Այնպես չպետք է լինի, որ Նիկոլին փոխարինենք մեկ այլ Նիկոլով. Պարույր Հայրիկյան

 
«Սրբազան պայքարի» առաջնորդ Բագրատ արքեպիսկոպոս Գալստանյանն օրերս հանդիպել է տարբեր քաղաքական կուսակցությունների ներկայացուցիչներին: Այս մասին «Իրավունք»-ը զրուցել է ԱԻՄ նախագահ ՊԱՐՈՒՅՐ ՀԱՅՐԻԿՅԱՆԻ հետ, ով եւս ներկա է եղել հանդիպմանը:

— Ի վերջո, քաղաքական խորհուրդ ձեւավորվե՞ց, թե` ոչ:

— Պետք է նշեմ, որ քաղաքական խորհուրդ ձեւավորելու իրական փորձ, որպես այդպիսին, չի կատարվել: Ըստ էության, քաղաքական խորհրդակցություններ են ընթանում: Ես ինքս մեկ անգամ նույնիսկ ստիպված եղա առնչվել մի իրավիճակի, որ ասում էի՝ մի՛ ասեք շարժումը քաղաքական խորհուրդ ունի, որովհետեւ քաղաքական խորհուրդ չկա, այլ քաղաքական կուսակցությունների հանդիպում է դա: Ընդամենը սա է: Հիմնական որոշումն էլ, ի դեպ, ասեմ, այն էր, որ սեպտեմբերի 22-ին՝ Մարզահամերգային համալիրում, պետք է տեղի ունենա նշանակալի միջոցառում:

— Իսկ որեւէ արդյունք քաղաքական ուժերի հետ Բագրատ սրբազանի հանդիպումն արձանագրե՞ց:

— Նախ պետք է նշեմ, որ այս դեպքում խոսքն իմ կարծիքով տեղեկատվության մասին էր: Ինքն ուզում էր տեղեկացնել, որ այսպիսի մեծ միջոցառում է տեղի ունենալու: Հիմնականում դա էր, եւ մասնակցության շուրջ հարցերն էին քննարկվում, թե ով այդ միջոցառմանն ինչ չափով կմասնակցի:

— Փաստորեն, քաղաքական խորհուրդ ձեւավորելու հարցում մասնակից քաղաքական ուժերը որեւէ կոնսեսունսի չե՞ն եկել:

— Ոչ: Այդպիսի հարց չի քննարկվել այս անգամ: Դա ժամանակին էր քննարկվում, եւ այլ քննարկում չի եղել դրանից հետո: Այս անգամ նաեւ նման խնդիր չկար դրված:

— Բայց այս հանդիպումների ձեւաչափն ո՞վ է համակարգում, Կարեն Բեքարյա՞նը:

— Ես չգիտեմ: Եթե ինքը նախաձեռնողն էր, անգամ չգիտեմ էլ, թե նա ի՞նչ սկզբունքով է առաջնորդվել, եւ ասեմ ավելին՝ անգամ չի էլ եղել առիթ կամ պատճառ, որ ինքս էլ խորանամ այդ ուղղությամբ: Ինձ հետաքրքրում են առավել քան շատ լուրջ հարցերը: Այնպես չէ, որ մենք կաշկանդված ենք ինչ-որ բանով:

— Այս անգամ նկատելի էր, որ քիչ քաղաքական ուժեր էին ներկա հանդիպմանը: Պատճառն, ըստ Ձեզ, ո՞րն էր:

— Ես ինքս լուրջ տարբերություն չնկատեցի: Այսինքն՝ ԱԺԲ-ն կար, ՀՅԴ-ն կար, Արամ Գ. Սարգսյանը եւ Բագրատյանը կային:

— Բայց հանդիպման ընթացքում որեւէ որոշում կայացվե՞ց, կամ լուծումներ առաջարկվեցի՞ն:

— Ամսի 22-ին պետք է շատ լուրջ քննարկում լինի Մարզահամերգային համալիրում: Ես ինքս չգիտեմ, թե ինչ ակնկալիք ունի հենց ինքը՝ նախաձեռնողը: Անձամբ ես նախաձեռնողը չեմ: Մենք այս պարագայում առավել քան շատ աջակցող ենք, սակայն մեկ փաստ եւս պետք է արձանագրենք: Չի կարելի շեշտը դնել միայն իշխանափոխության վրա: Ես ինքս իմ ելույթում եւս առանձնակի ընդգծել եմ այդ մասին եւ մեկ անգամ եւս կկրկնեմ: Այնպես չպետք է լինի, որ Նիկոլին փոխարինենք մեկ այլ Նիկոլով, այլ պետք է հիմնարար փոփոխությունների փորձենք գնալ այս անգամ:

Այսինքն, այն, ինչը ես ինքս պետք է ասեի՝ հիմնական մասն արդեն զգացի, որ ընկալվեց, բայց սա մի փոքր նաեւ բարդ է: Շախմատի խաղում եթե որեւէ մի քայլ կատարվի, ապա հաջորդ քայլերն արդեն կերեւան: Դեպքեր կան, որ խաղացողը շատ լավ գիտի, թե որ դեպքում ինչ քայլեր պետք է անի: Նա ինքը գիտի 3 քայլ է հաշվում, թե՝ 4 քայլ: Այնպես որ, կարծում եմ՝ այնքան էլ մեղադրելու չէ, քանի որ դու քոնն ես ասում, իրենք էլ, ինչ խոսք, իրենցն են ասում: Կցանկանաս, իրենց հետ կաշխատես, չես ցանկանա, իհարկե, չես աշխատի:

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝