կարո՞ղ եք նշել, թե քանի հետեւորդ ունեք:

— Մեր օգտատերերի շրջանակը բավական լայն է, եւ որպես հստակ ցուցանիշներ պետք է նշեմ այն, որ VK-ում, Odnoklassniki-ում, Telegram-ում եւ X-ում (նախկին Twitter) մեր հաշիվների լսարանը կազմում է մոտ 2,5 միլիոն օգտատեր:

— Իսկ ի՞նչ համագործակցություն եք տեսնում Հայաստանի հետ:

— Մենք բաց ենք՝ բոլոր գործընկերների հետ համագործակցության համար: Պետք է նաեւ նշեմ, որ մենք եվրոպական եւ խաղաղօվկիանոսյան տարածաշրջանի տարբեր մասնագիտացված ասոցիացիաների եւ լրատվական գործակալությունների անդամներ ենք: Մենք մշտապես համագործակցում ենք ռուսական մամուլի համաշխարհային ասոցիացիայի հետ, առանձին երկկողմ շփումներ ենք ունենում նաեւ արտասահմանյան գործակալությունների մեր գործընկերների հետ։

Ի դեպ, մենք շատ առումներով կենտրոնանում ենք, այդ թվում նաեւ դեպի մեր մերձավոր հարեւանների ուղղությամբ: Ուստի պատրաստ ենք եւ բաց նաեւ համագործակցության համար: Մենք նաեւ կարծում ենք, որ տեղեկատվության փոխանակումը միշտ օգտակար է, երկխոսությունը միշտ ավելի լավ է, քան լռությունը եւ հենց դրա համար պատրաստ ենք համագործակցության։ Բարի գալուստ բոլոր նրանց, որոնք ցանկություն ունեն մեզ հետ համագործակցելու:

ԴԻԱՆԱ ՄԱՆՈՒԿՅԱՆ

Մոսկվա-Երեւան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝