«ՀԵՏ Է ՇՊՐՏԵԼ ՀԱԿԱՌԱԿՈՐԴԻՆ, ԲՆԱՋՆՋԵԼ ՆՐԱՆՑԻՑ ՇԱՏԵՐԻՆ, ԱՌԳՐԱՎՎԵԼ 7 ԶՐԱՀԱՄԵՔԵՆԱ». ՄԵԼԻՔՍԵԹ ԱՐՈՍՅԱՆ

2020 թվականի սեպտեմբերի 27-ին սկսված ադրբեջանա-թուրքական սանձազերծած 44-օրյա ահաբեկչական պատերազմում, ցավոք շատ զոհեր ունեցանք, նրանցից էլ մեկն էլ ՄԵԼԻՔՍԵԹ ՍԱՐԳՍԻ ԱՐՈՍՅԱՆՆ էր։ Այսօր նրա ծննդյան օրն է, կդառնար 32 տարեկան, ցավոք, ահաբեկչական պատերազմը խլեց այս լուսավոր երիտասարդի ջահել կյանքը։ Այսօր, անմահ հերոսի շիրիմին են այցելել հարազատներ, ընկերներ, համագյուղացիներ, ծաղիկներ խոնարհել ու խնկարկել։Մելիքսեթը ծնվել էր 1992 թվականին, Շիրակի մարզի, Աշոցքի տարածաշրջանի Ղազանչի գյուղում, մանկավարժների ընտանիքում, հայրը դպրոցի զինղեկն էր, մայրը դասվար։ Մելիքսեթի բարեկամուհին, Iravunk. com -ի Շիրակի մարզի թղթակցի հետ զրույցում նշեց. «Լինելով մանկավարժների ընտանիքից, Մելիքսեթը ևս շարունակեց ծնողների աշխատանքը, շուրջ մեկ տարի էր, ինչ աշխատում էր հայրենի Ղազանչիի միջնակարգ դպրոցում, որպես զինղեկ։ Նա ավարտել էր Շիրակի պետական համալսարանի ՆԶՊ և ֆիզդաստիարակության ֆակուլտետը, արժանացել էր սպայի /լեյտենանտ /կոչման։ Նա տան միակ որդին էր, ունի մեկ քույր։ Ծառայել է Արարատի զորամասում, բարեխիղճ ծառայության համար պարգևատրվել է «Քաջարի մարտիկ», «Լավագույն մարզիկ», «Բանակի գերազանցիկ» շքանշաններով։ Հետախույզ - դիպուկահար էր, այնքան լավ էր ծառայում, որ նկարը մեծադիր պաստառով փակցված էր զորամասում և Երևան - Արցախ մայրուղու ցուցատախտակին։ Մելիքսեթը նաև որսորդմիության անդամ էր, ազատ ժամանակ դուրս էր գալիս որսի։ Նա պահեստազորային էր Վանաձորի զորամասում, այնտեղից մեկել է միանգամից Ջաբրայիլ /Ջրական /ու մասնակցել պատերազմի թեժ մարտերին։ Մարտական ընկերները պատմում են, որ շատ մոտ է եղել թշնամուն, իր դիվերսիոն հետախուզական խմբով, հմուտ դիպուկահարությամբ, հետ է շպրտել հակառակորդին, բնաջնջել նրանցից շատերին, կենաց ֊մահու պայքար է մղել, առգրավվել 7 զրահամեքենա, զենք ֊զինամթերք։ Բոլորիս կողմից շատ սիրելի Մելիքսեթը /Մելոն /նրան այդպես էինք դիմում, ընկավ հերոսի մահով, նա իր արյամբ ստորագրեց բոլորիս անվտանգությունը, հոկտեմբերի 17֊ին, Ջաբրայիլում ։ Վիրավոր է եղել, ցավոք հիվանդանոց տեղափոխելու ճանապարհին մահացել է։ ՀՀ նախագահի հրամանագրով հետմահու պարգևատրվել է «Մարտական ծառայություն» մեդալով։ Հայրենի Ղազանչի գյուղում, ծնողների կողմից բացվել է նրա հիշատակը հավերժացնող խաչքար։ Մելիքսեթի քույրը լույս աշխարհ է բերել տղա զավակ ու անվանակոչել անմահ հերոս եղբոր անվամբ։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝