Քանի որ գաղափարական գիծը տանում է Վարդան Ղուկասյանը, մենք աջակցում ենք իրեն. Անուշ Գինոսյան

Վերջին օրերին ներքաղաքական դաշտում թիվ մեկ քննարկման թեման «Հանրային Ձայն» կուսակցության նախագահ Արտակ Գալստյանի եւ պատվավոր նախագահ Վարդան Ղուկասյանի միջեւ առկա տարաձայնություններն են: Թե ինչ հանգուցալուծում կունենա այն, թերեւս պարզ կդառնա այսօր կայանալիք համագումարին, որը հրավիրել է Վարդան Ղուկասյանը եւ որին դեմ է Արտակ Գալստյանը: Այս մասին «Իրավունք»-ը զրուցել է «Հանրային Ձայն» խմբակցության ավագանու անդամ, «Ալյանս» կուսակցության խորհրդի անդամ ԱՆՈՒՇ ԳԻՆՈՍՅԱՆԻ հետ:

— Թեպետ «Ալյանս» կուսակցության քվոտայով եք ընտրվել Երեւանի ավագանի, սակայն «Հանրային Ձայն» խմբակցության անդամ եք, եւ հետաքրքիր է Ձեր դիրքորոշումը այս քաղաքական ուժի ներսում առկա խնդիրների վերաբերյալ: Հնարավո՞ր է, որ այն բերի խմբակցության պառակտման:

— Այո, «Ալյանս» կուսակցության խորհրդի անդամ եմ, եւ դեռեւս անցած տարի մեր կուսակցությունը ստորագրել է փոխհամագործակցության հուշագիր՝ դաշինք կազմելու նպատակով Վարդան Ղուկասյանի նախաձեռնությամբ «Հանրային Ձայն» կուսակցության հետ։ Մեր կուսակցությունն ամբողջությամբ կիսում է Վարդան Ղուկասյանի ընդդիմադիր կուրսը, բովանդակությունը, ներկաների եւ նախկինների նկատմամբ միաժամանակյա քննադատությունը։ Մեր համագործակցությունը գաղափարական հունի մեջ է։ «Հանրային Ձայն»-ում տեղի ունեցող բոլոր պրոցեսների քննարկման համար նախեւառաջ պետք է հիմք ընդունեմ մեր գաղափարական գիծը, ովքեր այդ գծում չեն կամ երբեւէ կշեղվեն այդ գծից, ապա այդ մարդկանց հետ համագործակցելու ոչինչ չկա։ Քանի որ գաղափարական գիծը տանում է Վարդան Ղուկասյանը, հետեւաբար մենք աջակցում ենք իրեն:

— Այդուհանդերձ, Երեւանի ավագանու ընտրություններում Ձեր ցուցակը գլխավորող Արտակ Գալստյանը հայտարարում է, որ կուսակցության պատվավոր նախագահ Վարդան Ղուկասյանն այլեւս կապ չունի կուսակցության հետ, իսկ Վարդան Ղուկասյանը պնդում է ճիշտ հակառակը: Այս իրավիճակում ո՞ւմ գործընկերն եք շարունակելու մնալ Դուք:

— Ինչպես նշեցի, ես գաղափարական անձնավորություն եմ, եւ մենք կանք, մնում ենք եւ լինելու ենք մեր գաղափարական գործընկերների, տվյալ դեպքում՝ գործընկերոջ կողմնակիցը։ Ամբողջությամբ աջակցելու եւ սատարելու ենք։ Որեւէ այլ քննարկում լինել չի կարող:

— «Հանրային Ձայն» խմբակցությունը հայտարարությամբ հանդես եկավ: Այդ հայտարարության կոնտեքստից կարելի՞ է ասել, որ ավագանու անդամներն անուղղակի ակնարկում են, որ կապ չունեն Արտակ Գալստյանի հայտարարությունների եւ որոշումների հետ:

— Յուրաքանչյուր ոք նախեւառաջ իր խղճի, համոզմունքի, գաղափարական եւ քաղաքական տեսակետների շրջանակներում է գործում եւ պատասխանատու է նաեւ ըստ այդմ հանրության առաջ։ Կարեւոր է, որ Երեւանի այն բնակիչները եւ ընտրողները, որոնք վստահություն են հայտնել այս ավագանիներին, ինչը պիտի հերթական անգամ հիշեցնենք՝ Վարդան Ղուկասյանի միջոցով, հանկարծ ու հանկարծ հիասթափված չլինեն:

— Ինչպիսի՞ շրջադարձ կարելի է ակնկալել հունվարի 19-ին հրավիրված համագումարից, եւ ինչպիսի՞ն է Ձեր տեսակետը համագումարի վերաբերյալ:

— Ես` որպես գործընկեր, դաշնակցային կուսակցության ներկայացուցիչ եւ բարեկամ՝ իմ բոլոր հնարավորություններով աջակցելու եմ Վարդան Ղուկասյանին։ Թե ինչ կլինի սույն թվականի հունվարի 19-ին հրավիրված համագումարին եւ դրանից հետո, Դուք` որպես պատվարժան լրագրող, հրավիրվում եք այդ համագումարին՝ ներկա գտնվելու, լուսաբանելու եւ իրողությանն ականատես լինելու, ինչպես նաեւ հանրությանը ներկայացնելու՝ Ձեր մասնագիտության բերումով:

— Ի վերջո, որեւէ բացատրություն ունի՞, թե ինչու հիմա «Հանրային Ձայն»-ի ղեկավար կազմում առաջացան լրջագույն խնդիրներ: Այս ամենի հետեւում տեսնո՞ւմ եք իշխանության «ականջները», գուցե ճնշումնե՞ր կան Արտակ Գալստյանի նկատմամբ, դրա համար է նա հայտարարարություններ անում ընդդեմ Վարդան Ղուկասյանի, թե՞ սա, պարզապես, քաղաքական ուժի ինքնամաքրման ճանապարհ է:

— Ինչո՞ւ հիմա, այլ ոչ թե երբեւէ այլ ժամանակում, հարցը կարծում եմ՝ հռետորական  է։ Ամեն բան տեղի է ունենում ինչ-որ մի ժամանակահատվածում։ Ինչ վերաբերում է հարցի մնացած բովանդակությանը, առաջարկում եմ հետեւել Վարդան Ղուկասյանի եթերներին կամ առնվազն պաշտոնական հայտարարություններին եւ հիմք ընդունել այդ տեսակետները։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝