«ՄՐՑԱՎԱՐՆԵՐԻՑ ՄԵԿԸ ԹՈՒՐՔ ԷՐ, ԵՎ ՀԱՂԹԱՆԱԿԸ ՏՎԵՑԻՆ ԱԴՐԲԵՋԱՆՑԻ ԸՄԲԻՇԻՆ». ՀՈՒՆԱՀՌՈՄԵԱԿԱՆ ՈՃԻ ԸՄԲՇԱՄԱՐՏԻ Մ17 ՏԱՐԵԿԱՆՆԵՐԻ ԵՎՐՈՊԱՅԻ ԱՌԱՋՆՈՒԹՅԱՆ ԱՐԾԱԹԵ ՄԵԴԱԼԱԿԻՐ ԱԼԵՔՍ ՄԱՐԳԱՐՅԱՆ

Հայաստանի հունահռոմեական ոճի ըմբշամարտի Մ17 տարեկանների հավաքականը 1 ոսկե, 3 արծաթե և 1 բրոնզե մեդալ է նվաճել Սերբիայի Նովի Սադ քաղաքում կայացած Եվրոպայի առաջնությունում։ Մեր ընտրանին թիմային հաշվարկում զբաղեցրել է երկրորդ տեղը։ Iravunk. com -ի մարզական թղթակիցը, բացառիկ զրույց է ունեցել արծաթե մեդալակիր, ծնունդով Արարատի մարզի Սուրենավան գյուղից ԱԼԵՔՍ ՄԱՐԳԱՐՅԱՆԻ հետ։ Նա այսպես մեկնաբանեց իր նվաճումը. - Հանդես եկա 60 կգ քաշային կարգում։ Մրցակիցներս համարյա բոլորն էլ տիտղոսակիր մարզիկներ էին։ Սկզբից բացարձակ առավելությամբ 10։0 հաշվով հաղթեցի Ալբանիայի ներկայացուցչին, ապա 10։0 հաշվով հունգարացի ըմբիշին, երրորդ գոտեմարտում կրկին 10։0 հաշվով պարտության եմ մատնել վրացի մրցակցիս, կիսաեզրափակչում հաղթեցի Ուկրաինայի ներկայացուցչին 14։9 հաշվով։ Իսկ ահա եզրափակչում, ցավոք, մրցավարները անարդար գտնվեցին ու հաղթանակը շնորհեցին մրցակցիս ադրբեջանցի ըմբիշին, ես բացահայտ հաղթել էի նրան 10։0 հաշվով, սակայն 9։4 հաշվեցին ի օգուտ ադրբեջանցու։ Մրցավարներից մեկը ազգությամբ թուրք էր։ Սակայն ես չպիտի կոտրվեմ, այլ պիտի առաջ գնամ ու պայքարեմ չեմպիոնի տիտղոսի համար արդեն Աշխարհի առաջնությանը, որը կկայանա Հորդանանում։ Նշեմ, որ եղբայրս էլ է ըմբշամարտիկ, ինձանից փոքր է մինչև 15 տարեկանների Եվրոպայի չեմպիոն է դարձել վերջերս։ Ես մեկ ամիս առաջ ՌԴ-ում կայացած միջազգային մրցաշարում հաղթող եմ դարձել,բացարձակ առավելությամբ 10։0 հաշվով ադրբեջանցուն հաղթեցի, Ղազախստանի և Ուզբեկստանի ներկայացուցիչներին ևս հաղթել եմ։ Հաջորդ տարի արդեն հանդես կգամ երիտասարդական հավաքականի կազմում։ Իսկ ահա Ալեքսի անձնական մարզիչը ՀԱՐՈՒԹՅՈՒՆ ՀՈՎՀԱՆՆԻՍՅԱՆԸ, մեզ հետ զրույցում այսպես բնութագրեց իր սանին. «Ալեքսը շատ աշխատասեր, նպատակասլաց մարզիկ է, շատ կշռադատված է։ Նախ, շատ լավ մարդ է ու հիանալի մարզիկ։ Շուրջ 6 տարի է ինչ պարապում է ինձ մոտ։ Նա ունի անկոտրում բնավորություն,հզոր կամքի ուժ, չհանձնվող տեսակի մարզիկ է։ Ափսոս, մրցավարները անարդար վերաբերվեցին ու հաղթանակը շնորհեցին ադրբեջանցի ըմբիշին։ Նշեմ, որ ես շատ մեծ հույսեր եմ կապում Ալեքսի հետ, առջևում Աշխարհի առաջնությունն է, հուսով եմ, որ ոսկե մեդալ կնվաճի նա»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով ԷՐԻԿ ՏԵՐ ՄԱԹԵՎՈՍՅԱՆԸ ԸՄԲՇԱՄԱՐՏԻ Մ20 ԵԱ ԲՐՈՆԶԵ ՄԵԴԱԼԱԿԻՐ ԳԱՍՊԱՐ ՏԵՐՏԵՐՅԱՆԸ ԸՄԲՇԱՄԱՐՏԻ Մ20 ԵԱ ԱՐԾԱԹԵ ՄԵԴԱԼԱԿԻՐ «ԿԻՍԱԵԶՐԱՓԱԿՉՈՒՄ 8։0 ՀԱՇՎՈՎ, ՎԱՂԱԺԱՄ ՊԱՐՏՈՒԹՅԱՆ ՄԱՏՆԵՑԻ ԱԴՐԲԵՋԱՆՑԻ ՀԱԿԱՌԱԿՈՐԴԻՍ». ՀՈՒՆԱՀՌՈՄԵԱԿԱՆ ՈՃԻ ԸՄԲՇԱՄԱՐՏԻ Մ17 ՏԱՐԵԿԱՆՆԵՐԻ ԵՎՐՈՊԱՅԻ ՉԵՄՊԻՈՆ ՄԱՐԱՏ ԱՃԵՄՅԱՆ ԸՄԲՇԱՄԱՐՏԻ Մ20 ԵԱ. ՅՈՒՐԻԿ ՀՈՎԵՅԱՆԸ ԲՐՈՆԶԵ ՄԵԴԱԼԱԿԻՐ Եվրո-2024. Օրվա հանդիպումները