Էքստրիմն ու նմանատիպ երեւույթներն իմը չեն, ես կոմֆորտի մարդ եմ. Ջուս (Պրեմիերա)

Ամառային արձակուրդ, ծով, զով... Սա թերեւս այն է, ինչ այսօր յուրաքանչյուրի մտքում է, ով դեռ աշխատում է: Իսկ երգչուհի ՋՈՒՍՆ արդեն իսկ կազմակերպել է իր հանգիստը, ինչի մասին էլ «Իրավունք»-ը զրուցել է նրա հետ:

— Շատ անսպասելի եղավ այս անգամ հանգիստս: Իմ լավ ընկերներից Սերգ Աբրաամովի ծննդյան օրն է մոտենում, ով նաեւ իմ գործընկերն է, ու նա մեզ՝ ինձ եւ երգիչ Մարկ Ալեքս Ջոյին հրավիրեց իր ծննդյան արարողությանը մասնակցելու ու անմոռանալի հանգիստ ունենալու՝ Բաթումիում եւ Քաբուլեթիում: Վստահ եմ` անմոռանալի օրեր ենք ունենալու` արդեն ճանապարհից սկսված, որոհետեւ շատ կարեւոր է, թե ում հետ ես ճանապարհ գնում: Իսկ իմ դեպքում, ես գնում եմ շատ հետաքրքիր մարդկանց հետ: Այնպես որ, համոզված եմ՝ հանգիստս լինելու է արկածներով լի: Յոթ օրով ենք մեկնում եւ արդեն օգոստոսի 8-ին  կլինենք Հայաստանում՝ լի ուժերով եւ ստեղծագործական նոր մտահղացումներով: Բացի դրանից, մեր ծրագրերի մեջ եւս մեկ ճանապարհորդություն կա: Ցանկանում ենք սեպտեմբերին մեկնել Եգիպտոս, բայց դա արդեն մեկ այլ կազմով ՝ ուրիշ երգիչ-երգչուհիների հետ: Հուսանք՝ կկարողանանք գնալ եւ զբաղվածությունը չի խանգարի իրագործել մեր ծրագրերը: Առհասարակ ես շատ եմ ճանապարհորդում՝ հիմնականում հյուրախաղերով: Բայց հյուրախաղերը բարդ ճանապարհորդություն է, քանի որ կարող է թռիչքը երկար տեւել, այնուհետ ավտոբուսով հասնես Ա կետից Բ կետը, որից հետո շտապ գնում ես փորձերի, հետո բեմ եւ այլն: Այդ ընթացքը մի քիչ հոգնացնող է, չնայած, որ համերգներից ես հաճույք եմ ստանում: Այն էներգիան, որը փոխանցում եւ ստանում եմ հանդիսատեսից, բոլոր հոգնածությունը հանում ու մոռացության է տալիս: Իսկ ինչ վերաբերում է հանգստի նպատակով ճանապարհորդությանը, բոլորովին այլ է: Ես առհասարակ պասիվ հանգստի սիրահար եմ, իհարկե, դրան գումարած շոփինգ եւ այլն: Չեմ սիրում բարձրանալ սարերը, էքստրիմ ու նմանատիպ այլ երեւույթներն իմը չեն: Ես կոմֆորտի մարդ եմ: Ցանկանում, որ բոլորը հանգստանան, վայելեն ամառը, եթե անգամ չեն կարողանում մեկնել Հայաստանից դուրս, գոնե հանգստանան այստեղ եւ վայելեն բնությունը, Սեւանն եւ Դիլիջանը: Ուզում եմ բոլորը լինեն հանգստի եւ ներդաշնակության մեջ:

— Հանգստից հետո՝ ի՞նչ եք պատրաստվում անել, ի՞նչ նոր ծրագրեր ունեք առաջիկայում:

— Արդեն ունեմ նորություն. հանրության դատին հանձնեցինք իմ եւ Սերգ Աբրաամովի համատեղ նկարահանված տեսահոլովակը, որը կոչվում է «Две души» եւ փոփ-ռոք ոճի մեջ է: Խոսքերի եւ երաժշտության հեղինակը Աղասի Գեւորգյանն է, ով իմ համար բազում երգեր է գրել: Արամ Սալոյանը նկարահանել է շատ գեղեցիկ տեսահոլովակ, որի վրա աշխատել է հրաշալի մասնագիտական թիմ: «Две души»-ի երգի կիթառահարը, ի դեպ, ճանաչված եւ սիրված, Ռուսաստանի լավագույն տասնյակում ընդգրկված Վյաչեսլավ Մոլչանովն է, ով «Արիայի» խմբի կիթառահարն է: Նաեւ ասեմ, որ ձայնագրվել ենք Հայաստանում, սակայն գործիքավորումը եղել է Մոսկվայում, որով զբաղվել է Գուժը: Ընդ որում՝ Գուժի հետ սա մեր առաջին աշխատանքը չէ: Նա նաեւ բազում երգերի հեղինակ է, ինչպես նաեւ շատ երգերի գործիքավորմամբ է զբաղվել: Իսկ առհասարակ շատ երգեր ունեմ, որոնք կլինեն արդեն մյուս տարի, մինչ այդ՝ «Две души» այս գեղեցիկ զուգերգով հանդես կգամ: Մեծ համերգներ շատ կցանկանամ ունենալ, սակայն դա ֆինանսի հետ է կապված, պետք է հովանավոր կամ լավ պրոդյուսեր լինի, որպեսզի կարողանանք լուծել ֆինասական հարցերը՝ թիմի, կոստյումների եւ այլնի հետ կապված: Այդ ամենն իրենից ֆինաս են պահանջում, իսկ ինչ վերաբերում է ինձ՝ միշտ պատրաստ եմ մեծ համերգի:

Մեզ մնում է միայն մաղթել բարի հանգիստ Ջուսին եւ բոլոր նրանց, ովքեր պատրաստվում են մեկնել հանգստի եւ վայելել վաստակած արձակուրդները:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝