Պարույր Սեւակի դիմանկարով գուլպաներ արտադրողների դեմ իրավական գործընթաց է սկսվել

«Իրավունքը» զրուցել է Պարույր Սեւակի թոռան՝ բանասիրական գիտությունների թեկնածու, գրականագետ, «Պարույր Սեւակի տուն-թանգարան» ՊՈԱԿ-ի տնօրեն ՍԵՎԱԿ ՂԱԶԱՐՅԱՆԻ հետ:

- Համացանցում հայտնվեցին լուսանկարներ, որ գուլպաների, շապիկների վրա հայտնվել են Սեւակի դիմանկարները, նրա տողերից մեջբերումներ: Դուք այս խնդրին ինչպե՞ս եք վերաբերվում:

- Ես դրան բացասաբար եմ վերաբերվում: Միայն այն դեպքում դեմ չեմ լինի, երբ դա արվի ճաշակով: Մարդու դեմքը, գիրը, իր խոսքը դնել գուլպաների վրա, ես դա ընդհանրապես չեմ հասկանում: Եթե այդպես շարունակվի, վաղը մյուս օրը կարող է  որոշեն ներքնաշորերի վրա էլ դնել: Ես կոնկրետ Ձեր այդ մատնանշած հարցով դիմել եմ իմ իրավաբանին, որն արդեն զբաղվում է այդ հարցով:

- Դուք ասում եք՝ կընդունեք, եթե դա ճաշակով է արվում, բայց այդ դեպքում չէ՞ որ հեղինակային իրավունքների խախտում է: Նրանք պետք է նախապես ժառանգներից թույլտվություն վերցնեն եւ դրանով անակնկալի չբերեն:

- Իհարկե, միանշանակ: Դեպքեր եղել են, որ մեզ դիմել են, համագործակցել ենք, բայց մեծ մասամբ շատերը առանց թույլտվության, ինքնուրույն, առանց խորհրդակցելու են դա անում: Այստեղ խնդիրը միայն նույնիսկ թույլտվությունը չէ, այլ այն, որ անում են մի գործ, որը շատ անճաշակ ու գռեհիկ է: Ես չեմ կարծում, որ դրանից նրանք շահույթ կստանան: Ես չգիտեմ՝ քանի՞ մարդ կգնա եւ կգնի այդ գուլպաները: Ես, համենայն դեպս, երբեք չեմ գնի Համո Սահյանի, Եղիշե Չարենցի կամ մեկ այլ գրողի դեմքով գուլպա: Եվ գտնում եմ, որ այսպիսի դեպքերում նրանք պետք է նաեւ իրավական համապատասխան պատասխանատվության ենթարկվեն, որ մյուսներին դաս լինի, որպեսզի հաջորդ անգամ որեւէ մեկը նման բան անելուց առաջ մտածի եւ հիշի, որ կարող է պատժվել:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝