Ինչպե՞ս ստացվեց, որ 100-ից ավելի մասնակից երեխաներից ամենից տաղանդավորը հենց Մարտին Մկրտչյանի տղան էր

Տարօրինակ տենդենց է նկատվում՝ հայկական շոուբիզնեսի ներկայացուցիչները, կարծես, տվել ու անցել են Հոլիվուդյան աստղերին:

«Իրավունք»-ը փորձեց կապ հաստատել երգի ՄԱՐՏԻՆ ՄԿՐՏՉՅԱՆԻ հետ՝ նախ շնորհավորելու, ապա մի քանի հարց հղելու համար՝ կապված իր տղայի՝ Լեո Մկրտչյանի «Մանկական Եվրատեսիլ-2024»-ին մասնակցելու կապակցությամբ:

Երկար ջանքերից հետո՝ հեռախոսազանգին պատասխանում Դավիթ անունով մի տղամարդ, ով հավանաբար շատ անտրամադիր էր կամ՝ հոգնած, լքված, հիասթափված եւ ասում էր ՝ կապ չունի լրագրող ես, թե ով, չի կարող որեւիցէ տվյալ փոխանցել Մարտին Մկրտչյանից, ով անգամ Հայաստանում չէ: Իսկ տվյալն ընդամենը պիտի սկսվեր եւ ավարտվեր հեռախոսահամարով, որը իր մեջ չէր պարունակելու ոչ նրա վաստակած գումարի քանակը, պետեկամուտների կոմիտեին կատարած վճարումների թիվը, առողջական վիճակի մասին «անկետա», ճնշման տատանումների մասին տվյալներ եւ այլն:

Մարտին Մկրտչյանը եւ ոչ միայն նա, այլեւ շատ ու շատ հայկական էստրադան ներկայացնող երգիչներ մշտապես իրենք են դիմել լրագրողներին՝ իրենց լուսաբանելու, իրենց մասին հիշեցնելու համար, մինչդեռ այժմ անհասկանալիորեն մոռանում են դա եւ ճախրում երկնքում: Մինչդեռ եթե չլինի լրագրող-արտիստ-հասարակություն կապը, դժվար թե, դրանից որեւէ կողմը շահող դուրս գա՝ ինչքան էլ հույսները դնեն ժամանակակից տեխնոլոգիաների վրա:

Ի դեպ, «Իրավունք»-ն ընդամենը ցանկանում էր շնորհավորել եւ հաղթանակ մաղթել մեր մասնակցին, ինչն ինչ-որ Դավիթ մեզ թույլ չտվեց՝ անգամ լրագրողի այն պնդումից հետո, որ գուցե հարցնի Մարտինից եւ հետո համար փոխանցի, ինչը եւս մերժվեց:

Ի դեպ, մի երկու հարց էլ կարելի էր ուղղել Մարտին Մկրտչյանին՝ հանդիսատեսի կողմից, թե՝ այդ ինչպե՞ս ստացվեց, որ 100-ից ավելի մասնակից երեխաների միջից ամենից տաղանդավորը եղավ հենց իր տղան: Ցավոք, Մարտինն այլեւս անհասանելի է լրագրողներիս համար, քանի, որ ունի Դավիթի նման «պաշտպան»:

Ինչեւէ, մենք իսկապես հաջողություն ենք ցանկանում Լեոյին եւ սպասում նրա հաղթանակին: Իսկ Դավիթին եւ Մարտինին մաղթում՝ իջե՛ք երկնքից:

ՆԱՆԱ ՍԱՐԳՍՅԱՆ

Հ.Գ. – Համաձայնեք, որ տգեղ է նման պահվածքը որեւէ հայտնի անձի կողմից, հատկապես, երբ լրագրողը ցանկանում էր գեղեցիկ լուսաբաներ ծնողի հույզերը՝ որդու եվրատեսիլյան քայլերի վերաբերյալ:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝