ՃԱՆՃԵՐԸ ԻՇԽԱՆՈՒԹՅԱՆ ՄԵՋ ԵՎ ԴՐԱՆԻՑ ԴՈՒՐՍ

Նկատե՞լ եք`ինչքան ավելի երկար է Նիկոլը զբաղեցնում երկրի վարչապետի աթոռը, այնքան քիչ է  ֆեյսբուքով ասում «ժողովուրդ սիրում եմ ձեզ, հպարտանում եմ ձեզանով…» եւ այլն: Ժողովրդի  դյուրահավատ  եւ մտածելու  թույլ կարողություններով օժտված մասի համար այդ բառերը հնչեցվում էին  իշխանությունը զավթելու  եւ ընտրություններում ձայներ ստանալու համար: Թե ինչքանով է Նիկոլը սիրում ժողովրդին պարզ է դառնում, երբ նայում ես այդ խեղճ ու կրակ ժողովրդի առօրիային` մեծ մասը  ամփող, կիսասոված, շատերը անտուն ու անգործ եւ արդյունքում  Հայաստանից փախչող տասնյակ հազարավոր մարդիկ` ուր որ հնարավոր է` կլինի դա Ռուսաստան, թե Եվրոպա, թե Մեքսիակայով, որպեսզի հետո հանձնվեն ԱՄՆ-ին:

ԹԵՆԻՍ ԹԵ՞ ՊԻՆԳ-ՊՈՆԳ

Նիկոլի թիմի իրական  վերաբերմունքը ժողովրդին  ամենացայտուն կերպով ներկայացրեց  կիաստ-պռատ քաղաքապետ ընտրված Տիգրան Ավինյանը, որը օրերս խոսելով Օղակաձեւ այգու  մեջ թենիսի ակումբը քանդելու թեմայի շուրջ ուղղակիորեն ժողովրդին համեմատեց ճանճերի հետ` «բոլոր մնացածներին, ովքեր ճանճերի նման հավաքվել էին այս թեմայի շուրջ, որպեսզի որոշակի փոքրիկ քաղաքական դիվիդնետներ շահերին, չի ստացվելու»: Այսինքն, երբ մարդիկ անհանգստացած են իրենց իսկ մայրաքաղաքում սպորտային  կարեւոր  հաստատության, այն է` թենիսի կորտերի ապագայով, Ավինյանի ու ընդհանրապես` ՔՊ-ականների աչքերում նմանվում են ճանճերի, իսկ նրանց անհանգստությունը քաղաքական դիվիդենտ շահելու նապատակ ունի: Ապշեչուցիչ է, որ քաղաքացիական  հասարակություն իբր թե ստեղծող եւ այդ  իսկ պատճառով «Քաղաքացիական պայմանագիր» կոչվող կուսակցությունը  նորմալ քաղաքացիական դիրքրոշումը եւ այն արտահատող քաղաքացիներին այսքան գռեհիկ կերպով է գնահատում:

Իհարկե, հարց է ծագում, եթե իսկապես Ավինյան Տիգրանը որոշել է Օղակաձեւ այգին վերականգնել որպես հանրային այգի, արդյո՞ք այդտեղից կմաքրի, օրինակ` Գռզոյին պատկանող հսկայական շինությունները: Եվ արդյո՞ք այլ ռեստորաններ, հյուրանոցներ ու ակումբներ, որոնք  զբաղեցնում են Օղակաձեւ այգու  մեծ մասը  իսկապես քանդվելու են: Դժվար է հավատալ, որ  Ավինյանի «պլոճիկը» այդքան կա:

Ինչ վերաբերում է  թենիսի կորտերից քաղաքական դիվիդնետ  հանելու  մտքին, ապա գուցե Ավինյանի սլաքները  ուղղվում են  ԱԺ «Հայաստան» դաշինքին, որի ներկայացուցիչները այդ հարցը բարձրացրեցին Նիկոլի առաջ հարց ու պատասխանի ժամանակ: Սակայն այստեղ «Հայաստան» դաշինքը ավելի շատ կորցրեց դիվիդենտ, քան ստացավ, քանի որ Նիկոլը հարցը վերահասցեագրեց  հենց  քոչարյանական խմբակցությանը նշելով, որ այդ խմբակցության պատգամավորների մեջ պետք է փնտրել, թե ինչպես եղավ, որ պետական  բազմամիլիարդանոց  գույքը  առանց մեկ դրամ պետության գանձարան մուծելը անցավ  «Հայաստան» դաշինքի խմբակցության մեջ հայտնված պատգամավորի տնօրինման տակ: Հետաքրքիր է, որ «Հայաստան» խմբակցությունը այդպես էլ  ո՛չ հերքեց Նիկոլի մեղադրանքը, ո՛չ էլ արձագանքեց դրան: Արդյո՞ք դա ընդդիմության այսպիսի պասիվ կեցվածքը Նիկոլի ասածների  հաստատուման վկայությունն է եւ իրոք  քոչարյանական պատգամավորներից մեկը ժամանակին ճարպիկորեն օգտվել է Քոչարյանի հետ իր կապերից:

ԹԱՎՇՅԱ ՍԱՀՄԱՆԱԴՐԱՓՈԽՈՒԹՅՈՒՆ

Իսկ Նիկոլի վիճակը գնալով ավելի խոցելի է դառնում: Ադրբեւանի հետ փոխհարաբերությունները ոչ մի կերպ  չեն բարելավվում: Նիկոլը ընկած երկու կրակների արանքը` Արեւմուտքի եւ Ռուսաստանի, վերջնականապես խճճվել  իր արտաքին քաղաքականության մեջ: Թուրքերին եւ ադրբեջանցիներին անդադար զիջումները  առաջ են բերում թուրք-ադրբեջանական նորանոր պահանջներ: Այդ պահանջները  չեն սահմանափակվում  անկլավներից հայկական ուժերի դուրսբերմամբ եւ Ալիեւին փոխանցմամբ: Նիկոլի առաջ պահանջ է դրվել նաեւ փոխել սահմասնադրությունը: Այս կապացությամբ հունվարի 18-ին նա  ունեցավ  շատ խճճված  մի ելույթ, որի հիմնական միտքը այն էր, որ  պետք է ոչ թե սահմանադրական փոփոխություններ անել, այլ նոր սահմադրություն ընդունել:

Մենք արդեն նախորոք գրել էինք, որ Նիկոլը դա անում է Արեւմուտքի,  Թուրքիայի եւ Ադրբեջանի պահանջով: Այսպես 2021թ. սեպտեմբերի 27-ին Ալիեւը հայտարարեց. «Հայաստանը պետք է մշակի եւ ընդունի  նոր սահմանադրություն»: Ահա այս հանձնարարականն է, որը Ալիեւը չի էլ թաքցրել այսօր կատարում է Նիկիոլը: Եվ այդ հանձնարարականի կատարմանն է անցել  իբր թե անկախ Հայաստանի  վարչապետի պաշտոնը զբաղեցնող անձը: Կարող է թվալ, թե Ադրբեջանին ինչ, թե ՀՀ սահմանադրության մեջ ինչ է գրված: Սական ոչ, Ադրբեջանի համար կարեւորագույն նշանակություն ունի, որ ըստ ՀՀ սահմանադրության Արցախը Հայաստանի անբաժանելի մասն է: Եվ հենց այդ կետն է, որ պահանջում է փոխել Ադրբեջանը:

Նիկոլը  սահմանադրական փոփոխությունների վերաբերյալ իր  չկապակցված  ու խրթին  մտքերը շարադրելիս  շեշտում է, թե սահմանադրության փոփոխությունը առնչվում է Հայաստանի արտաքին  անվտանգության  ապահովման հետ: Ավելին`« մենք պետք է ունենանք Սահմանադրություն, որը Հայաստանի Հանրապետությունն ավելի մրցունակ և ավելի կենսունակ է դարձնում աշխարհաքաղաքական և ռեգիոնալ նոր պայմաններում»,- հայտարարում է Նիկոլը: Թվում էր, թե նոր սահմանադրությամբ չէ, որ կլուծվեն արտաքին անվտանգության ու աշխարհաքաղաքական խնդիրները: Սակայն այստեղ  Նիկոլը բացահայտեց իր ծրագիրը` նախ  սիրաշահելով Ադրբեջանին եւ Թուրքիային մուրալ խաղաղություն եւ երկրորդը սիրաշահել Արեւմուտքին: Ահա այստեղ է, որ նոր սահմանադրություն է պետք, որպեսզի դրա մեջ Արեւմուտքի թելադրանքով Նիկոլը ավելացնի երեք կետ.

1. Հայաստանը հայտարարում է, որ  չեզոք պետություն է եւ որեւէ ռազմական դաշինքի մեջ չի մտնում: Այդ կետը ընդունելուց հետո  ՀՀ-ն դուրս է գալու ՀԱՊԿ-ից:
2. Հայաստանի տարածքում չպետք է լինեն օտարեկրյա զորքեր: Այս կետը ընդունելուց հետո ՌԴ սահմանապահները եւ ՌԴ ռազմական բազան դուրս են հանվելու ՀՀ տարածքից, Թուրքիայի հետ սահմանը դառնալու է թափանցիկ, իսկ Իրանի սահմանի վերահսկողությունը վերցնելու են ՆԱՏՕ-ական ուժերը:
3. Հայաստանը այլեւս չի հետապնդելու Ցեղասպանոթւյան միջազգային ճանաչման խնդիրը, որի դիմաց Թուրքիան  համաձայնվելու է Հայաստանի հետ ունենալ դիվանագիտական հարաբերություններ:

Որպես բոնուս Արեւմուտքին, ՀՀ սահմանադրությունից հանվելու է ընտանիքի այն ձեւակերպումը որտեղ նշված է, որ ընտանիքը դա կնոջ եւ տղամադրու միությունն է: Միասեռականների «ամուսնության» ճանապարհը  այդուհետ բացված է լինելու:

Իհարկե, այսպիսի նոր կետերով հանրաքվեն Նիկոլի համար անցկացնել բավականին բարդ խնդիր է: Նախ պետք կլինի ապահովել քվորում եւ բացի այդ պետք կլինի ապահովել կողմ ձայների մեծամասնություն: Այդ նպատակով է, որ Նիկոլի  քարոզչական խոսափողները  2024 թվականի  բյուջեով  ստացել են  ռեկորդային  մեծ գումարներ: Նրանց առջեւ խնդիր է դրված օրուգիշեր վարկաբեկել Ռուսաստանին եւ գովերգել Արեւմուտքը, Ֆրանսիան ու Թուրքիան:

Ահա այսպիսի  այսպիսի  զարգացումներով է հղի Նիկոլի թավշյա սահմանադրափոխությունը: Նահանջը շարունակվում է:

Ա. Հովհաննիսյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝