Ես իմ բնակարանը ոչ թե կառավարությանն եմ նվիրել, այլ՝ պետությանը. Պարույր Հայրիկյան

ԱԻՄ նախագահ ՊԱՐՈՒՅՐ ՀԱՅՐԻԿՅԱՆԸ հայտարարել է, որ սկսել է Դավթաշենի իր տունը պետությանը նվիրելու գործընթաց: Այս մասին «Իրավունք»-ը պարզաբանումներ է ստացել հենց իրենից:

— Պարոն Հայրիկյան, ինչո՞ւ որոշեցիք կենդանության օրոք պետությանը հանձնել Ձեր բնակարանը:

— Պետք է նշեմ, որ դեռ վաղուց էի որոշել: Այո՛, ասել էի, որ իմ մահից հետո տունս տալու եմ պետությանը: Քանի որ Հայաստանը չունի Անկախության եւ Ժողովրդավարության թանգարան՝ ես էլ խոսեցի ԿԳՄՍ նախարարության պատասխանատուների հետ եւ ուզեցի օգնել:

— Իսկ ինչ-որ գումարի դիմաց այն վաճառե՞լ եք պետությանը, թե՞ պարզապես տվել եք:

— Ես այդպես եմ ասում, որ շուկայական արժեքի կա՛մ կեսն եմ տալիս, կա՛մ շուկայական արժեքի կես գնով եմ տալիս ամեն ինչ:

— Լիահո՞ւյս եք, որ այս կառավարությունը գնահատելու է անկախության արժեքները:

— Ես Կառավարությանը չեմ տալիս, այլ տալիս եմ պետությանը: Կառավարությունը ինչ էլ  որ անի, ես դարձյալ կրկնում եմ, որ նվիրում եմ պետությանը: Կառավարությանը ես ինքս միշտ էլ խիստ քննադատել եմ եւ քննադատում եմ, բայց ես տալիս եմ մեր պետությանը: Իհարկե վստահ չեմ, բայց դա ինձ չի հուզում: Ընդհակառակը` ես իմ նման քայլով իրենց պետք է տրամադրեմ, որպեսզի կարողանան առողջ մտածել, առողջ գործել:

— Պարոն Հայրիկյան, իսկ ի՞նչ պայմանով եք տալիս:

— Անկախության եւ ժողովրդավարության պայմանով:

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝