Վերջին սպարապետի կերպարը կերտած Լեւոնյանը փակագծեր կբացի ֆիլմի պրեմիայից հետո

Նկարահանվում է գեղարվեստական ֆիլմ՝ նվիրված սպարապետ Վազգեն Սարգսյանի հիշատակին: Ֆիլմը բացառապես հիմնված է իրական դեպքերի վրա եւ ներկայացնում է իրական Վազգեն Սարգսյանին՝ մանկությունից մինչեւ մահը: Սպարապետին մարմնավորելու է Հայաստանի Հանրապետության վաստակավոր արտիստ Խորեն Լեւոնյանը:

«Իրավունք»-ին հաջողվել է պարզել որոշ մանրամասներ` կապված ֆիմի հետ՝ վերնագիր, դերասանի ընտրություն եւ այլն: Այսպիսով՝ մինչ դերասանի ընտրության վերջնական որոշմանը հանգելը՝ եղել են առաջարկներ, որ սպարապետին մարմնավորի իր իսկ եղբայրը ՝ պաշտպանության նախարարի նախկին խորհրդական Արմեն Սարգսյանը, ով իսկապես շատ նման է սպարապետին, սակայն նա դեմ է եղել՝ ասելով. «Խորիկը ավելի ճիշտ եւ արհեստավարժ կներկայացնի Վազգենի կերպարը»։

Ի դեպ, նախնական տեղեկություններով՝ ֆիլմի վերնագիրն է՝ «Վազգենը՝ վերջին Սպարապետը», ինչը սոցցանցերում արդեն իսկ դարձել է լայն քննարկման առարկա:

Մենք նաեւ փորձեցինք կապ հաստատել Խորեն Լեւոնյանի հետ եւ մանրամասներ ճշտել՝ ֆիլմի եւ իր դերակատարման մասին, բայց դերասանը չցանկացավ փակագծեր բացել՝ խոստանալով, որ ֆիլմի ավարտից հետո անպայման կխոսի եւ կներկայացնի առավել մանրամասն ողջ նկարահանման ընթացքի մասին:

Նշենք, որ նկարահանման աշխատանքներն արդեն մեկնարկել են, իսկ պրեմիերան նախատեսված է 2025 թվականին: Վազգեն Սարգսյանի զարմուհին՝ Նոնա Սարգսյանը, ով ֆիլմի գլխավոր պրոդյուսերն է, ֆեյսբուքյան էջում գրառում է կատարել ու հայտնել իր շնորհակալությունը ողջ նկարահանող անձնակազմին:

«Ֆիլմը բացառապես հիմնված է իրական դեպքերի վրա եւ ներկայացնում է իրական Վազգեն Սարգսյանին՝ մանկությունից մինչեւ մահ: Խոստանում ենք 2025 թվականին ներկայացնել այս բացառիկ ֆիլմը», - նշել է նա: Իսկ հայրը՝ Արմեն Սարգսյանը, ընդգծել է, որ ֆիլմի ամբողջ թիմը ջանք ու եռանդ չի խնայում սպարապետին վայել արդյունք ստանալու համար. «Ընտրված են լավագույն արտիստները, վստահ եմ՝ ֆիլմը շատ մեծ արձագանք կունենա»:

Մեզ մնում է միայն հաջողություն ցանկանալ ֆիլմի ստեղծագործական անձնակազմին եւ սպասել պրեմիերային:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝