«Միասին»` կարգալույծ երբեմնի Տեր Ղազարի հե՞տ

Ազատության հրապարակում տեղի ունեցավ «Միասին» շարժման հանրահավաքը` Նիկոլ Փաշինյանի հրաժարականի պահանջով: Թվում էր, թե քիչ է մնացել, որ ընդդիմությունը վերջապես միասին գործողություններ իրականացնի` օր առաջ մոտեցնելով Փաշինյանի հրաժարականը, բայց այն իրականացնելու համար «100 քայլի» փոխարեն ներկայացվեց «100 պատճառ` Նիկոլ Փաշինյանին անվստահություն հայտնելու համար»: Սակայն, հանրահավաքի մասնակիցների շարքերում ամենից շատ ոչ էլ այս հարցն էր հուզում, որքան այն, թե ինչ գործ ուներ հարթակում կարգալույծ հռչակված վաղեմի Տ. Ղազար քահանա Պետրոսյանը` նույն ինքը` Հայկ Պետրոսյանը:

Հիշեցնենք, որ դեռեւս 2021 թվականի դեկտեմբերի 27-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսի հայրապետական տնօրինությամբ` կարգալույծ է հռչակվել Մասյացոտնի թեմի հոգեւոր սպասավոր Տ. Ղազար քահանա Պետրոսյանը: Տնօրինության համար հիմք է ծառայել Ղազար քահանայի կողմից հոգեւոր վերադաս իշխանության նկատմամբ դրսեւորած անհնազանդությունը, եկեղեցականի կոչմանն ու առաքելությանը անհարիր կուսակցական գործունեությամբ ու քարոզչությամբ զբաղվելը եւ Մայր Աթոռի Կարգապահական հանձնախմբի հետ հանդիպելու հրավերները մերժելը: Նա այդ օրվանից դասվում է աշխարհականների շարքին՝ Հայկ Պետրոսյան ավազանի անունով, մինչդեռ հանրահավաքին եկել էր եւ հարթակում կանգնել ֆեյք հոգեւորականի հանդերձանքով:

Իհարկե, միասնականության հարցում դժվար թե կարողանար օգնել կարգալույծ հոգեւորականը «Միասին» շարժմանը, բայց մի հարցում օգտակար եղավ: Քանի որ բոլորի ուշադրության կենտրոնում նրա հարթակում հայտնվելն էր, շատերն ուշադրություն չդարձրին շարժման անդամ Նարինե Դիլբարյանի ելույթից մի հատվածի: Լեզվաբան Նարինե Դիլբարյանը իր խոսքում շփոթվեց` ասելով. «Բոլորս պետք է հասկանանք, որ բոլոր գաղտնիքները թաղված են մեր պատմության մեջ, եւ այդ պատմությունը ոչ ոք չի կարող դարձնել հայոց…»: Կներեք, տիկնայք եւ պարոնայք, բա մենք չէինք հավաքվե՞լ` հանուն Հայոցի…

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝