ԳՅՈՒՄՐԻՈՒՄ ՆՇՎԵՑ ԲՈՒՆ ԲԱՐԵԿԵՆԴԱՆԸ

Այսօր, փետրվարի 11-ին, Iravunk. com-ի Շիրակի մարզի թղթակիցը Գյումրիում էր։ Վարդանանց հրապարակում, մեծ տոնախմբությամբ նշվեց բուն Բարեկենդանը։ Օրվա առթիվ կազմակերպված միջոցառմանը ներկա էին քաղաքային իշխանության ներկայացուցիչներ։ Տոնախմբություն կազմակերպել էր Շիրակի թեմի Երիտասարդաց միությունը, Գյումրիի Երիտասարդական պալատ ՀՈԱԿ ֊ի և «Հրայրք» ավանդական պարի խմբի հետ համատեղ։ Միջոցառման շրջանակներում հանրությանը ներկայացվեցին ազգային խաղեր, թեմատիկ բեմադրություն, տոնական երգեր, ազգային պարեր, դիմակահանդես։ Այսօր տոնում ենք ամենաերկար պահքի բարեկենդանը, որ իր աստվածպաշտական կարգով և խորհրդաբանությամբ ներառված է մեծ պահքի խորհրդում։ «Բարեկենդան» բառացի նշանակում է կենդանություն, բարեկեցություն, ուրախություն։ Քրիստոնյաների համար «Բարեկենդան» բառը խորհրդանշում է այն ճշմարիտ բարի կյանքը և մեղքի մահով չվնասված հոգու կենդանի վիճակը, որի մեջ մարդը գտնվում է դրախտում, նախքան մեղանչելը։

Քրիստոնյաների նպատակն է վերստին ստանալ ադամական մեղքի պատճառով կորցրած այդ սկզբնական բարեկեցությունը, որը շնորհվելու է համընդհանուր հարության օրը, ուղիղ հավատով և բարեպաշտությամբ ընթացողներին։ Բուն Բարեկենդանին, արդեն փակ է խորանի վարագույրը և չի համբուրվում Ավետարանը, այս ծիսական խորհրդանիշները դրդում են այսօրվանից սգալ նախամարդու անհավատության և դրախտից արտաքսվելու համար, սակայն բուն Բարեկենդանի հիմնական խորհուրդը շարունակում է մնալ դրախտային վայելչությունը, մարդու ստեղծման օրրանն ու ճշմարիտ հայրենիքը, որի կորուստը Քրիստոսի փրկագործության շնորհիվ անդառնալի չէ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝