Հայ ազգի հանդեպ այս իշխանության ունեցած թույնի եւ մաղձի արտահայտությունն էլ կոչումների վերացումն է. Ներսիսյան

Ազգային ժողովն առաջին ընթերցմամբ՝ 64 կողմ, 31 դեմ ձայներով ընդունեց ՀՀ պետական պարգեւների եւ պատվավոր կոչումների մասին օրենքում եւ հարակից օրենքներում փոփոխությունների փաթեթը: Հիշեցնենք, որ նախագծով առաջարկվում է չեղարկել պատվավոր կոչումները` թողնելով միայն «վաստակավոր կոլեկտիվ» կոչումը, քանի որ ոչ թե անհատին, այլ կոլեկտիվին է տրվում: Իսկ նախկինում տրված կոչումները, այդուհանդերձ, շարունակելու են գործել: Անդրադառնալով վերոնշյալին` «Իրավունք TV»-ի տաղավարում զրուցել ենք ՀՀ վաստակավոր արտիստ, երգչուհի ԳԱՅԱՆԵ ՆԵՐՍԻՍՅԱՆԻ հետ:

— Այստեղ անգամ ասելու բան չկա` տհասություն տհասության հետեւից: Սրանց ընդունած բոլոր օրենքները եւ արարքները բացառիկ ազգադավ են: Իրենք թույնով են լցված հայ ժողովրդի նկատմամբ եւ ամեն ինչ անում են, որպեսզի ցավ պատճառեն, տհաճ իրավիճակ ստեղծեն: Ինձ այս ամենն առանձնապես չի զարմացնում, որովհետեւ հասկանալի է, որ սրանց հոգիները չար է եւ մաղձից բացի` հայ ժողովրդի հանդեպ նրանք որեւէ այլ զգացում չունեն: Այդ թույնի եւ մաղձի արտահայտությունն էլ նաեւ այն է, որ վերացնում են կոչումները: Չգիտեմ` ում են խանգարում կոչումները: Եթե կոչում ունեցող մարդիկ գումար ստանային դրա համար, կմտածեի, որ վերացնում են, որպեսզի գումարներ տնտեսեն կամ այդ գումարներն էլ ավելացնեն իրենց ֆանտաստիկ պարգեւավճարներին: Բայց այդ մարդիկ, որոնք կոչումներ ունեն, դա ընդամենն իրենց տարիների վաստակի գնահատականն է եւ գումար չեն ստանում դրա դիմաց: Ինչո՞վ է խանգարում իրենց: Մնում  է մտածել, որ ուղղակի այնքան չար են, որ չեն կարողանում հանգստանալ եւ անվերջանալի ավերածություն են անում բոլոր ոլորտներում:

— Օրենքի նախագծի հիմնավորման մեջ ասվում է, թե այդ կոչումները խաթարում են կադրային քաղաքականությունը, հանրային համերաշխությունը: Ինչո՞վ են վաստակավոր եւ ժողովրդական արտիստները խաթարել հանրային համերաշխությունը:

— Հանրային համերաշխությունը 2018 թվականին խաթարվեց հենց իրենց ձեռքով, երբ ազգը բաժանեցին սպիտակների եւ սեւերի: Սա ծիծաղելի է: Ուրիշ ինչ կարելի է սպասել մի իշխանությունից, որը կարողացավ հանձնել մեր հայրենիքի մի մասը եւ ամեն ինչ անում է, որպեսզի վերացնի Հայաստանը: Այս մահաբեր իշխանությունը կոնկրետ գնում է նրան, որ մի հայ թողնեն, այն էլ թանգարանում, ինչպես հարյուր տարի առաջ էին ասում:

ՀՐԱՆՏ ՍԱՐԱՖՅԱՆ

Հ.Գ.– Հարցազրույցն ամբողջությամբ դիտե՛ք տեսանյութում.

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝