Հայտնաբերել ենք շատ հետաքրքիր դամբարան. Միքայել Բադալյանը փակագծեր է բացում

«Իրավունքը» զրուցել է հայտնի հնագետ, ուրարտագետ, պատմական գիտությունների թեկնածու ՄԻՔԱՅԵԼ ԲԱԴԱԼՅԱՆԻ հետ:

— Մայիսի 13-ից «Էրեբունի» պատմահնագիտական արգելոց-թանգարանի տնօրենի պաշտոնը չեք զբաղեցնում։ Այդքան սիրով եւ նվիրումով աշխատում էիք, ի՞նչ եք կարծում՝ պատճառը Ձեր քաղաքական հայացքնե՞րն էին։

— Ես կարծում եմ, որ պատճառը գլխավորապես եղել է Հայոց պատմության 7-րդ դասարանի դասագրքի վերաբերյալ իմ` որպես գիտնականի, հայի ցուցաբերած դիրքորոշումը եւ ընդհանրապես, իմ պետականակենտրոն, պետականամետ գործունեությունը: Կան այլ պատճառներ, որոնց մասին ես խոսել եմ:

— Հայոց պատմության դասագրքի վերաբերյալ Ձեր կողմից բարձրացրած խնդիրն ի՞նչ ավարտ ունեցավ։

— Որքան ես գիտեմ, այդ դասագրքում որեւէ փոփոխություն չի արվել: Նույնիսկ նախարարության կողմից ընտրված, այսպես կոչված, երրորդ կողմի դիրքորոշում հայտնող փորձագետն ընդունել էր գիտնականների կողմից վեր հանած շուրջ հարյուր սխալ, որոնք ֆիքսվել էին այդ դասագրքում: Հարյուր եւ ավելի գիտնական, այդ թվում նաեւ ես, միասնական դիրքորոշում են հայտնել այդ դասագրքի եւ դրա հետ կապված խնդիրների վերաբերյալ: Գիտնականների միասնական տեքստը, կարծում եմ՝ ասում է ամեն-ինչի մասին: Ինձ համար կարեւոր է արդյունքը: Իսկ բազմաթիվ ուսուցիչներ, ծնողներ, ընդհանրապես, քաղաքացիներ իմացան ճշմարտությունը: Ես ինքս եւս շատ բաներ իմացա:

— Մերօրյա հոգեւոր արժեքների ընկալման մասին ի՞նչ կասեք։

— Մենք շատ ենք հեռացել Աստծուց: Բազմիցս ասել եմ՝ Աստված մի արասցե, եթե տերը դադարի մեզ հավատալուց: Հաճախ մենք պայքարում ենք հետեւանքների դեմ, առանց իմանալու դրանց պատճառները: Աստված մեզ տվել է ընտրության իրավունք: Մենք ենք ընտրում հոգեւորը կամ ոչ հոգեւորը:

— Առաջիկայում ի՞նչ ծրագրեր ունեք։

— Ներկայումս աշխատում եմ մի քանի կարեւոր նախագծերի վրա: Մոտակա ժամանակներում դրանցից որոշների մասին ավելի մանրամասն կտեղեկանաք:

— Էրմիտաժի հետ ստեղծել եք հայ -ռուսական արշավախումբ, այս պահին ի՞նչ սպասելիքներ եւ անելիքներ ունեք։

— Այո, այդ արշավախմբի ստեղծումն ունի շատ կարեւոր նշանակություն: Այժմ հայ-ռուսական հնագիտական արշավախումբը պեղումներ է իրականացնում Կարմիր բլուրում: Հայտնաբերել ենք շատ հետաքրքիր դամբարան՝ կրոմլեխով, մոգական շրջանակով, զրահով, ծածկասալերով: Մոտ օրերս կհանվեն ծածկասալերը, եւ կսկսենք պեղել դամբանախցում: Նախնականորեն, այդ դամբարանը կարելի է թվագրել Ք. ա. 12-9-րդ դարերում:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝