Ուր էլ գնա Նիկոլը մի Հակոբ գտնվելու է, որ իրեն հիշեցնի՝ մենք չենք հանձնվում. Պէրպէրեան

«Իրավունքն» անդրադարձել էր նրան, որ Նիկոլ Փաշինյանի տիկինոջ` Աննա Հակոբյանի ծննդյան տարեդարձը երեւանյան օբյեկտներից «Դառգետ»-ում անցնցում չի անցել: Հարակից սեղաններից մեկում նստած է եղել քառօրյա եւ 44-օրյա պատերազմների մասնակից ՀԱԿՈԲ ՊԵՐՊԷՐԵԱՆԸ եւ վանկարկել` «Արցա՜խ, Արցա՜խ, Արցա՛խ…»: Իսկ թե ինչ է տեղի ունեցել հետո` պարզեցինք հենց Հ. Պերպէրեանից «Իրավունք TV»-ի տաղավորում:

—  Փետրվարի 1-ին Փաշինյանները նշում էին Աննա Հակոբյանի ծննդյան տարեդարձը, նույն վայրում հայտնվեցիք եւ Դուք: Ինչպե՞ս ստացվեց այդպես եւ ի՞նչ եղավ:

— Արդեն աշխատանքային ժամս ավարտվել էր այդ նույն օբյեկտում, որտեղ ես աշխատում եմ, բայց ես մնացել էի աշխատավայրում, հաց էի ուտում եւ գարեջուր խմում: Նկատեցի, որ ԱԱԾ աշխատակիցներ են մուտք գործում, դուրս գալիս, հասկացա, որ ինչ-որ մի «կարեւոր» անձնավորություն է գալու: Ինձ հետաքրքիր էր, թե ով է գալու, որ այսքան անվտանգության աշխատակիցներ կան: Որոշ ժամանակ անց ներս մտավ Նիկոլ Փաշինյանը` որդու` Աշոտիկի հետ, իսկ հետո ներս մտան նաեւ ընտանիքի մյուս անդամները` Աննա Հակոբյանը, աղջիկները եւ աներձագը: Իրենք նստեցին ներքեւի սրահում, որտեղ այդ օրը համերգ էր լինելու: Ես ուզում էի ներկա գտնվել այդ համերգին ու երկար մտածում էի` արժե՞ մնալ, թե` ոչ, որովհետեւ Նիկոլ Փաշինյանի ներկայությունն իմ վրա ազդում է, նույն օդը չեմ կարողանում շնչել, ինչ ինքն է շնչում: Բայց քանի որ ես իմ աշխատանքը հատուկ այնպես էի կազմակերպել, որ այդ օրը ազատ լինեմ եւ մասնակցեմ համերգին, որոշեցի մնալ եւ ինքս ինձ ասացի` նա իմ պլանները չի փոխելու: Իսկապես շատ լավ համերգ էր: Եվ երբ արդեն վերջացրել էին իրենց խրախճանքը` Աննա Հակոբյանի ծննդյան կապակցությամբ, այնպես եղավ, որ հենց իմ սեղանի կողքով էր անցնում Նիկոլ Փաշինյանը: Սկսեցի վանկարկել` «Արցա՛խ, Արցա՛խ, Արցա՛խ»: Ինքն իհարկե  շատ վատ ընդունեց այդ փաստը, կանգնեց մի քանի վայրկյան, ինձ նայեց, ուզում էր պատասխանել, բայց չկարողացավ որեւէ բան ասել: Այստեղ հատկանշականն այն է, որ ես չասացի` «դավաճան», «սյունյաց ողջույն» չտվեցի, չասացի` թուրք, բոլորիս էլ պարզ է, որ նա այդ խոսքերից չի նեղվում: Մինչդեռ պարզվեց` «Արցախ» բառից շատ լավ էլ նեղվում է: Իմ այս արարքով մի փոքր սփոփվեցի` այն պարզ պատճառով, որ ցույց տվեցի` որտեղ էլ գնա ինչ-որ մի Հակոբ կամ ոչ Հակոբ լինելու է, որ իրեն հիշեցնի` մենք պահանջատեր ենք, չենք հանձնվում, Արցախին էլ տեր ենք: Այդքանով պետք է սահմանափակվեր այս պատմությունը, բայց, ցավոք, ուրիշ ուղղությամբ գնաց` մի աշխատողի պատճառով:

— Մամուլում անմիջապես տարածվեցին լուրեր, որ «Արցախ» ասելու համար` Ձեզ ազատել են աշխատանքից: Ի՞նչ կասեք այս մասին:

— «Արցախ» բառից Հայաստանում ոչ ոք չի նեղվում, ընդամենը նեղվում է մի խումբ, որը Նիկոլ Փաշինյանն է ու իրեն շրջապատած անձինք: Անտարբերներ կան, բայց նեղվողներ այդ բառից չկան: Իրականում խնդիրը մի աշխատողի հետ էր, որն, այսպես ասած, քաղաքականությամբ չի զբաղվում: Նա զուտ դիտարկել էր կատարվածը, թե դրանով հաճախորդին նեղացրել եմ: Իր համար կապ չուներ, թե այդ հաճախորդն ով է, երեւի, տեղյակ էլ չէ, թե ինչ է կատարվում մեր շուրջ, տեղյակ չէ, որ ցեղասպանվում ու հայրենազրկվում ենք: Նա ուղղակի մտածում էր, թե ես` որպես իրենց աշխատակից, նեղացրել եմ հաճախորդին եւ, համապատասխանաբար, պետք է ինձ աշխատանքից ազատել:

— Բայց չէ՞ որ Դուք այդ պահին եւս հաճախորդ էիք, որովհետեւ միջադեպը տեղի է ունեցել ոչ Ձեր աշխատանքի ընթացքում:

— Ամեն դեպքում, ներկայացնում եմ այդ օբյեկտը, եւ նա այդ պահին որոշել էր, որ աշխատանքից պետք է ինձ ազատի: Ես շտապեցի գրառում անել այդ մասին սոցցանցում, որը կարծում եմ` իմ կողմից սխալ էր: Պետք է մի քիչ համբերատար լինել, որովհետեւ երբ տնօրինությունը եւ սեփականատերն իմացան տեղի ունեցածի մասին, անմիջապես ասացին, որ ես աշխատանքից չեմ ազատվել, թյուրիմացություն է տեղի ունեցել, վերադառնամ իմ սովորական աշխատանքին:

— Փաստորեն, հիմա շարունակո՞ւմ եք աշխատել նույն օբյեկտում:

— Քանի որ ձմեռվա շրջան է, եւ հանրային սննդի կետերում գործն այդքան էլ շատ չէ, փորձում ենք մեր արձակուրդներն այդ ժամանակահատվածում վերցնենք: Իսկ սա հարմար պահ էր, որպեսզի ես մեկ շաբաթ արձակուրդ վերցնեի, որից հետո շարունակելու եմ իմ աշխատանքը:

— Այդուհանդերձ, վստա՞հ եք, որ աշխատանքի վերադառնալու հետ կապված խնդիր չի լինի:

— Չեմ կարծում, թե աշխատանքի հետ կապված խնդիր կլինի: Հնարավոր է` ճնշումներ լինեն իշխանությունների կողմից, թե` Հակոբը պետք է աշխատանքից ազատվի, բայց սեփականատիրոջ կամքին հավատում եմ, որ չի ենթարկվի ճնշումների: Ամեն դեպքում, եթե նույնիսկ ենթարկվեն ճնշումների, պատրաստ եմ դիմում գրել եւ դուրս գալ, որովհետեւ արդեն վեց տարի է` այս կռվի մեջ եմ, առաջին անգամ չէ, որ աշխատանքից ազատում են:

— Աշխատանքից ազատում են քաղաքական հայացքների համա՞ր…

— Զանգում են, վախեցնում, թե հանեք Հակոբին գործից, այլապես խնդիրներ կունենաք: Այդպիսի դեպքեր շատ են եղել ինձ հետ, խնդիր չկա կդիմանանք: Ինձ համար կարեւորն այն է, որ Նիկոլը երբեք չմտածի, որ կարող է Արցախը հանձնի, ու ոչ ոք իրեն բան չասի: Որտեղ էլ գնա, առնվազն մի հոգի պետք է հիշեցնի իրեն, թե ով է ինքը: Ի դեպ, «Դառգետ»-ում ովքեր ներկա էին այդ ժամանակ, Փաշինյանների գնալուց հետո մոտեցան ինձ, շնորհակալություն հայտնեցին եւ ասացին, որ իրենց փոխարեն էլ ես արեցի այն, ինչ պետք էր: Սա ցույց է տալիս, որ հասարակության մեջ կա այն գիտակցումը, որ մենք Նիկոլի հետ գնում ենք դեպի կործանում:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝