Ինչո՞վ սփոփենք Ամարասի, Գանձասարի, Դադիվանքի կարոտը. Ստելլա Աբրահամյան

Ռեֆորմիստների կուսակցության 4-րդ համագումարի ժամանակ տեղի ունեցավ կուսակցության ղեկավար նոր կազմի՝ գործադիր մարմնի ընտրություն: Գործադիր մարմնի անդամների շարքում է Արցախից տեղահանված ՍՏԵԼԼԱ ԱԲՐԱՀԱՄՅԱՆԸ: Նա իր ելույթում մասնավորապես ընդգծեց, որ անքննարկելի եւ անառարկելի է այն կարծրատիպը, որ Հայաստանը 2018թ․ հետո մերկ ձեռքերով հայտնվեց բազմամիլիոնանոց դարավոր ոսոխների ճիրաններում, որոնցից ամեն մեկը ձգտում է տիրանալ իր անհագ դահճաբաժնին։

«Հայաստանի վիճակն ավելի վատթարացավ 2020թ․ պատերազմից հետո։ Արցախի հանձնումից հետո․․․ Եվ Հայաստանի անարգել հետընթացը եթե հայաստանաբնակների համար կործանարար է, ապա արցախցիներիս համար բազմակի, նույնիսկ մահացու կործանարար է։ 2018-ից ի վեր տարբեր հարթակներից արված անպատասխանատու եւ անտրամաբանական կոչերն ու թեզերը սկիզբ դրեցին Արցախի կործանմանը, սկիզբ դրեցին մեր խնդիրներին, մեր դարդ ու ցավին, մեր վիշտ ու կորստին։ Արցախի կորստից հետո մենք խորը ցավ ենք ապրում այս հետընթաց սլացքը։ Հաքարիից այն կողմ թողնելով մեր կյանքն ու կենսագրությունը, մեր թախիծն ու ուրախությունը, մեր ապրելու իրավունքը, մեր պատմությունը, մենք փորձում ենք վերագտնել ինքներս մեզ, փորձում ենք համառորեն եւ հստակ կանգնել մեր ոտքերի տակից փախչող հողին։ Փորձում ենք Արցախի կարոտը սփոփել Հայաստանում։ Բայց ինչո՞վ սփոփենք Ամարասի, Գանձասարի, Դադիվանքի կարոտը։ Ինչո՞վ սփոփենք մեր արժեքների, գերեզմանների, սրբավայրերի, ծննդավայրերի կարոտը։ Խնդիրը մեկը, տասը, հազարը չէ։ Մենք ընկղմվել ենք անլուծելի թվացող խնդիրների ծովում։ Մեր խնդիրները լուծման կարիք ունեն։ Մեր խնդիրները լուծման անհրաժեշտություն ունեն։ Մեր խնդիրները լուծման հրատապություն ունեն», - նշեց նա։

Անդրադառնալով ծառացած ամենահրատապ խնդիրներին՝ Ստելլա Աբրահամյանը երեք կետ առանձնացրեց. «Առաջին՝ ապահովել արցախցիների անվտանգությունը Հայաստանում: Երկրորդ՝ բոլոր հնարավոր միջոցներով եւ մեթոդներով կասեցնել արցախցիների արտագաղթը Հայաստանից: Երրորդ՝ ընթացք եւ լուծում տալ մեր առջեւ ծառացած տնտեսական, սոցիալական, բարոյա-հոգեբանական խնդիրներին։ Եվ քանի որ Ռեֆորմիստների կուսակցությունը՝ իր նախագահով եւ բոլոր անդամներով հանդերձ ավելի քան 6 տարի է ոչ միայն չի լքել, այլեւ իր հաստատուն եւ առանցքային տեղն ունի քաղաքական պայքարի ողջ առաջնագծով մեկ, բոլոր խրամատներում եւ դիրքերում, ավելի քան համոզված եմ, որ մեր խնդիրների վերանայումն ու ընթացք տալը կարելի է վստահել այս կուսակցությանը։ Հուսանք, սատարենք, գործակցենք»։

ՀՐԱՆՏ ՍԱՐԱՖՅԱՆ