Ամեն ինչ անում են, որպեսզի ազատվեն ռուսական սահմանապահ զորքերից. Գագիկ Հարությունյան

«Իրավունքի» զրուցակիցն է «Ուժեղ Հայաստան Ռուսաստանի հետ. հանուն նոր Միության» շարժման վերլուծական-քաղաքագիտական հանձնախմբի ղեկավար, Ցանցային հետազոտությունների ինստիտուտի տնօրեն, քաղաքագետ ԳԱԳԻԿ ՀԱՐՈՒԹՅՈՒՆՅԱՆԸ:

«ՆԵՐԿԱ ԻՇԽԱՆՈՒԹՅԱՆ ՀԻՄՆԱԿԱՆ ՆՊԱՏԱԿԸ` ՌՈՒՍԱՍՏԱՆԻ ԴԵՄ ՊԱՅՔԱՐՆ է»

— Նիկոլ Փաշինյանն ասել է, որ Հայաստանը պատրաստ է ճանապարհ տրամադրել Ադրբեջանին՝ այն պայմաններով, որով պատրաստ է Իրանը: Ի՞նչ պատկեր առաջիկայում կունենանք այս առումով:

— Անիմաստ է Փաշինյանի խոսքերը վերլուծել, որովհետեւ ամեն ինչի տակ դրված են այն առաջադրանքները, որոնք նա կատարում է սրբորեն, եւ որը տալիս են իրեն իր տերերը: Պետք է հիշենք մի բան, որ այսօր աշխարհը գտնվում է բավականին քաոտիկ վիճակում: Ժամանակին ինձ հետ վիճում էին, երբ ասում էի՝ սա Երրորդ համաշխարհային պատերազմ է, բայց հիմա ավելի վատ է վիճակը, քան Երրորդ համաշխարհային պատերազմն է, որովհետեւ շարունակվում են քաոտիկ ու անհասկանալի գործողությունները: Սա Փաշինյանի հերթական ֆոկուսն է, ինչ էլ ասել է, ոչինչ չի նշանակում: Ի դեպ, շատ ճիշտ նկատեց ՌԴ ԱԳ նախարար Սերգեյ Լավրովը, որ դրա մասին դեռեւս քննարկվել էր 2020թ.-ին, որի որոշումն այն է, որ այս խնդիրները հետամուտ լինեն ռուսական խաղաղապահ զորքերի կողմից, որոնք, չգիտես ինչու, չեն ուզում կատարել ներկա իշխանությունները: Ու շատ լավ հասկանալի է, թե ինչու չեն ուզում, սա իրենց ձեռնտու չէ, նրանց հիմնական նպատակը` Ռուսաստանի դեմ պայքարն է, ինչն էլ անում են:

— ՌԴ ԱԳ նախարար Սերգեյ Լավրովը նաեւ նշել էր, թե Հայաստանը չի ցանկանում ռուս խաղաղապահների տեղակայումը Սյունիքի մարզով անցնող ճանապարհին, չնայած որ սա ուղղակիորեն ստորագրված է Փաշինյանի կողմից: Ի՞նչ կասեք այս մասին:

— Այո, ու ոչ միայն Սյունիքը, ընդհանրապես նրանք ամեն ինչ անում են, որպեսզի ազատվեն ռուսական սահմանապահ զորքերից, որպեսզի Հայաստանը կարողանան հանգիստ հանձնել թուրք-ադրբեջանական կոալիցիային:

«ՎՍՏԱՀ ԵՄ՝ ՏԵՍԱՆԵԼԻ ԱՊԱԳԱՅՈՒՄ ՌՈՒՍՆԵՐԸ ՀԱՂԹԱԾ ԵՆ ԴՈՒՐՍ ԳԱԼՈՒ»

— Բայց որքանո՞վ կհաջողեն, արդյոք հանգուցալուծումը կապված է ռուս-ուկրաինական պատերազմի կուլմինացիայից:

— Ես հույս ունեմ, որ դա չի ստացվելու, որովհետեւ կա պատմություն, որը հուշում է, թե ինչպես են զարգանում քաղաքական խնդիրները: Ռուսաստանը միակ երկիրն է, որը 12 անգամից ավել պատերազմ է մղել թուրքերի դեմ: Ադրբեջանցիները հանդիսանում են թուրքերի «կծան շունը», ինչպես թուրքերն են հանդիսանում ամբողջ Արեւմուտքի համար չղեկավարվող «կծան շուն», նույն ձեւով այդ դերը այսօր կատարում է Ադրբեջանը: Այն հատուկ ռազմական գործողությունները, որոնք կատարվում են Ուկրաինայում, դրանք ունեն իրենց վերջը, այսինքն՝ տեսանելի ապագայում ռուսները հաղթած են դուրս գալու, հիմա էլ հաղթում են, շատ ծանր վիճակ է ուկրաինական բանակում: Ռուսաստանի շնորհիվ է, որ Հայաստանը որոշակի հաջողությունների է հասել մշակույթում, գիտության մեջ, եւ մեր նոր պատմությունը հենված է ռուսական միացյալ քաղաքակրթական կապի հետ: Ես մշտապես հանդես եմ եկել, այսպես կոչված, հայ-ռուսական համագործակցության մեջ, որին շատ կողմնակից եմ, դա է, որ քաղաքակրթական կապը ամրացնում է: Համոզված եմ, որ եկող տարի ռուս-ուկրաինական պատերազմի մասին կխոսենք անցյալ ժամանակով, ուկրաինական կողմն արդեն այն իրավիճակի մեջ է, որ երկար չի դիմակայի: Ռուսաստանի՝ Ուկրաինայի նկատմամբ հաղթանակը անխուսափելի է, եւ այդ ժամանակ կզբաղվեն արդեն Հարավային Կովկասի գործերով, որտեղ խայտառակ վիճակ է տիրում:

— Ադրբեջանի նախագահ Ալիեւը բացահայտ ասում է՝ ներկայիս Հայաստանը մեր հողն է, նրանք, այսինքն՝ մենք, երբեք պետություն չենք ունեցել Հարավային Կովկասում: Ո՞րն է կամ ո՞րը պետք է լիներ Հայաստանի համահունչ պատասխանը, որին այդպես էլ մնացինք կարոտ:

— Կարծում եմ, որ ներկա իշխանությունների ու ԱԳՆ-ի կողմից դա շատ ցանկալի մոտեցում է, որը ցույց է տալիս Ադրբեջանը: Այդ ժամանակ ոչ մի պրոբլեմ չեն ունենա, ամեն ինչ կհանձնեն՝ կպրծնեն, իրենց գործն է ամեն ինչին համաձայնվելը, որն իրենք փայլուն կատարում են: Ամեն ինչ կատարվում է հայ կոչվող կառավարիչների կիսագրագիտության կամ անգրագիտության շնորհիվ, դրա համար էլ իրենց են ընտրել, որ այսպիսին լինեն: Չէ՞ որ նրանք հեշտ են կառավարվում: Այնպես որ, դա լրիվ համընկնում է իրենց ցանկություններին, միայն թե իրենց չկպնեն, չգնդակահարեն, բայց, մեկ է, դա լինելու է, թեկուզ թուրքերն իրենց գնդակահարելու են, որովհետեւ իրենց պետք չեն վկաներ:

Ս. ԱՍԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝