Այդ ինչ երաշխիքներ եւ ումի՞ց է ստացել Մհեր Գրիգորյանը. ԶԱՐՄԱՆՔ

ՀՀ փոխվարչապետ ՄՀԵՐ ԳՐԻԳՈՐՅԱՆՆ ապշեցրել է՝ իր չարդարացված լավատեսությամբ: Ո՛չ ավել, ո՛չ պակաս նա նշել է. «Չունեմ մտավախություն, որ Ադրբեջանը չի ստորագրի Հայաստանի Հանրապետության հետ սահմանազատման կանոնակարգը»: Լեհաստանում ՀՀ նախկին դեսպան, Սահմանադրական դատարանի աշխատակազմի նախկին ղեկավար Էդգար Ղազարյանը չի ալարել ու բացատրել է Մհեր Գրիգորյանին հետեւյալը. «Եթե նա չի հասկանում, բացատրեմ: Իրենք արդեն հասել են վավերացման վերջին փուլին, չէ՞: Պառլամենտում են: Ադրբեջանը զուգահեռ տանո՞ւմ է այդ գործընթացը: Կառավարությունը հավանություն է տվել եւ ուղարկել է Սահմանադրական դատարան: ՍԴ-ն միջազգային պայմանագիրը քննության առնելու երեք ամիս ժամանակ ուներ: Կարող էին, չէ՞, սպասեին, տեսնեին՝ Ադրբեջանի կառավարությունը իրենց սահմանադրական դատարան ուղարկո՞ւմ է, թե՞ չէ: Եթե ուղարկում է, նոր այստեղ ՍԴ-ն տեսներ համապատասխանության հարցը: Այսինքն, իրենց սիրած բառով այդ գործընթացը հայելային լիներ: Հիմա այդ համաձայնագիրը Ադրբեջանի պառլամենտո՞ւմ է: Ո՛չ: Բայց մեր պառլամենտում է»: Այսքանից հետո՝ հարց է ծագում, թե այդ ինչ երաշխիքներ եւ ումի՞ց է ստացել Մհեր Գրիգորյանը, որ այդպես վստահ է:

Իսկ թե ովքեր են հանրային-հասարակական կյանքում ակտիվորեն ներգրավված, սոցիալական եւ մեդիա հարթակներով կարծիք ձեւավորող եւ տարածող անձինք այսօր, ըստ երկրի ղեկավարի տիկնոջ, անգամ զարմանալի էլ չէ, զավեշտ է, զավեշտ: Պարզվում է՝ ԱՆՆԱ ՀԱԿՈԲՅԱՆԸ հանրային-հասարակական կյանքում ակտիվորեն ներգրավված, սոցիալական եւ մեդիա հարթակներով կարծիք ձեւավորող եւ տարածող անձանց հետ քննարկում է ունեցել հետեւյալ հարցի շուրջ՝ կրթությունը դարձնել հանրային-հասարակական կյանքի թիվ մեկ թրենդը։ Այսինքն՝ անձամբ կրթվել, կրթել կրթողներին, մթնոլորտ փոխել այնպես, որ կրթվելը լինի մոդայիկ։ Եվ ահա այդ շարքում տեսնում ենք պոռո լուսանկարներից հայտնի բլոգեր հանդես եկող Ռոման Բաղդասարյանին:

Ի դեպ, ի հեճուկս արեւմտամետների ինքնավստահության՝ զարմանալի անկեղծություն է ցուցաբերել ՎԼԱԴԻՄԻՐ ԶԵԼԵՆՍԿԻՆ՝ Ֆրանսիայի նախագահ Էմանուել Մակրոնի հետ հանդիպման ժամանակ: Ուկրաինայի նախագահը մասնավորապես ընդգծել է, թե Ռուսաստանի նկատմամբ հաղթանակ տանելը գնալով ավելի ու ավելի անհասանելի է թվում, հատկապես մոտալուտ ձմռան ֆոնին: Նա ընդգծել է, որ արեւմտյան գործընկերներից ուժեղացված առաքումները մնում են չափազանց կարեւոր ուկրաինական բանակի համար: Բայց նույնիսկ այս պայմաններում ուկրաինական ուժերը շարունակում են կորցնել կրիտիկական սարքավորումները: Բա որ այդքանն արդեն Զելենսկին է հասկացել, բա ուկրաինասերները հեռուստացույցի եւ համակարգչի առաջ նստած՝ ի՞նչ հաշվարկով են առյուծ կտրում:

Զարմացած է «Իրավունք»-ը

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝