Չես կարող մի էպիզոդիկ դրվագով լքել կուսակցությունը. Անի Սամսոնյան

«Իրավունք»-ի զրուցակիցն է ԱԺ նախորդ գումարման «Լուսավոր Հայաստան» խմբակցության պատգամավոր ԱՆԻ ՍԱՄՍՈՆՅԱՆԸ:

— Որքանո՞վ է իրականությանը համապատասխանում մամուլում տեղ գտած տեղեկությունը, որ Ձեր եւ Էդմոն Մարուքյանի միջեւ քաղաքական տարաձայնություններն են եղել պատճառը, որ դադարեցրել եք Ձեր անդամակցությունը ԼՀԿ-ին:

— Ինչպես տեսել եք, ես օրերս հայտարարեցի, որ դիմել եմ ԼՀԿ Կառավարման խորհրդին՝ անդամակցությունս դադարեցնելու հարցով. դեռեւս մայիսի 29-ին։ Կուսակցությունը կենդանի միջավայր է, որտեղ լինում են ինչպես համաձայնություններ, այդպես էլ տարաձայնություններ։ Ես իմ գործընկերներին ասել եմ, որ իմ առաքելությունը կուսակցությունում համարում եմ ավարտված եւ լրացուցիչ մեկնաբանություններ չունեմ այս առումով։ Կարեւորը գործընկերներս գնահատել են ազնվությունս եւ հասկացել են ինձ։

— Այդուհանդերձ, կբացե՞ք փակագծերը, թե ո՞ր քաղաքական հարցերի շուրջ է, որ Ձեր տեսակետները սկսել են չհամընկնել:

— Բազմաթիվ հարցեր են եղել, որ համընկել են, եւ եղել են, որ չեն համընկել։ Չեմ կարող ամբողջ 9-ը տարվա համընկնումներն ու չհամընկնումները հիշել։ Կուսակցություն հիմնելը եւ անդամ լինելը լուրջ բան է։ Չես կարող մի էպիզոդիկ դրվագով լքել այն։

— Առաջիկայում  այլ քաղաքական թիմում Ձեզ տեսնո՞ւմ եք:

— Ես շարունակելու եմ քաղաքական գործունեությունս։ Երբ մենք հիմնադրեցինք «Լուսավոր Հայաստան»-ը, դաշտում չկար քաղաքական ուժ, որին մենք կանդամակցեինք, դրա համար ստեղծեցինք մեր ուժը։ Հիմա գրեթե նույն պատմությունն է։

— Էդմոն Մարուքյանը նախապայման էր առաջ քաշում, որ Բագրատ սրբազանը պետք է երաշխավորի՝ հաջողության դեպքում նախկինները չեն վերադառնալու: Համամի՞տ եք այս մտքի հետ, երբ նույն շարժման մեջ կան Նիկոլ Փաշինյանի նախկին համախոհներ:

— Դա ասվել է, որպեսզի այդ քաղաքական քայլով մեծանա շարժման նկատմամբ վստահությունը։ Այո, ժողովուրդը հոգնել է եւ այլեւս չի վստահում Նիկոլ Փաշինյանին, բայց ի դեմս նրա՝ տեսնում է մեկին, ով իշխանությունը ո՛չ 2021-ին տվեց նախկիններին, ո՛չ էլ հիմա կտա։ Եթե լինի այնպիսի առաջնորդ, որ մարդիկ վստահ կլինեն այն բանում, որ այդ մարդը կստանա ժողովրդի քվեն, եւ դա նախկիններին չի տա, ապա Նիկոլ Փաշինյանի իշխանության օրերը արդեն կարելի է հաշված համարել։ Դրա համար էլ, ով քաղաքական հայտ է ներկայացնում, իշխանությունը կապում է նախկինների հետ, որ փչացնի։

— Ինչպե՞ս եք տեսնում Բագրատ սրբազանի շարժման ելքը, արդյո՞ք այն ձախողվեց, թե՞ մարտավարական սխալներ թույլ տվեց, որը դեռ հնարավոր է շտկել:

— Շարժումը մի ելք ունի՝ ճնշել պառլամենտին, որ մանդատները վայր դնեն եւ գնան արտահերթ ընտրությունների։ Կարծում եմ՝ մարդիկ կգնահատեն ու կհարգեն այն փաստը, որ Բագրատ սրբազանը փոխեց քաղաքական դաշտի լճացած ու փայտացած վիճակը, ժողովրդին ազատեց ազգակործան պառլամենտից եւ հնարավորություն տվեց նորից իրենց քվեով ձեւավորելու նոր իշխանություն։

ԴԻԱՆԱ ՄԱՆՈՒԿՅԱՆ