Եթե այս շարժումը հաջողություն չունեցավ, ապա մենք արդեն գոյություն չենք ունենա. Վոլոդյա Հովհաննիսյան

«Իրավունք»-ի զրուցակիցն է Արցախյան առաջին պատերազմում Բերձորի միջանցքի ազատագրման, Վարանդայի ու Սանասարի մարտական գործողությունների մասնակից, Սիսական 2-րդ վաշտի հրամանատար, զորամիավորումների զորային հետախուզության նախկին պետ, պահեստազորի գնդապետ ՎՈԼՈԴՅԱ ՀՈՎՀԱՆՆԻՍՅԱՆԸ:

— Ըստ էության, Բագրատ սրբազանը դուրս է եկել Փաշինյան-Ալիեւ դուետի դեմ։ Արդյո՞ք կստացվի այս շարժումը տրամաբանական ավարտին հասցնել:

— Այո՛, կստացվի։

— Ոստիկանների ագրեսիվ պահվածքն ինչպե՞ս կմեկնաբանեք, ովքեր Ամենայն Հայոց կաթողիկոսին թույլ չէին տալիս մոտենալ Սարդարապատի հուշահամալիրին:

— Գնահատում եմ որպես շատ վատ արարք: Դրանք հանուն փողի իրենց պատիվը, ազգը, հավատը կորցրած ոչնչությունների խումբ են, այլ ոչ ոստիկան։

— Դեռ որքա՞ն պետք է այս ամենը շարունակվի, կարո՞ղ ենք ասել, որ այժմ հասել ենք այն եզրագծին, որից անդին՝ կամ ամեն ինչի փլուզում է, կամ՝ փրկություն:

— Մենք իրադարձությունների անդունդի մեջ ենք, քանի որ կորցրել ենք մեր ինքնիշխանությունը, բանակը, անվտանգության բոլոր բաղադրիչները եւ Փաշինյան-Ալիեւ դուետը հայ ժողովրդին ստրկացրել է հանուն թուրքի շահի։

— Իսկ մեր հասարակությունը որքանո՞վ է սթափ եւ սառը գնահատում ստեղծված իրավիճակը:

— Գիտեք, մեր հասարակությունն իր 90 տոկոսով պետք է կանգնի սեփական փրկության համար եւ գիտի, որ Փաշինյանը այն գործիչն է, ով սպասարկում է թուրքական շահերը։ Պարզապես, հասարակությանը պետք է ստացվի հետեւել իրադարձությունների հետագա ընթացքին։

— Ի վերջո, Դուք տեսնու՞մ եք Նիկոլ Փաշինյանի հեռացումը, թե՝ ոչ։ Այս շարժումը դեպի մարմա՞ն կգնա, թե՞ բոլորովին այլ զարգացումների փուլ ենք մտնում:

— Կարծում եմ՝ եթե մարման գնաց, ապա մարելու է հայի գոյությունը։ Եթե այս շարժումը հաջողություն չունեցավ, ապա մենք արդեն գոյություն չենք ունենա։

— Կարծում եք՝ ՔՊ-ն որեւէ զիջումների կգնա՞, թե՞ կշարունակեն մինչեւ վերջ կառչած մնալ իրենց աթոռներից։

— Նիկոլ Փաշինյանը, լինելով այդ տեսակ անձնավորություն, նա իրեն հանձնարարած խնդիրը մինչեւ վերջ պետք է տանի, քանի որ Փաշինյանը փրկում է իր անձը եւ փորձում է ասել, որ ինքն ինչ-որ մի բան է անում։ Արցախը եւ Հայաստանը տալուց հետո Փաշինյանը փորձում է Հայաստանի գոյության ուրվականը պահել, որպեսզի արդարացնի իրեն։

— Իշխանական քարոզչամեքենան քննադատում է, թե՝ իբրեւ եկեղեցին քաղաքականությամբ է զբաղվում…

— Չգիտես ինչու, եկեղեցու անունը հաճախ տալիս են, բայց ոչ ոք չի ասում որ Ձիրավի ճակատամարտի ոգեկոչողը Ներսես կաթողիկոսն էր։ Ինչո՞ւ է շատերին թվում, որ եկեղեցին պետք է լուռ կերպով կողքից նայի եւ աղոթի, թե ինչպես է հայ ժողովուրդը մահանում։ Եկեղեցին փորձում է ոչ թե քաղաքականությամբ զբաղվել, այլ փրկել երկիրը եւ ժողովրդին։ Եկեղեցին քաղաքականությամբ չի զբաղվում, փրկում է ազգը։

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝