Արցախի մշակութային ժառանգությունը` լուսանկարիչների աչքերով

Հայաստանի Հանրապետության Պատմության թանգարանում օրերս բացվեց «Արցախ. հավերժի վավերագրողները» խորագիրը կրող ժամանակավոր ցուցադրությունը։ Այստեղ հավաքված են նույնանուն մրցույթի մասնակիցների ուղարկված 50-ից ավել լուսանկարներ։ Լուսանկարներում Արցախի պատմամշակութային ժառանգության հուշակոթողներն են, որոնք ներկայումս վտանգի տակ են գտնվում։ Պատմության թանգարանի տնօրեն Դավիթ Պողոսյանը ցուցահանդեսի վերաբերյալ մանրամասնեց. «Այս ցուցահանդեսն ունի իր  մեջ արդիական մեսիջներ,  այն իր մեջ կրում է մեր ժառանգությունը ֆիքսելու, տեր կանգնելու գաղափարը,   եւ հույս ունենք, որ այս կոթողները, որոնք տեսնում եք լուսանկարներում, չեն արժանա այն նույն ճակատագրին, որոնք մեզ հասել  են Վրույրների լուսանկարներով»: Լուսանկարների մրցույթը հայտարարվել էր «Հավերժի վավերագրողները. Արամ, Արա, Արտաշես, Վրույրներ» ցուցադրության շրջանակներում։ Պատմության և Ե. Չարենցի անվան Գրականության և արվեստի թանգարանները, միասին համագործակցելով, հայտարարեցին նաև մրցույթի արդյունքները։

Հանձնաժողովի կողմից երեք անվանակարգով ընտրված լավագույն լուսանկարների հեղինակները՝  Ավետիս Ավետիսյան (Մատաղիսի Սբ. Եղիշա եկեղեցի), Լիլիան Գալստյան («Մենք ենք մեր սարերը» հուշարձան), Էլինա Աղաջանյան (Շուշի Սբ. Ղազանչեցոց եկեղեցի), Ներսես Մատինյան (Երից Մանկանց վանք), Զոհրաբ Ըռքոյան (Կամուրջ՝ Հակարիի արևելյան վտակ), Սարգիս Գասապեան (Երկրագիտական թանգարանի մուտքի դուռը, Ստեփանակերտ), Մարիա Մինասյան (Ստեփան Շահումյանի արձան), պարգևատրվեցին խորհրդանշական մրցանակներով։

Ցուցադրությանը ներկայացված էին գեղարվեստական և վավերագրական լուսանկարներ, որոնցից յուրաքանչյուրն առանձնահատուկ պատմություն ու գաղափար ուներ, իսկ այցելուները չմարվող հույս` Արցախ վերադառնալու։

Հեղինե Մխիթարյան, ՀՊՄՀ Լրագրության բաժին

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝