Ալիևն ամբողջ Սյունիքն է ուզում, Հայաստանը պետք է կանխի այդ ցանկությունները. Քարտեզագիրը

Երբ Ալիևը հրաժարվում է հայտարարել, որ ճանաչում է Հայաստանի 29.800 քառակուսի կիլոմետր տարածքը, իսկ դրան հակառակ՝ Հայաստանի իշխանության ղեկավարը հայտարարում է Ադրբեջանի 86.600 քառակուսի կիլոմետր տարածքային ամբողջականությունը ճանաչելու մասին, նշանակում է՝ դրանով Ալիևի ձեռքը տալիս է խաղաթուղթ՝ Հայաստանից վերցված տարածքներն իրենը համարելու համար,-անդրադառնալով խաղաղության պայմանագրի հեռանկարներին, ասաց քարտեզագիր Ռուբեն Գալչյանը, ընդգծելով.

- Մինչդեռ Ալիևը չունի անգամ իրավունք ոչ դրա, ոչ էլ Հայաստանից պահանջելու այդ «անկլավներ» կոչվածները, քանի որ ներկայիս Ադրբեջանը Խորհրդային Միության իրավահաջորդը չէ, իսկ անկլավները Խորհրդային Միության օրոք են ձևավորվել։ Անկլավները տրվել են Ադրբեջանին 1936-1939 թվականներին. Խորհրդային Միությունը պարզապես գծել և տվել է։ Չկա արխիվային գեթ մեկ փաստաթուղթ, որն ապացուցի, որ Հայաստանը փաստաթղթով կողմ է եղել, որ այդ անկլավները տրվեն Ադրբեջանին:

Ինչ վերաբերում է Հայաստանի իշխանության ղեկավարի այն հայտարարությանը, որ պետք չէ Տիգրանաշենի կարևորությունն, քարտեզագիրը ընդգծում է.

-Եթե առանց նոր այլընտրանքային ճանապարհ կառուցելու՝ Տիգրանաշենը տան Ադրբեջանին, ապա Հայաստանի կապն իր հարավային սահմանի հետ կկտրվի։ Ադրբեջանը Տիգրանաշենով չի բավարարվելու։ Պետք է ոչինչ չտանք Ադրբեջանին, հակառակ դեպքում ամբողջ Սյունիքն է ուզելու։ Ի վերջո, պետք է մի կետում կանգնել Ադրբեջանի առջև։ Ինչ վերաբերում է նրան, որ Ադրբեջանի ուզածը չտանք, պատերազմ կլինի, ապա դա լինելու է՝ ուզեն թե չուզեն։ Ալիևն ամբողջ Սյունիքն է ուզում, և Հայաստանը պետք է կանխի այդ ցանկությունները՝ այսօրվանից հրաժարվելով զիջել:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝