Ինչ վիճակում է ֆրանսիական բանտում գտնվող Լեո Նիկոլյանը

Արդեն գրեթե երեք ամիս է, ինչ ֆրանսիական բանտում է գտնվում հետաքննող եւ ռազմական լրագրող ԼԵՈ ՆԻԿՈԼՅԱՆԸ: Նա դատապարտվել է 1 տարի, 8 ամիս ազատազրկման, որից 6 ամիսը կանցկացնի փակ ռեժիմով: Թե ինչ վիճակում է նա, «Իրավունք»-ին որոշակի մանրամասներ են հայտնի դարձել:

Նիկոլյանի ֆրանսիացի ընկերներն ահազանգում են, որ նրա առողջական վիճակը բանտում վատթարացել է, թեպետ պնդում է, որ լավ է, որպեսզի առողջական խնդիրներ ունեցող մայրը չանհանգստանա: Ըստ Նիկոլյանի ընկերների, վերջինս շնորհակալություն է հայտնել բոլորին, ովքեր նրան այս ծանր վիճակում չեն մոռացել:

Հիշեցնենք, որ հուլիսի 16-ին Լ. Նիկոլյանը Փարիզից տեսանյութ էր հրապարակել, որով տեղեկացրել էր, որ կանչվել է ոստիկանություն հարցաքննության: Սակայն, հետո հայտնի դարձավ, որ նրան ձերբակալել են, եւ առ այսօր գտնվում է անազատության մեջ: Նրան մեղադրում են ո՛չ ավել, ո՛չ պակաս հակասեմիտիզմի մեջ՝ երկու դրվագով:

Դեռեւս սույն թվականի փետրվարի 6-ին Փարիզում հանրային տրանսպորտում նա միջադեպ է ունեցել մի հրեա տարեց տղամարդու հետ: Մասնավորապես՝ Լ. Նիկոլյանը հրեային հարցրել է, թե ինչ է մտածում Նեթանյահուի կողմից պաղեստինցի երեխաների ցեղասպանության մասին եւ այդ ամենը տեսանկարահանել է: Տեսնելով, որ հրեան անտարբեր է ու չի արձագանքում՝ Լ. Նիկոլյանը նրան անվանել է «պաղեստինյան ցեղասպանության ջատագով»: Այսպիսով՝ առանց տարեց հրեայի համաձայնության ,վերջինիս տեսալուսանկարահանելու եւ հրապարակելու մեջ է մեղադրվում Լեո Նիկոլյանը: Ընդ որում՝ ուշագրավ է այն, որ Լ. Նիկոլյանն ընդունել է, որ սխալ է արել՝ հրեա տղամարդուն տեսանկարահանելով եւ հանրայնացնելով՝ առանց վերջինիս թույլտվության։ Մինչդեռ իրավապահ համակարգն ամեն կերպ գործը փորձել է ներկայացնել հակասեմիտիզմի համատեքստում: Իսկ երկրորդ մեղադրանքը վերաբերում է նրան, որ իբրեւ Լեո Նիկոլյանը հանրային տրանսպորտում ստիպել է 13 տարեկան տղա երեխա հրեային հանելու գլխի կիպան (հրեական ավանդական գլխարկը): Միջադեպի մասին վկայություն են տվել երեխան ու ավտոբուսի վարորդը: Իսկ տեսանյութ այս մասին որեւէ տեղ չկա հրապարակված, ավտոբուսի տեսախցիկների ձայնագրություններն էլ 72 ժամ հետո ջնջվում են։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝