Ինչպես հայտնվեց «Հայրիկը սարդոստայնում». առաջնախաղ` ռուսական թատրոնի բեմում

Համացանցում երկու երիտասարդների հանդիպումը դառնում է իսկական պատուհաս երկու ընտանիքների համար էլ, որոնք պարզվում է` ունեն մեկ ընդհանուր հայրիկ: Կատակերգական այս պատմությունը փոխանակ հանգուցալուծվի, էլ ավելի է խճճվում: Գլխավոր հերոսին թվում էր, թե ինքն է երկակի խաղ վարում իր երկու կանանց հետ, սակայն կանայք ավելի խորամանկ են գտնվում, ու հայրիկը հայտնվում է սարդոստայնում, որտեղից դժվար է դուրս գալ` նորանոր ստեր հորինելով: Այսպիսին էր Կ․ Ստանիսլավսկու անվան ռուսական դրամատիկական թատրոնում հանդիսատեսի դատին հանձնված 16+ նոր ներկայացումը` բեմադրված ՀՀ վաստակավոր արտիստ ՎԵՐՈՆԻԿԱ ՍԱՐՈՅԱՆԻ կողմից Ռ․ Կունիի «Հայրիկը սարդոստայնում» կատակերգության հիման վրա:

Ներկայացման դերակատարներն են ՀՀ վաստակավոր արտիստ Աննա Բալանդինան, Արմեն Արնաուտովը, Արմեն Մարգարյանը, Լալիտա Բուկիան, Արեն Խաչատրյանը, Անաիդա Գաբրիելյանը, Յանա Թուրգունյանը, Անտոն Աղաջանյանը։ Իսկ ներկայացման բեմանկարիչը Տիգրան Հարությունյանն է, զգեստները՝ Յուլիա Ֆինկի, խորեոգրաֆիան` Նունե Կիրակոսյանի, երաժշտական ձեւավորումը եւս` Վերոնիկա Սարոյանի:

«Մեր մշտական հանդիսատեսը գիտի, որ մեզ մոտ բավականին հաճախ են տեղի ունենում պրեմիերաներ, որոնք մեզ համար տոն են: Միայն այս թատերաշրջանում մենք հանդիսատեսին ենք ներկայացրել Եվգենի Իոնեսկոյի «Զառանցանք երկուսով»-ը, Ալեքսանդր Պուշկինի «Փոքրիկ ողբերգություններ»-ը, Միխայիլ Բուլգակովի «Երիտասարդ բժշկի գրառումները»: Իսկ Ռեյ Կունիի թեթեւ, կենսուրախ «Հայրիկը սարդոստայնում» կոմեդիայից հետո` մեզ սպասվում է եւս մեկ առաջնախաղ` «Քնած գեղեցկուհին», որը կլինի նվեր փոքրիկների համար: Ինչպես նաեւ կունենանք առաջնախաղ ֆրանսիացի ժամանակակից դրամատուրգ Յասմինա Ռեզայի «Սպանդի աստվածը» պիեսի հիման վրա: Այնպես որ, մեզ մոտ ներկայացումները մշտապես շատ տարբեր են, եւ մենք միշտ ուրախ ենք տեսնել մեր հանդիսատեսին ռուսական թատրոնում», - ասաց ռուսական դրամատիկական թատրոնի գեղարվեստական ղեկավար ԿԱՐԵՆ ՆԵՐՍԻՍՅԱՆԸ:

ՀՐԱՆՏ ՍԱՐԱՖՅԱՆ

Այս թեմայով Ռուսական բանակը գրոհում է Նյու Յորքը Արտաշատում եւ Վեդիում էլ կունկնդրեն իտալական արիաներ Այս ամենը երազանք էր, որ դառնում է իրականություն. Թումանյանը Թումանյան է բեմադրել Մեր ժողովուրդը սկսել է չժպտալ, այս ներկայացումը ժպիտ պարգեւող է. առաջնախաղ՝ «Թատրոն կայարան»-ում Ցավոք, սերը դարձել է Սովետի ժամանակ ամերիկյան ավտո՝ Երեւանի փողոցներում. Իշխան Ղարիբյան