Բաքուն Նախիջևանի հետ կապի «կալինինգրադյան մոդել» է առաջարկել. ՀՀ ԱԳՆ-ի արձագանքը

Հայկական կողմը չի մեկնաբանում Ադրբեջան-Նախիջևան կապի համար Բաքվի առաջարկած «կալինինգրադյան մոդելը»։ Ինչպես Sputnik Արմենիային հայտնել են Հայաստանի ԱԳՆ-ից, տարածաշրջանի տնտեսական ենթակառուցվածքների ապաշրջափակման վերաբերյալ ՀՀ կառավարության դիրքորոշումն արտացոլված է «Խաղաղության խաչմերուկ» նախագծում։

Բաքուն երկու անգամ Երևանին առաջարկել է «կալինինգրադյան մոդելը» Նախիջևանի հետ կապի համար։ Վերջին անգամ այս հարցը բարձրացրել է Ադրբեջանի նախագահի արտաքին քաղաքականության գծով օգնական Հիքմեթ Հաջիևը այս տարվա մարտի 1-ին Անթալիայում դիվանագիտական ֆորումի ժամանակ՝ այն անվանելով «պոտենցիալ լուծում»:

«Տարածաշրջանի տնտեսական ենթակառուցվածքների ապաշրջափակման վերաբերյալ ՀՀ կառավարության դիրքորոշումն արտացոլված է «Խաղաղության խաչմերուկ» նախագծում, որը պետք է կյանքի կոչվի դրանում ներառված 4 սկզբունքների միջոցով», – նշել են ԱԳՆ-ից։

ԱԳՆ-ն նաև հիշեցրել է Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ձևաչափը։ Արտաքին գործերի նախարարությունը հայտնել է, որ հանձնաժողովների նիստերի, ինչպես նաև համատեղ աշխատանքային հանդիպումների արդյունքների մասին տեղեկատվությունը ներկայացվում է պաշտոնական հաղորդագրություններում:

Հիշեցնենք, որ «կալինինգրադյան մոդելը» առաջարկել է 2021 թվականին միջազգային իրավունքի և միջազգային քաղաքականության իսրայելցի մասնագետ Միխայիլ Ֆինկելը։ Այն ավելի շատ հիմնված է քաղաքական, քան նյութատեխնիկական բաղադրիչի վրա:

ԽՍՀՄ փլուզումից հետո Լիտվան (ինչպես Միության մյուս հանրապետությունները) անկախություն ձեռք բերեց, իսկ Կալինինգրադը, լինելով Ռուսաստանի էքսկլավ, կորցրեց կապը երկրի հիմնական մասի հետ։

1997 թվականին Լիտվայի և Ռուսաստանի Դաշնության միջև կնքվել է սահմանային համաձայնագիր։ Ռուսաստանը համաձայնագիրը վավերացրել է այն բանից հետո, երբ համաձայնություն է ձեռք բերվել Կալինինգրադի մարզ ապրանքների առանց վիզայի տարանցման մասին։ 2002 թվականին ԵՄ-ի և Ռուսաստանի Դաշնության համատեղ հայտարարության մեջ ասվում էր, որ տարանցման ռեժիմը չի սահմանափակի Լիտվայի ինքնիշխան իրավունքը՝ իրականացնելու անհրաժեշտ վերահսկողություն և արգելք սահմանի իր տարածք մուտքի համար:

Ներկայում համաձայնագիրը գործում է սահմանափակ ձևաչափով՝ հակառուսական պատժամիջոցների ֆոնին։

Այս թեմայով Երևանը և Բաքուն մի քանի ամսվա ընթացքում կարող են համաձայնության գալ խաղաղության պայմանագրի շուրջ Բաքուն դեռ չի արձագանքել համատեղ հետաքննման մեխանիզմ ստեղծելու Երևանի առաջարկին Բաքուն ՀՀ-ին ասում է` վրեժ եմ լուծելու քեզնից, դու 30 տարի չթողեցիր ես ապրեմ, հիմա ես քեզ չեմ թողի Բաքուն Հայաստանի հետ խաղաղության պայմանագիր ստորագրելու որևէ ցանկություն չունի. Սուրենյանց Տարածքների նվիրումն Ադրբեջանին հանցավոր գործողություն է, որը կբերի նաեւ էներգետիկ եւ լոգիստիկ վտանգների. Մանվելյան