Իրանը կփակի՞ ցամաքային սահմանները

Մամուլում լայն արձագանք գտավ այն, որ Իրանի ցամաքային զորքերի հրամանատար Ամիր Քյոմարս Հեյդարին հայտարարել է, որ Իրանի Իսլամական Հանրապետությունը ցանկանում է փակել իրենց ցամաքային սահմանները: Հրամանատարի գնահատմամբ` սա անարդարություն չէ հարեւան երկրների նկատմամբ, քանի որ «բոլոր երկրներում էլ սովորական է, երբ իրենք իրենց կամքով են փակում սահմանները, եւ ոչ ոք չի կարող առարկել, թե ինչու եք դա անում մեր սահմանին»։ Այս եւ այլ հարցերի շուրջ զրուցել ենք Հայաստանում Իրանի արտակարգ եւ լիազոր դեսպան ԱԲԲԱՍ ԲԱԴԱԽՇԱՆ ԶՈՀՈՒՐԻԻ հետ:

— Որքանո՞վ է հնարավոր, որ հրամանատար Ամիր Քյոմարս Հեյդարիի հայտարարության համատեքստում կփակվի նաեւ հայ-իրանական սահմանը:

— Նման հայտարարություն ինքս չեմ լսել եւ տեղյակ չեմ: Իրանի պաշտոնական դիրքորոշմանը տեղեկանալու համար կարող եք հետեւել Արտաքին գործերի նախարարության հայտարարություններին եւ ԱԳ նախարարի խոսնակ մեկնաբանություններին:

— Պարոն դեսպան, ի՞նչ կասեք Հայաստանի սահմաններում ստեղծված իրավիճակի մասին, եւ ի՞նչ ակնկալել Իրանից` տարածաշրջանում կայունության հաստատման համատեքստում:

— Մեզ համար մտահոգիչ է տեսնել լարված իրավիճակ Հայաստանի սահմաններում, մենք ցանկանում ենք, որ կողմերը հասնեն խաղաղ հարաբերությունների հաստատման: Վստահ ենք, որ իրավիճակի լուծման միակ ճանապարհը խաղաղ հարաբերություններ ունենալն է եւ ընկերական խոսակցությունը: Այս առումով մենք բոլոր կողմերի հետ հարաբերություններ եւ խոսակցություններ ունենք, որպեսզի կարողանանք մշտական խաղաղություն հաստատել այս տարածաշրջանում:

— Իսկ, այսպես ասած, «Զանգեզուրի միջանցքի» վերաբերյալ Իրանի հայտնի դիրքորոշման մեջ այսօր փոփոխություն կա՞:

— Իրանի Իսլամական Հանրապետության վերջնական դիրքորոշումն այն է, որ ոչ մի կերպ չենք կարող ընդունել տարածքային փոփոխությունները, պետք է հարգել տարածաշրջանի երկրների տարածքային ամբողջականությունը

— Իրանի ԱԳ նախարար Հոսեյն Ամիր Աբդոլլահիանը Հայաստան կատարած իր պաշտոնական այցի ժամանակ եւս հայտարարել է, որ Իրանի Հանրապետությունը աջակցում է ՀՀ-ի տարածքային ամբողջականությունը եւ ինքնիշխանությունը: Այս առումով ի՞նչ կասեք սահմանային վերջին միջադեպի հետ կապված, որի հետեւանքով հայկական կողմն ունեցավ չորս զոհ:

— Իրանի արտգործնախարարության խոսնակն արդեն անդրադարձել է այս հարցին:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝