ՍԻՄ կուսակցությունը ցավակցում է Արտաշես Գեղամյանի մահվան կապակցությամբ

ՍԻՄ կուսակցությունը հայտնում է իր խորը ցավակցությունը Արտաշես Գեղամյանի անժամանակ մահվան կապակցությամբ: Արտաշես Գեղամյանը հայ քաղաքական մտքի փառապանծ ներկայացուցիչներից էր: Ունեցել է հսկայական ներդրում Հայաստանի քաղաքական զարգացման եւ պետականաշինության մեջ: Երկար տարիներ լինելով Հայաստանի խորհրդարանի անդամ, Ա. Գեղամյանը ամենա հմուտ եւ համարձակ կերպով պաշտպանում էր հայ ժողովրդի եւ Հայաստանի շահերը միջազգային տարբեր հարթակներում: Պատգամավորական իր գործունեության ընթացքում, նա մշտապես կանգնած է եղել հայ շարքային քաղաքացու կողքին, պաշտպանել է սոցիալական արդարությունը եւ հանդես է եկել ազգային միսանության օգտին:

Որպես Երեվանի քաղաքապետ, Արտաշես Գեղամյանը մեծագույն ներդրում է ունեցել Երեւանի զարգացման մեջ, կառուցելով թաղամասեր, դպրոցներ, մշակույթի օբյեկտներ, ճանապարհներ: 

ՍԻՄ կուսակցությունը ավելի քան 25 տարի համագործակցել է Արտաշես Մամիկոնվիչի եւ նրա ղեկավարած կուսակցության հետ: 1999թ-ին ՍԻՄ-ը եւ Ազգային Միաբանությունը ստեղծեցին «Իրավունք եվ միաբանություն» դաշինքը, որը գլխավորեց Ա. Գեղամյանը եւ խորհրդարանական ընտրությունների արդյունքում վերցրեց երրորդ տեղը: Դաշինքը չորս տարի Ազգային ժողովում ներկայացրեց խիստ ընդդիմադիր եւ միաժամանակ կառուցողական դիրքորոշում: Այնուհետեւ մեր կուսակցությունների միջեւ համագործակցությունը շարունակվեց տարբեր ձեւաչափերով, իսկ 2018 թվականին Հայաստանում տեղի ունեցած արեւմտյան հեղաշրջման ժամանակ Արտաշեց Գեղամյանը անզիջում եւ ոչ կոմպրոմիսային կերպով դուրս եկավ հակասահմանադրական հեղաշրջման դեմ, համարձակ ներկայացնելով իր տեսակետը: Նա այն 55 պատգամավորներից մեկն էր, ով դեմ քվեարկեց Նիկոլին` վարչապետ ընտրվելու կապակցությամբ: 2021 թվականին Ա. Գեղմյանը ՍԻՄ կուսակցության եւ մի շարք այլ քաղաքական ուժերի հետ հիմնադրեց «Ուժեղ Հայաստան ռուսաստանի հետ. հանուն նոր միության» շարժումը: 

Տասնամյակներ շարունակ Ա. Գեղամյանը համագործակցել է «Իրավունք» թերթի հետ, հրապարակելով հոդվածներ, վերլուծություններ ու հարցազրույցներ: 

Գեղամյանը թողել է հսկայական մտավոր ժառանգություն, որը ամփոփված է նրա բազմահատոր գրքերում: Այդ մտավոր ժառանգությունը պետք է ուղեցույց լինի հետագա սերունդներին: 

Արտաշես Գեղամյանի մահը անդառնալի կորուստ է հայ քաղաքական մտքի եւ քաղաքական դաշտի համար: 

Խորապես եւ ի սրտե ցավակցում ենք Արտաշես Գեղամյանի ընտանիքին, հարազատներին, ընկերներին եւ բոլոր նրանց, ում համար Ա. Գեղամյանը թանկ էր եւ գնահատելի` այդ մեծատառով Մարդը եւ Հայը: 

ՍԻՄ կուսակցության անունից, նախագահ Հայկ Բաբուխանյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝