Յուրաքանչյուրս պետք է գիտակցենք, որ մեր ցանկացած պիտակավորում բանակին՝ թուլացնում է զինվորին.Հովհաննես սարկավագ Ավետիսյան

 «Բանակը մեր հասարակության հիմնասյունն է, երկրի և ժողովրդի  պաշտպանն ու ապավենը։ Յուրաքանչյուր զինծառայող, ինչպես եւ Աստծու յուրաքանչյուր արարած բացառիկ եւ յուրահատուկ դեր ու նշանակություն ունի ինչպես հասարակության մեջ, այնպես էլ զորամասերում: Օրվա բազմազանությունն ապահովում են հենց իրենք՝ զինծառայողները՝ իրենց բազմաթիվ հարցերով, խնդիրներով ու առաջարկություններով։ Ես որպես զինվորների հետ ամենօրյա շփվող անձ, կարող եմ փաստել մեր զինվորների ոգին ամուր է, կամքը՝ աներեր։ 90-ականներին էլ են նույն տղերքը․ 2016, 2020թվականներին էլ եւ հիմա էլ նույնն են» -անդրադառնալով Հայոց բանակի կազմավորման 32-րդ տարեդարձին եւ հայ զինվորի մարտական ոգուն, «Իրավունքի» հետ զրույցում ասաց զինվորների հետ առօրյան կիսող ՀՀ ՊՆ N զորամասի գնդերեց Հովհաննես սարկավագ Ավետիսյանը, միեւնույն ժամանակ ընդգծելով․

-Բանակը միայն զինվորը չէ բանակը նաեւ թիկունքային ապահովումն է, իսկ ՀՀ յուրաքանչյուր քաղաքացի հանդիսանում է մեր զինվորի թիկունքը։ Ասածս հետեւյալն է, որ  թիկունքից հնչող ցանկացած անվստահություն ուղիղ ազդեցություն է թողնում դիրքում կանգնած հայ զինվորի վրա։ Յուրաքանչյուրս պետք է գիտակցենք, որ մեր ցանկացած անվստահություն, պիտակավորումը բանակին՝ թուլացնում է Հայ զինվորին, մենք իրավունք չունենք այսօր զինվորին մենակ թողնելու, այն զինվորը, ով գիտակցում է, որ իր թիկունքը ամուր է՝ քառակի անգամ ուժեղանում է, պատրաստ լինելով ցանկացած քաջագործության։

Պողոս Առաքյալը Կորնթացիներին ողղված իր առաջին նամակում ասում է․ «Թանկ գնով գնվեցիք, մարդկանց ծառաներ չլինեք»։ Այս խոսքը, երբ Պողոս Առաքյալը գրում էր, անշուշտ, նկատի ուներ Հիսուս Քրիստոսի թափված արյունը։ Ազգային իմաստով, սակայն, այս խոսքն ունի հետեւյալ նշանակությունը․ մեզանից յուրաքանչյուրի կյանքը գնվել է մեր զինվորիների թափված արյունով, ու երբ մեզանից յուրաքանչյուրը այդ բարձր գիտակցությունը ունենա, որ իր կյանքը արժեցել է մի նահատակված զինվորի կյանք, ինքն իր կյանքը չի ավիրի, չի թողնի ինքնահոսի, այլ այնպես կապրի, որ արժանի լինի այդ թափված արյանը։ Հայոց բանակում տղերքը ծառայում են այդ բարձր գիտակցությամբ, որ այդ համազգետը կրելու իրավունքն ու սուրբ պարտականությունը գնվել է մեր եղբայրների թափված արյունով, հանուն որոնց պետք է սրբորեն կատարեն իրենց պարտքը հայրենիքի նկատմամբ։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝