Եթե Նեթանյահուն շարունակի մասսայական սպանդը, ավելի հավանական է դառնում Իրանի կարծր արձագանքը. Իրանահայ խմբագիրը փակագծեր է բացում

Ինչ զարգացումների սպասել Իրան-Իսրայել հակամարտությունում. լայնամասշտաբ պատերազմի կգնա՞ն կողմերը։ Այս եւ այլ հարցերի շուրջ «Իրավունքը» զրուցել է Թեհրանի հայկական «Արաքս» թերթի գլխավոր խմբագիր Մովսես Քեշիշյանից, ով նկատեց.

- Դա պայմանավորված է ՀԱՄԱՍ-Իսրայել բանակցությունների արդյունքից։ Եթե Նատանիահուն չհամաձայնվի դադարեցնել Գազայի վրա հարձակումը և շարունակի մասսայական սպանդը, ավելի հավանական է դառնում Իրանի կարծր արձագանքը։ Իսկ երկարատև հրադադարի դեպքում կարելի է հեռանկարային դառնա Մերձավոր Արևելքի առկա տագնապի համար խաղաղ ելքը:

- Եթե իրանական կողմը, այնուամենայնիվ, արձագանքի Իսրայելին և հարված հասցնի, սրան չի՞ հաջորդի իսրայելական կողմի պատասխան հարվածը, թե՞ Միացյալ Նահանգները թույլ չի տա և կկանխի Իսրայելին:

- Ակնհայտ է, որ Նատանիահուն ամեն ջանք ի գործ է դնում Գազայի պատերազմի ծավալները մեծացնելու և տարածաշրջանային մեծ բախմանը ներքաշելու նաև Ամերիկայի Միացյալ Նահանգներին, ինչից խուսափում է վերջինս: Այնուամենայնիվ Իսրայել-Հեզբոլլահ վերջին բախմանը նույնիսկ իսրայելական կողմը, հավանաբար ԱՄՆ-ի հորդորով, զսպվածություն ցուցաբերեց և հատուկ սահմաններից այն կողմ չանցավ: Այսինքն սահմանափակվեց հարավային Լիբանանում:

Ներկա պայմաններում, մանավանդ երբ ռուս-ուկրաինական պատերազմը նոր փուլ է ոտնակոխում, Միացյալ Նահանգները բացահայտորեն կողմ չէ, առնվազն այս պայմաններում, Մերձավոր Արևելքում լայնածավալ պատերազմ հրահրելուն։

- Որքանո՞վ է այս պահին Միացյալ Նահանգների համար անհրաժեշտ չսրել իրավիճակը. արդյո՞ք Իրան-Իսրայել հակամարտությունը կարող է ազդել ԱՄՆ-ում սպասվելիք նախագահական ընտրությունների արդյունքների վրա։

- Գազայում խաղաղություն հաստատելը վստահաբար դրական ազդեցություն է ունենալու դեմոկրատական Կամալա Հարիսի քվեների վրա, այնպես որ Բայդենի կառավարությունը հնարավորինս ճնշելու է Նատանիահուին հրադադար հաստատելու պահանջով։

ԽՀայաստանի մասով ունեցած կարմիր գծերը, որոնց մասին Իրանը բազմիցս խոսել է, արդյոք հնարավո՞ր է, որ այդ կարմիր գծերն էլ որոշակի փոփոխություններ կրեն կապված աշխարհաքաղաքական զարգացումներով։

- Հայաստանի և Իրանի արտգործնախարարների վերջին հեռախոսազրույցի ընթացքում հնչած խոսքերը գալիս են ապացուցելու, որ Թեհրանի նշած կարմիր գծերը այսօր, երբ Մոսկվան խոսում է այսպես կոչված «Զանգեզուրի միջանցքի» բացվելու անհրաժեշտությունից և Երևանին մեղադրում է տարածաշրջանային ճանապարհները փակ պահելու մեջ, էլ ավելի են շեշտավորվում և երևան են բերում Իրան-Ռուսաստան հակասությունը տարածաշրջանում։

-Ինչպե՞ս  է պաշտոնական Իրանը արձագանքում Հայաստանում առկա ներքաղաքական զարգացումներին, մասնավորապես Նիկոլ Փաշինյանի վարած արտաքին քաղաքականությանը։

- Սրանից մեկ շաբաթ առաջ Իրանի արտգործնախարարության խոսնակ Նասեր Քանանին, խոսելով Հայաստան-Արևմուտք հարաբերությունների մասին, իր շաբաթական ճեպազրույցի ընթացքում հստակորեն նշեց, որ ցանկացած պետություն ինքն է ճշտում իր արտաքին քաղաքականությունը։ Նա ընդգծեց, որ Հայաստան-Իրան հարաբերությունները դրական և շինիչ են։ Կարծում եմ այսքանով արդեն իսկ ամեն ինչ ասված է։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝