Հայաստանը «Մանկական Եվրատեսիլ»-ում զբաղեցրեց 8-րդ հորիզոնականը

Իսպանիայի մայրաքաղաք Մադրիդում «Ծաղկենք» խորագրի ներքո կայացավ «Մանկական Եվրատեսիլ 2024»-ը. Հայաստանը ներկայացնող Լեոն հանդես եկավ 4-րդ համարի տակ: Լեոն երգիչ Հռիփսիմե Հակոբյանի եւ Մարտին Մկրտչյանի որդին է:

Հիշեցնենք, որ Հայաստանի պատվիրակի ընտրությունը կատարվել է Հանրայինի նախապես հայտարարված մրցույթում, որտեղ մասնակցում էին 100-ից ավելի թեկնածուներ: Տեղի եւ միջազգային մասնագետներից բաղկացած փորձագետների խումբը ընտրել էր Լեոին, ով եւ ներկայացավ Մադրիդում «Cosmic friend» երգով եւ զբաղեցրեց 8-րդ հրիզոնականը:

Ըստ մրցույթի քվեարկության կարգի՝ մասնակից երկիրը առցանց քվեարկության միջոցով կարող էր ձայն տալ նաեւ իր պատվիրակին: Ժյուրիի քվեարկության արդյունքում Հայաստանը 1 միավոր ստացավ Կիպրոսից, 2-ական միավոր՝ Ալբանիայից, Լեհաստանից եւ Սան Մարինոյից, 4 միավոր ստացավ Իսպանիայից, 5-ական միավոր՝ Ուկրաինայից եւ Հյուսիսային Մակեդոնիայից, 6 միավոր՝ Պորտուգալիայից, 7 միավոր՝ Հոլանդիայից, 8 միավոր՝ Մալթայից, 10 միավոր՝ Էստոնիայից, Հայաստանի մասնակիցը ամենաբարձր 12 միավոր ստացավ Ֆրանսիայից եւ Վրաստանից:

Լեոն ժյուրիի քվեարկության արդյունքում վաստակեց 76 միավոր: Հեռուստադիտողի եւ ժյուրիի քվեարկության արդյունքում Հայաստանի մասնակիցը վաստակեց 125 միավոր: Մեր երկիրն իր 12 միավորը տվեց Վրաստանի մասնակցին։

«Cosmic Friend» երգի երաժշտության հեղինակը Tokionine-ն է (Դավիթ Բադալյան), խոսքերի հեղինակներն են Վահրամ Պետրոսյանը եւ Մալենան: Երգի տեսահոլովակի ռեժիսորը Արթուր Մանուկյանն է, հագուստների հեղինակը` Արմեն Գալյանը: 

«Մանկական Եվրատեսիլ 2024» երգի մրցույթին մասնակցում էին Հայաստանը, Ալբանիան, Էստոնիան, Ֆրանսիան,  Կիպրոսը, Վրաստանը, Գերմանիան, Իռլանդիան, Իտալիան, Մալթան, Նիդերլանդները, Հյուսիսային Մակեդոնիան, Լեհաստանը, Պորտուգալիան, Իսպանիան, Միացյալ Թագավորությունը եւ Ուկրաինան:

«Մանկական Եվրատեսիլ» մրցույթի հաղթող ճանաչվեց Վրաստանի մասնակիցը՝ Անդրիա Պուտկարաձեն՝ «To My Mom» երգով::

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝