Նկարիչների միության շենքը դեռեւս կմնա նկարիչներին

ԴԱՏԱԿԱՆ ՆԻՍՏԻ ՀԵՏՔԵՐՈՎ

«Իրավունք»-ն անդրադարձել էր, որ Հայաստանի ստեղծագործական միությունների եւ այլ հասարակական կազմակերպությունների սեփականությունը հանդիսացող գույքերի նկատմամբ շենքերի պետականացման վերաբերյալ դատական գործընթաց է սկսվել:
Նկարիչների, գրողների, կույրերի, խուլ ու համրերի ու մի քանի այլ միությունների ներկայացուցիչներ շարունակում են պնդել՝ պետությունը որեւէ հիմք չունի իրենով անել մինչ այս պահը կադաստրով իրենց սեփականությունը համարվող շենքերը։ Դատական նիստը պետք է տեղի ունենար հոկտեմբերի 30-ին, սակայն առանց կողմերի ներկայության: Ինչ է կատարվել, մանրամասներ ենք պարզել Նկարիչների միության փաստաբան ԿԱՐԵՆ ՄԵԺԼՈՒՄՅԱՆԻՑ:

«Հոկտեմբերի 30-ին պետք է վճիռը հրապարակվեր, ընդ որում՝ դա գրավոր ընթացակարգով էր, չնայած մեր բողոքների, որ դատական գործընթացը բանավոր լինի, կողմերին հրավիրեն դատարան եւ ապացույցներ պահանջեն կողմերից: Այնուամենայնիվ, եղավ առանց կողմերի ներկայության: Երեկ ստացել ենք դատարանի որոշումը, որտեղ ասված է, որ գործի քննությունը հետաձգվել է եւ նշանակվել է 2025 թվականի ապրիլի 25-ին»,- մեզ հետ զրույցում ասաց փաստաբան Մեժլումյանը:

Մեժլումյանի խոսքերով՝ օրենքը խախտվում է ամեն քայլին, քանի որ դատախազությունը պահանջել է կառավարությունից որոշման տեքստ, ինչը նորմալ չէ:

«Դատարանն այլ փաստաթղթեր պետք է պահանջեր, որը չի պահանջել, իսկ նրա կողմից պահանջված փաստաթղթերն արդեն կային: Ամեն դեպքում, ինչպես ասացի, վճիռը հետաձգվել է: Պայքարը շարունակվում է, եւ հենց իրավական դաշտում փորձում ենք հիմնավորել, որ հայցերը ենթակա են մերժման, ավելին՝ գործի վարույթները՝ կարճման»- խոսքն ամփոփեց Կարեն Մեժլումյանը:

Նշենք, որ մասնավորապես Աբովյան 16 հասցեում գտնվող շենքը շարունակելու է պատկանել Նկարիչների միությանը՝ մինչ 2025 թվականին կկայանա դատական նիստ եւ, ըստ դատարանի որոշման, պարզ կլինի, թե արդյոք տասնյակ տարիներ շարունակ նկարիչներին պատկանող շենքը կպետականացվի, թե՝ ոչ:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝