«ԵՐԵՔ ՌԱՈՒՆԴՆԵՐԻ ԱՌԱՎԵԼՈՒԹՅԱՄԲ, ՀԱՂԹԵՑԻ ԱԴՐԲԵՋԱՆՑԻ ՄՐՑԱԿՑԻՍ». ԽԱՌԸ ՄԵՆԱՄԱՐՏԵՐԻ ՊՐՈՖԵՍԻՈՆԱԼ ՄԱՐԶԻԿ, ՄԻՋԱԶԳԱՅԻՆ ՄՐՑԱՇԱՐԻ ՀԱՂԹՈՂ ՖԵԴՅԱ ՉՈԲԱՆՅԱՆ

Օրերս ԱՄՆ Կալիֆոռնիա նահանգում կայացած պրոֆեսիոնալ խառը մենամարտերի /MMA /միջազգային մրցաշարում, ադրբեջանցի մրցակցի հանդեպ, տպավորիչ հաղթանակ է տոնել մեր երկրի ներկայացուցիչ, պրոֆեսիոնալ մարզիկ, այժմ ամերիկաբնակ ՖԵԴՅԱ ՉՈԲԱՆՅԱՆԸ։ Iravunk. com -ի մարզական թղթակիցը կապ է հաստատել օվկիանոսից այն կողմ, հեռավոր ԱՄՆ - ում բնակվող մեր հայազգի պրոֆեսիոնալ մարզիկի Ֆեդյայի հետ ու բացառիկ զրույց ունեցել։

- Ողջույն, Ֆեդյա։ Շնորհավորում ենք հաղթանակի առթիվ։

- Շատ շնորհակալ եմ։ Հանդես եկա թեթև քաշային կարգում, առաջին անգամ էի հանդես գալիս նման քաշային կարգում։ Այնպես ստացվեց, որ ընդամենը երեք շաբաթվա ընթացքում պիտի 13 կգ քաշ գցեի։ Դա ստացվեց ինձ մոտ։ Մրցակիցս ադրբեջանցի մարզիկ էր, շատ ուժեղ բռնցքամարտի բազայով կռվող էր, ի դեպ, նա պատրաստություն էր անցել Խաբիբ Նուրմագամեդովի թիմի հետ։ Գիտեինք, որ դժվար մենամարտ է լինելու, բայց ես վստահ էի իմ ուժերի վրա, որ կհաղթեմ։ Մենամարտը վերջացավ միավորների առավելությամբ, բայց ամբողջ մենամարտը իմ տիրապետության տակ էր գտնվում, երեք ռաունդների առավելությամբ հաղթեցի ադրբեջանցուն, ոչ մի ռաունդ չեմ զիջել նրան։ Իմանալով, որ մրցակիցս ադրբեջանցի է լինելու, սկզբից շատ ագրեսիվ էի, բայց հետո փորձեցի չլարվել, որ հնարավորինս մտածեմ իմ մասին, որ ոչինչ հանկարծ ինձ չխանգարի մենամարտի ժամանակ։ Հաղթանակս նվիրում եմ աշխարհի բոլոր հայերին, մանավանդ մեր Արցախից բռնագաղթած հայերին։ Հաղթանակից հետո շատ աննկարագրելի զգացողություններ առաջացան։ Սա շատ կարևոր մենամարտ էր, չկար պարտվելու շանս ընդհանրապես։ Այս մենամարտից առաջ թոփ 10-ում էի Կալիֆոռնիայում, 300-ից ավելի մարզիկների մեջ։ Այժմ վարկանիշս ավելի կբարձրանա։ Սա իմ հինգերորդ հաղթանակն էր պրոֆեսիոնալ ռինգում։

Նշեմ, որ տարվա վերջին կլինի նաև ջիու - ջիցուի Աշխարհի առաջնությունը Լաս - Վեգասում, մինչ այդ կմասնակցեմ նաև գրեփլինգի վարկանիշային մրցաշարի։ Նպատակս է դառնալ UFC վարկածով չեմպիոն։

- Շնորհակալություն, Ֆեդյա, մեզ ժամանակ տրամադրելու համար, սպասենք արդեն հաջորդ հաղթանակիդ։

- Ես էլ շատ զգացված եմ ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ