Սա «բեսպրեդել» է` Հայաստանի պատմության մեջ չտեսնված անբարո «շոու». Նաիրա Զոհրաբյան

ՀՀ քննչական կոմիտեի հատկապես կարեւոր գործերի քննության գլխավոր վարչության խոշտանգումների եւ պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչությունում ՀՀ քրեական օրենսգրքի 450-րդ հոդվածի 2-րդ մասի 7-րդ կետի հատկանիշներով նախաձեռնվել է քրեական վարույթ, որի արդյունքում 44-օրյա պատերազմի մասնակից, քաղակտիվիստ Սամվել Վարդանյանը ճանաչվել է տուժող։ Հիշեցնենք, որ ՔՊ-ական պատգամավոր Հակոբ Ասլանյանի հետ տրանսպորտում ունեցած միջադեպից հետո Ս. Վարդանյանը բերման էր ենթարկվել, ապա երեկոյան՝ համապատասխան քննչական գործողություններից հետո, երբ նրան Ոստիկանության ծառայողների ուղեկցությամբ ձերբակալվածների պահման վայր էին տեղափոխել, ճանապարհին ենթարկվել էր արժանապատվությունը նսեմացնող գործողությունների։ Անդրադառնալով վերոնշյալին` «Անվտանգություն եւ ժողովրդավարություն» ՀԿ նախագահ ՆԱԻՐԱ ԶՈՀՐԱԲՅԱՆՆ ասաց, որ նման բռնության գնում է միայն հոգեվարքի մեջ գտնվող իշխանությունը:

— Երիտասարդը, տրանսպորտում հանդիպելով ՔՊ-ական պատգամավորին,  առանց բռնության, նրան ասել է այն, ինչ Նիկոլ Փաշինյանի իշխանությանն այսօր ասում է ՀՀ քաղաքացիների 90 տոկոսը: Ես փորձեմ զուգահեռ անցկացնել` ՀՀ առաջին նախագահ Լեւոն Տեր-Պետրոսյանը Նիկոլ Փաշինյանին ասել էր «ազգակործան պատուհաս»։ Ի՞նչ տարբերություն՝ «ազգակործան պատուհասի» եւ «հողատու վիժվածքի» միջեւ։ Կարծում եմ` առաջին նախագահի բնորոշումն ավելի կոշտ ու կոպիտ է, որը նա հնչեցրել է ուղիղ Նիկոլ Փաշինյանի հասցեին, իսկ երկրորդը` քաղաքացին իր վերաբերմունքն էր հայտնել ՔՊ-ական շարքային ներկայացուցչի հանդեպ: Ու դրանից հետո խուլիգանության, ռասայական, ազգային խտրականություն հրահրելու մեղադրանքով ձերբակալում են Սամվել Վարդանյանին եւ կազմակերպում են Հայաստանի պատմության մեջ գոյություն չունեցող եւ չտեսնված անբարո «շոու»: Սա «բեսպրեդել» է։ Բայց այստեղ մի նրբություն կա` նման «բեսպրեդելի», նման անբարո բռնաճնշումների դիմում է միայն այն իշխանությունը, որն այլեւս սարսափում է յուրաքանչյուր քաղաքացուց, այն իշխանությունը, որն այլեւս կլինիկական մահվան մեջ է:

Նշենք, որ դատարանի որոշմամբ` Սամվել Վարդանյանի նկատմամբ որպես խափանման միջոց կիրառվել է 7 միլիոն գրավը եւ 2-ամսյա տնային կալանքը: