5 ՏԱՐԻ ԱՌԱՆՑ ԱՆՎԱՆԻ ԾԱՆՐԱՄԱՐՏԻԿ ԱՂԱՍԻ ԱՂԱՍՅԱՆԻ

Հուլիսի 8-ը, անվանի ծանրամարտիկ, Ծանրամարտի համաշխարհային ուսանողական խաղերի երիտասարդների Եվրոպայի չեմպիոն, Հայաստանի բազմակի չեմպիոն ԱՂԱՍԻ ԿՈՐՅՈՒՆԻ ԱՂԱՍՅԱՆԻ հիշատակի օրն է, 5 տարի է անցել։ Նա մանկության տարիներից սկսել է զբաղվել ծանրամարտով։ Առաջին լուրջ նվաճումը եղել է 2010 թվականի հուլիսին, երբ Աղասին մասնակցեց Ծանրամարտի Աշխարհի երկրորդ ուսանողական առաջնությանը ու դարձավ չեմպիոն։Նույն թվականին դարձել է Եվրոպայի երիտասարդական մինչև 23 տարեկանների փոխչեմպիոն։ 2011֊ին, Աղասին դարձել է Համաշխարհային ուսանողական խաղերի չեմպիոն։ Ցավոք, 5 տարի առաջ, 2019 թվականի հուլիսի 8֊ին, հուլիսի 5֊ին տեղի ունեցած ողբերգական ավտովթարի պատճառով, կյանքից անժամանակ հեռացավ անվանի մարզիկը։ Այսօր, նրա շիրիմին են այցելել հարազատներ, ընկերներ, ծաղիկներ խոնարհել ու խնկարկել։

Աղասիի այրին ԱՐՄԻՆԵ ԳԱԲՐԻԵԼՅԱՆԸ, Iravunk. com -ի մարզական թղթակցի հետ զրույցում խորը ցավը սրտում նշեց.

- Շատ դժվար է առանց Աղասիի, բայց պարտավոր ենք ուժ ու տոկունություն գտնել, մեծացնել մեր երկու զավակներին ու հասցնել իրենց նպատակներին։ Որդուս անունը ևս Աղասի է, նա ևս սպորտով է զբաղվում։ Քանի որ Աղասին Երևանի Օլիմպիական հերթափոխի պետական մարզական քոլեջի շրջանավարտ էր, ընտանիքով հյուրընկալվեցինք քոլեջ։ Աղասիի իրերը, հուշանվերները հանձնեցինք քոլեջին»։

Հ. Գ. Աղասի Աղասյանը, հայկական սպորտի ամենասկզբունքային, ուժեղ և արժանապատիվ մարզիկներից էր։ Նրա ոչ միայն սպորտային, այլև մարդկային որակները, օրինակ պիտի ծառայեն մեր հայրենակից մարզիկների համար։

Աստված հոգիդ լուսավորի եղբայր...

ՀՈՎՀԱՆՆԵՍ ՍԱՐԳՍՅԱՆ