«ԱՓՍՈՍՈՒՄ ԵՄ, ՈՐ ԵՐԿՈՒ ԱՇԽԱՐՀԻ ԱՌԱՋՆՈՒԹՅՈՒՆՆԵՐՈՒՄ ՈՍԿԻՆ ԲԱՑ ԹՈՂԵՑԻ ՁԵՌՔԻՑՍ». ԱՆՎԱՆԻ ԾԱՆՐԱՄԱՐՏԻԿ, ԵՎՐՈՊԱՅԻ ԿՐԿՆԱԿԻ ՉԵՄՊԻՈՆ, ԱՇԽԱՐՀԻ ԲՐՈՆԶԵ ՄԵԴԱԼԱԿԻՐ ՍԱՄՎԵԼ ԳԱՍՊԱՐՅԱՆ

Վերջերս, Հայաստանի սպորտի դարբնոց համարվող Գյումրի քաղաքում կայացավ անվանի ծանրամարտիկ, Եվրոպայի կրկնակի չեմպիոն, Աշխարհի բրոնզե մեդալակիր ՍԱՄՎԵԼ ԳԱՍՊԱՐՅԱՆԻ և նրա ընտրյալի ՆԱՏԱԼԻ ՄԵԼՔՈՆՅԱՆԻ հարսանիքը։ Այս գեղեցիկ զույգը, Աստծո օրհնությունը ստացավ Սուրբ Ամենափրկիչ եկեղեցում։

Iravunk. com -ի մարզական թղթակիցը ևս ներկա է գտնվել պսակադրության արարողությանը եկեղեցում։ Սամվելը հարսանիքի ընթացքում հայտարարել է մարզական կարիերան ավարտելու մասին։ Մեզ հաջողվեց զրուցել ՍԱՄՎԵԼ ԳԱՍՊԱՐՅԱՆԻ հետ։

- Շնորհավորում ենք, Սամվել, ամուսնության առթիվ, մաղթում անսպառ երջանկություն, հավերժական միություն ։Հարսանիքի ժամանակ հայտարարեցիր, որ ավարտում ես քո մարզական կարիերան, որն է պատճառը։

- Շատ շնորհակալ եմ։ Ծանրամարտը թողեցի վնասվածքի պատճառով։ Երրորդ անգամ եմ ծնկի վիրահատության ենթարկվել ու ոտքս այնքան էլ լավ վիճակում չէ։

Մրցաշարերի ընթացքում մշտապես ունեցել եմ ցավեր ու չէի ցանկանա այդ ամենը նորից կրկնվի։ Թեև թողնում եմ ծանրամարտը, սակայն հետագայում էլ կփորձեմ մնալ սպորտում։ Արդեն իսկ աշխատանքային տարբեր առաջարկներ եմ ստացել, այդ թվում Հայաստանի պատանիների հավաքականի երկրորդ մարզչի պաշտոնը զբաղեցնելու։ Բայց մարզիչ դառնալու համար նախևառաջ սեփական սաներն է պետք ունենալ ու փորձ կուտակել։ Այնուամենայնիվ, ինձ չեմ թերագնահատում, որպես մարզիկ մեծ փորձ ունեմ և կարող եմ ճիշտ խորհուրդներ տալ, բայց հավաքականում լինելը մեծ պատասխանատվություն է ու դրան հասնելու համար ժամանակ է հարկավոր։ Առաջիկայում ԿԳՄՍ ֊ի սպորտի քաղաքականության վարչությունում գլխավոր մասնագետի թափուր աշխատատեղի համար մրցույթ է լինելու, դրան եմ մասնակցելու։ Աշխատանքի անցնելու դեպքում կփորձեմ բարձրաձայնել մարզիկների ունեցած խնդիրների մասին և օգնել մեր սպորտը այլ մակարդակի հասցնել։

- Իսկ ինչի համար ես ափսոսում։

- Ափսոսում եմ, որ երկու Աշխարհի առաջնություններում 2021֊ին Ուզբեկստանում և 2022֊ին Կոլումբիայում, ոսկին բաց թողեցի ձեռքիցս։ Այդ մրցումներից շատ դասեր եմ քաղել։ Բնականաբար, շատ եմ ցանկացել մասնակցել Օլիմպիական խաղերի ու մեդալ նվաճել։ Երբ 102 կգ քաշային կարգը դարձավ օլիմպիական, իմ միակ նպատակը ուղեգիր նվաճելն էր, որպեսզի այդքան թափած քրտինքը զուր չլինի։ Օլիմպիական խաղերից առաջ ես ու Գարիկ Կարապետյանը հավասար արդյունքներ ենք ցույց տվել, պարզապես վնասվածքն ինձ շատ խանգարեց։ Փարիզ չմեկնելու համար չեմ տխրել, հակառակը հավաքների ժամանակ իմ խորհուրդներով փորձել եմ օգտակար լինել Գարիկին։ Սկզբում, վիրահատությունից հետո մտածում էի, որ անպայման կվերադառնամ սպորտ, սակայն հասկացա, որ ցավերը ոչ մի տեղ չեն անհետանալու և անդադար հետապնդելու են ինձ, չարժե ռիսկի դիմել։ Եղել են մարզիկներ, Նազիկ Ավդալյանը այդ թվում, որ կարողացել են վնասվածքներից հետո նվաճել մեդալներ, բայց սպորտից հետո էլ կյանք կա։ Նշեմ, որ հարսանիքս հիանալի անցավ։ Վաղուց էինք որոշել հարսանիքն անել, սակայն այն հետաձգվում էր Օլիմպիական խաղերի պատճառով, երբ դրանք բաց թողեցի, որոշեցի հիմա ամուսնանալ։ Ընտրյալս Նատալին ևս ծնունդով Գյումրեցի է, բժշկական համալսարանում է սովորում, ապագա ատամնաբույժ է։ Նա ինձ շատ է ոգևորել ու օգնել հասնել հաջողությունների։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ