«... անցանք կենացների, մնում է մի հատ կենաց ասեք». Սինանյան

Սփյուռքի հանձնակատար Զարեհ Սինանյանը համաձայն չէ այն կարծիքի հետ, թե Սփյուռքում քիչ հայեր են մնացել, որ աջակցում են գործող իշխանություններին:

Լրագրողների հետ զրույցում Սինանյանը պնդեց՝ դա իրականությանը չի համապատասխանում:

«Միշտ էլ Սփյուռքում եղել է դժգոհութուն, օբյեկտիվ և սուբյեկտիվ դժգոհություն, դա շարունակվում է նաև հիմա»,- ասաց նա:

Ըստ նրա՝ հիմա դժգոհությունը կապված է նրա հետ, որ մենք պարտվել ենք մի պայքարում, որին պետք է պատրաստվեինք 30 տարի:

«Մենք կորցրել ենք վերահսկողությունն Արցախի նկատմամբ, մեր հայրենակիրցներն իրենց պատմական հայրենիքից զրկվել են: Մեր մի քանի հազար տարվա պատմությունն այս պահին ընդհատվել է»,- ասաց նա:

Դիտարկմանը՝ Նիկոլ Փաշինյանն ասում է՝ Արցախն Ադրբեջան է, Դուք ասում եք պատմական հայրենիք է, նա արձագանքեց.

«Դա այդ մարդկանց պատմական հայրենիքն է: Մուշը, օրինակ, իմ պապիկի ծննդավայրն է, պատմական հայրենիք է ինձ համար, բայց ՀՀ սահմանում չի գտնվում: Ես ձեզ Մուշի օրինակն եմ բերում, որ Արցախը հասկանաք»:

Հարցին՝ Արցախն ո՞վ հանձնեց՝ Ռուսաստա՞նը, նախկիննե՞րը, թե Արցախի իշխանությունը, Սինանյանը նշեց, թե մենք ազգովի չպատրաստվեցինք Արցախը պաշտպանելու համար:

«94 թվականից հետո ունեինք բացառիկ հնարավորություն մեր այդ ձեռքբերումը պաշտպանելու, չարվեց, դրա հետ մեկտեղ չկարողացանք ստեղծել այն դիվանագիտական համակարգը, հարաբերությունների ամբողջ կոմպլեքսը, որ մեզ հնարավորություն կտար ապահովել որոշ երկրների աջակցությունն այդ հարցում»,- ասաց նա:

Ճշտող հարցին՝ մենք ասելով ում նկատի ունեք, նա ասաց՝ հայ ազգը:

Դիտրակմանը՝ ձեր իշխանությունն է Արցախը համարել Ադրբեջանի մաս, նա արձագանքեց.

«Համարե՞լ, անցանք կենացների, մնում է մի  հատ կենաց ասեք»: