Գնում ենք ինքնասպանության, ոչնչացման եւ մեղադրում բոլորին` բացի մեզնից. Արթուր Վարդանյան

«Իրավունք TV»-ի տաղավարում զրուցել ենք «Համահայկական ազգային պետականություն» կուսակցության նախագահ ԱՐԹՈՒՐ ՎԱՐԴԱՆՅԱՆԻ հետ:

«ԴՈՒՔ ՁԵՐ ՇԱՀԸ ՉԵՔ ՊԱՇՏՊԱՆՈՒՄ, ՍԵՐԳԵՅ ԼԱՎՐՈՎԸ ՁԵՐ ՇԱՀՆ ԻՆՉՊԵ՞Ս ՊԱՇՏՊԱՆԻ»

— ՌԴ ԱԳ նախարար Սերգեյ Լավրովն անդրադարձավ Հայաստանի եւ Ադրբեջանի միջեւ ստեղծված իրավիճակին, հիշեցրեց, թե ինչ է ասված 2020 թ. նոյեմբերի 9-ի եռակողմ հայտարարության մեջ եւ ընդգծեց, որ տրամաբանություն չի տեսնում ՀՀ Նիկոլ Փաշինյանի` հայկական տարածքով Նախիջեւան տարանցումը բացելու մասին հայտարարություններում: Ի՞նչ կասեք այս մասին:

— Մեր ժողովուրդն անընդհատ քննարկում է, թե մեզ ռուսը ծախեց, Արեւմուտքը` ծախեց, Շառլ Միշելն այսպիսի հայտարարություն արեց, հետո Սերգեյ Լավրովը` այնպիսի: Ամենամեծ խնդիրն այն է, որ ուզում ենք օտարը` լինի դաշնակից, թե` ոչ, մեզնից ավելի հայ լինի, գա եւ մեզ համար կռվի` կլինի ռուս, ֆրանսիացի, իրանցի, թե ամերիկացի զինվոր, բայց մենք չենք ուզում ինքներս մեզ համար կռվել: Հաճախ խոսում են արեւմտամետ կամ ռուսամետ լինելուց, բայց քաղաքական դաշտում գոյութուն ունի ազգային պետական շահ: Ինչպե՞ս կարող է Ռուսաստանը կամ ԱՄՆ-ն իրենց պետական շահերը զոհաբերեն հանուն մեզ, իսկ մենք տանը նստած, սոցցանցերով ասենք` ապրե՛ք: Այդպես չի լինելու երբե՛ք: Հիշո՞ւմ եք, տարիներ առաջ 70-ից ավել սակրավորներ գնացին Սիրիա, որպեսզի օգնեն բարեկամ պետությանը` տեղի հայկական բնակավայրերում, տասնյակ հազարավոր մարդիկ գոռում-գոչում էին, թե մենք առանց այն էլ քիչ զորք ունենք, մի հատ էլ ուղարկում եք` Սիրիայում ինչ-որ բաներ անելու: Ընդ որում` շեշտում եմ` խոսքը հայ համայնքին պաշտպանելու մասին էր, մինչդեռ հիմա ուզում ենք, որ օտար երկրներից, ասենք, չինացին գա ու կռվի թուրքի եւ ադրբեջանցու դեմ: Այսքանից հետո, երբ դուք ձեր շահը չեք պաշտպանում, Սերգեյ Լավրովը ձեր շահն ինչպե՞ս պաշտպանի: Մարդը, երբ կանգնած է կամուրջին եւ պատրաստ է ինքնասպան լինել, դու ինչ ուզում ես արա, եթե անգամ ուժով կարողանաս հետ պահել, մեկ-երկու օր էլ անցնի, երրորդ օրն ինքնասպան է լինելու: Մենք գնում ենք ինքնասպանության, ոչնչացման եւ մեղադրում ենք բոլորին` բացի մեզնից: Ովքե՞ր են մեղավոր այս իրավիճակի համար, դավաճաննե՞րը, թե՞ մենք, որ անպատիժ ենք թողել նրանց: Երկիրը ծախողներն ու թալանողնե՞րն են մեղավոր, թե` մենք, որ աչք ենք փակել եւ երկու կոպեկի համար ոչինչ չենք արել:

«ԿՈՄԻՏԵ ԿՈՉՎԱԾԸ ՋՈՒՐ ԼՑՐԵՑ ԻՇԽԱՆՈՒԹՅԱՆ ՋՐԱՂԱՑԻՆ ԵՎ ՑՐԵՑ ՑՈՒՅՑԵՐԸ»

— Արցախը, երբ կանգնած էր ցեղասպանության առաջ, ժողովուրդը ոտքի կանգնեց, դուրս եկավ փողոց, եղան հանրահավաքներ, բայց այս ամենը տեւեց ընդամենը մի քանի օր, ինչին հաջորդեց տոտալ լռությունն ու անտարբերությունն առ այսօր: Ինչո՞ւ:

— Վերջին հանրահավաքի ժամանակ 75 հազար մարդ էր դուրս եկել փողոց: Սա ավելին էր, քան 2018 թվականին Նիկոլ Փաշինյանի սկզբնական ցույցերը: Ես ներկա էի այդ 75 հազարանոց հանրահավաքին հրապարակում ու հասկացա, որ կոմիտե կոչվածը, որը եկավ եւ կանգնեց բեմում ու ժողովրդին ուղարկեց տուն, ավելի շուտ ուղարկված էին: Նրանք ջուր լցրին իշխանության ջրաղացին, նույն իշխանությունը կերազեր այդպես ցույց ցրել: Միգուցե, նրանք անուղղակի են դա արել կամ, ինչու ոչ, նաեւ ուղղակիորեն, բայց նրանք դա արեցին: Սա նշանակում է, որ կա՛մ նրանք ծրագիր չունեին` իշխանափոխություն իրականացնելու, կա՛մ դիտավորյալ արեցին, որպեսզի ցրվի ցույցը` հասկանալով, որ այդ տեսակի ծավալի հանրահավաքները կարող են թիմային ձեւով իշխանափոխություն իրականացնել, եւ Հայաստանում կարող են ձեւավորվել նոր քաղաքական ուժեր եւ անձինք, ինչից հետո բեմահարթակում կանգնած մարդիկ կարող են դուրս մնալ: Ինչո՞ւ ներկայիս Ազգային ժողովում ընդդիմություն կոչվածը իր մանդատները վայր չի դնում: Ասում են` ոչինչ դրանից չի փոխվի, բայց չէ՞ որ եթե դուք մանդատները վայր դնեք, Հայաստանում տեղի կունենա քաղաքական ճգնաժամ, եւ Նիկոլ Փաշինյանը ստիպված է կլինի գնալ արտահերթ ընտրությունների ու հրաժարական տալ:

— Եվ ի՞նչ, գնալ Նիկոլ Փաշինյանի կազմակերպած արտահերթ ընտրությունների, որտեղ իր ԿԸՀ-ն կապահովի նրա եւս մեկ անգամ վերընտրվե՞լը:

— Սա արդեն էական չէ: Նույն ընդդիմությունը կարող է չհամաձայնել գնալ արտահերթ ընտրությունների, հանրահավաքներ իրականացնել եւ միանշանակ ստիպել, որպեսզի իշխանությունները որոշում կայացնեն հանձնել իշխանությունը: Եվ սա շատ հնարավոր է քաղաքական տեսակետից:

— Բայց նկատի ունեցեք, որ այս դեպքում կգտնվեն իշխանության գրպանային քաղաքական ուժեր, որոնք կմասնակցեն ընտրություններին ու կլեգիտիմացնեն վերընտրվող իշխանությանը:

— Հարցը դա չէ: Եթե դու կոլապսի ես ենթարկում քաղաքական դաշտը եւ ամբողջ պետությունը, մանդատները վայր ես դնում եւ պարալիզացնում ես երթեւեկությունը, էլ ի՞նչ արտահերթ ընտրության մասին կարող է խոսք լինել: Պարզապես, չեն կարողանա իրականացնել:

«ՌՈՒՍ-ՈՒԿՐԱԻՆԱԿԱՆ ՀԱԿԱՄԱՐՏՈՒԹՅՈՒՆՆ ԱՎԱՐՏՎԱԾ Է, ՌԴ-Ն ՀԱՂԹԵԼ Է»

— Ամեն դեպքում, համաձայնեք, որ 2018-ից հետո իշխանափոխության որեւէ փորձ չհաջողվեց: Հետեւապես, ի՞նչ հույսեր կարելի է ունենալ արտաքին ազդակներից: Աշխարհաքաղաքական առումով բավական վճռորոշ տարի է` ընտրություններ են ԱՄՆ-ում եւ ՌԴ-ում, առկա պատերազմները բեկումնային փուլ են մտնում:

— Ռուսաստանում պատերազմը մոտ է ավարտին: Ինչքան էլ հիմա ասեն, որ այդպես չէ, Զելենսկին արդեն սպառված քաղաքական գործիչ է Ուկրաինայում: Այնտեղ արդեն բացահայտ խոսվում է պետական հեղաշրջման մասին, քանի որ վերջինս հրաժարվեց գնալ ընտրությունների: Կապիկների մոտ այդպես է, խոսում են «ժողովրդավարություն»-ից, «լեգիտիմություն»-ից, բայց հենց գալիս է պահը, որ պետք է գնան ընտրությունների, այդ «լեգիտիմությունը», «ժողովրդավարությունը» մի կողմ են դնում եւ դառնում են իրենցից ոչինչ չներկայացնող փոքրիկ բռնապետիկներ: Ռուս-ուկրաինական հակամարտությունն ավարտված է, Ռուսաստանը հաղթել է այս պատերազմում: Իսկ ԱՄՆ-ում Դոնալդ Թրամփը գալու է իշխանության, որովհետեւ Միացյալ Նահանգների արդարացումը, ի պաշտպանություն Ուկրաինայի, լինելու է նրան ընտրելը: Տեղի է ունենալու այն, որ Թրամփը մեղադրելու է նախկիններին, ինչպես այսօր կատարվում է Հայաստանում, նշանակելու են մեղավորներ, քրեական գործեր են հարուցվելու, հանձնաժողովներ են ստեղծվելու եւ այլն: Արդյունքում ԱՄՆ-ն կվերականգնի իր հարաբերությունները Ռուսաստանի հետ, որտեղ միանշանակ վերընտրվելու է Վլադիմիր Պուտինը: 3 տարի հետո նա կգնա թոշակի եւ կնշանակի իրեն փոխարինողին, իսկ Ռուսաստանը կմնա անսասան: Ռուս-ուկրաինական հակամարտությունից հետո Ռուսաստանն իր ուշադրությունը սեւեռելու է այս տարածաշրջանի վրա, չնայած` արդեն սկսել է: Իսկ այստեղ Ռուսաստանն ունի մեկ դաշնակից, որին երբեք մենակ չի թողնի, դա Իրանն է: Սակայն Իրանի դեմ պատերազմը սարերի հետեւում չէ:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝