Այսօր արդեն մտածում եմ հայրենիքից մեկնելու մասին. Հասմիկ Կարապետյան

«Իրավունք TV»-ի տաղավարում զրուցել ենք երգչուհի ՀԱՍՄԻԿ ԿԱՐԱՊԵՏՅԱՆԻ հետ` փորձելով հասկանալ, թե որն է հայկական երգարվեստի սահմանը, եւ ուր է այն գնում:

— Ապրում ենք մի շրջանում, երբ խառնաշփոթ է բոլոր ոլորտներում: Ի՞նչ է կատարվում մեր երգարվեստում:

— Ինչ կատարվում է մեր երգարվեստի հետ, ինձ դուր չի գալիս: Երբ ես էի կայանում, այդ ժամանակ կար համ ու հոտ, կար գույն, ասելիք: Մենք` բոլոր երգիչներս, մեկ դաշտում էինք, սակայն նաեւ տարբերվում էինք իրարից, եւ մեզ հիշում էին անգամ մեկ-երկու երգից հետո: Երգերը շատ ավելի որոկյալ էին, այժմ շատ անհասկանալի միքսեր են: Կցանկանայի, որ երգիչները քիչ լինեին, բայց որակ լիներ:

— Բոլորը ցանկանում են հայտնի լինել` կա՛մ երգիչ են, դերասան, կա՛մ` իրավաբան ու քաղաքագետ… Սա ժամանակի թելադրա՞նքն է:

— Կարծում եմ` այո, նաեւ մարդկանց անտարբերության արդյունքն է, եւ համացանցի թելադրանքն է: Մարդիկ կարող են մեկ քայլով դառնալ ճանաչված, մեկ նկարահանումով դառնալ աստղ: Տեսեք` ինչ է կատարվում սոցհարթակներում...

— Եկեք ընդունենք, որ նման ճանաչումը նաեւ շատ հեշտ մոռացվում է…

— Կա նման բան՝ թիթեռնիկի կյանք է դա. այս ինտերնետի դարը նաեւ մեզ է վնասել: Երբ այն ժամանակ մենք ներդնում էինք մեր մաքսիմալ ուժերը եւ ստանում որակյալ տեսահոլովակ, անմիջապես ստանում էինք հանդիսատեսի դրական արձագանքը, նաեւ հրավերներ արտասահմանից, եւ կար ոգեւորություն: Հիմա շատ այլ է: Այժմ ոչ ոք չի ցանկանում ներդրում կատարել եւ տեսահոլովակ նկարահանել, քանի որ համացանցով դա առավել հասանելի ու մատչելի է դարձել: Ցավոք, մեր ազգի համար արժեքները դարձել են հարաբերական: Մոլորվածություն է տիրում: Ես միշտ մտածել եմ, որ հայը պետք է հայրենիքում ապրի՝ չլքի այն, սակայն այսօր ես արդեն մտածում եմ իմ երեխաների ապագայի եւ անգամ մեկնելու մասին:

— Վերջին շրջանում մեծ արձագանք ստացավ «Եվրատեսիլ» մեկնող մեր մասնակցի կատարումն ու կերպարը, Դուք ի՞նչ կասեք:

— Մեծ համակրանք ունեմ այդ աղջկա նկատմամբ եւ մեկ այլ երգի նկատմամբ, սակայն անկեղծ լինեմ եւ ասեմ, որ այս տարվա «Եվրատեսիլ»-ում ներկայացվող երգն այդքան էլ չեմ հավանել: Երգը, ըստ իս, ոչինչ չասող է: Գուցե «Եվրատեսիլ»-ի համար հարմար երգ է, չգիտեմ, բայց հնչողությունը հայկական չէր: Կցանկանայի, որ «Եվրատեսիլ»-ում գոնե աշխարհին հայկականը ներկայացնենք: Եթե մասնակցում ենք, ապա միայն այդ սկզբունքով:

— Հասմիկ, Դուք այն քչերից եք, որ ոչ մի կերպ չփոխեց իր ոճը ու չանցավ 6/8 ժանրի: Ինչո՞ւ:

— Ես շատ դժվարությամբ եմ կերտել իմ ճանապարհը, ու այն եմ, ինչ կամ՝ երգում եմ այն, ինչ զգում եմ: Ես սիրում եմ անկեղծ ապրումներից բխած երգերը, իսկ ֆինանսական բացը լրացրել եմ` հեռուստահաղորդումներ վարելով:

— Ի՞նչ սպասի Ձեր հանդիսատեսն առաջիկայում՝ նոր տեսահոլովա՞կ, նոր ե՞րգ…

— 2023 թվականի դեկտեմբեր ամսին նոր մեղեդի գրեցի, որն այս տարիների ընթացքում կուտակված ցավն էր, թերեւս: Մեղեդին այդ զգացմունքների պոռթկումն էր, եւ այն անվանեցի «Աղոթք»: Երեք-չորս անգամ փորձեցի բառեր գրել, սակայն չէր ստացվում: Այնուհետ համագործակցեցի Եմին Սարտագարի հետ, ստացանք մինիմալ կադրերով շատ գեղեցիկ տեսահոլովակ: Իսկ հետագայում, անշուշտ, սպասվում են նոր երգեր եւ նոր զուգերգ:

ՆԱՆԱ ՍԱՐԳՍՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝