Այդպես էլ պետք է լիներ. հայերի կաթողիկոսը հայաթափված Արցախում լինելու պատճառ չպետք է ունենա. Վարդան Խաչատրյան

Պարզվում է՝ COP29 գագաթնաժողովին զուգահեռ՝ Բաքվին հաջողվել է նաեւ նոյեմբերի 5-7-ը համաշխարհային կրոնական առաջնորդների գագաթնաժողով կազմակերպել՝ 200 կրոնական գործիչների եւ գիտնականների մասնակցությամբ: Ավելին, ըստ տեղեկությունների, նախատեսվում է նաեւ մասնակիցների այցն օկուպացված Արցախ: Վերոնշյալի մասին լուրերն օրերս հաստատել է Ադրբեջանի Մուլտիկուլտուրալիզմի միջազգային կենտրոնի գործադիր տնօրեն Ռավան Հասանովը: Այս մասին «Իրավունք»-ը զրուցել է ԵՊՀ Աստվածաբանության ֆակուլտետի Կրոնագիտության ամբիոնի դասախոս, աստվածաբան ՎԱՐԴԱՆ ԽԱՉԱՏՐՅԱՆԻ հետ:

— Պարոն Խաչատրյան, համաշխարհային կրոնական առաջնորդներ Բաքու են հրավիրված եւ կայցելեն օկուպացված Արցախ: Ի՞նչ կասեք այս մասին:

— Նրանք ամեն ինչ անում են՝ գովազդելու համար իրենց կողմից Արցախի հայաթափումը՝ որպես բնականոն գործընթաց, որն անհրաժեշտ է իրականացնել եւ այլն, եւ այլն: Հիմա այն, որ Բաքուն ինչ-որ գումարներ այդտեղ կծախսի եւ նրա հնարավոր դաշնակիցները եւս իրենց մասնակցությունը ունեցած կլինեն դրանում՝ կասկած չունեմ, բայց որեւէ կերպ հնարավոր չէ վերանայել այն հանգամանքը, որ սեպագրի ծագման ժամանակներից այդ տարածքներում բնակվել են հայերը: Հիմա կարելի է կազմակերպել 200 հոգանոց, կարելի է կազմակերպել 100 հոգանոց հանրային միջոցառումներ: Կգան, օրինակ, մարդիկ, ովքեր տեղյակ չեն եղել ընդհանրապես խնդրո առարկային: Այո, հսկայական բանակ կա մարդկանց, որոնք նստած են ադրբեջանական ֆինանսավորման վրա: Այդ մարդիկ շատ հնազանդ կերպով վեր կկենան, կգան, մի քանի բառ էլ հենց այնտեղ կասեն՝ հօգուտ Ալիեւի եւ այդքանով կավարտվի, ինչպես մյուս բոլոր միջոցառումները: Հիմա հարցի մեկ այլ կողմը նաեւ այն է, թե դա արդյո՞ք կփրկի Ադրբեջանին հնարավոր փորձություններից: Ես շատ խորը կասկածներ ունեմ այդ առումով, որովհետեւ նա հայտնվել է այնպիսի մի իրավիճակում, որտեղ բավականին դժվար է պատկերացնել, թե ի՞նչ դրական ելք կարող է ունենալ Ադրբեջանը:

— Ամենայն Հայոց Կաթողիկոս Գարեգին Երկրորդը նոյեմբերին Բաքվում կայանալիք համաշխարհային կրոնական առաջնորդների գագաթնաժողովին մասնակցելու հրավեր չի ստացել: Որքանո՞վ էր սա սպասելի, երբ ի տարբերություն Վեհափառի՝ ՀՀ իշխանությունը ստացել է պաշտոնական հրավեր:

— Կարծում եմ, որ հենց այդպես էլ պետք է լիներ: Հայերի կաթողիկոսը հայաթափված Արցախում լինելու պատճառ, կարծում եմ, չպետք է ունենա, եւ դա բոլորս էլ հասկանում ենք, որ այդպիսի տարբերակը պարզապես չի կարող ո՛չ դիտարկվել եւ ո՛չ էլ քննարկվել:

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝