Մամուլից են տեղեկացել, որ իրենց հորը սպանած մարդասպանին, բանտիկը վրան դրած, հանձնել են Ադրբեջանին. Զոհրաբյան

«Անվտանգություն եւ ժողովրդավարություն» ՀԿ նախագահ ՆԱԻՐԱ ԶՈՀՐԱԲՅԱՆՆ անդրադառնալով 32 հայ գերիների վերադարձին` նշեց, որ շատ ուրախ է նրանց համար, սակայն տարօրինակ է համարում, որ գերիների փոխանակումը ներկայացվում է իբրեւ Ալիեւի կողմից բարի կամքի ակտ: Ըստ Ն. Զոհրաբյանի, Ալիեւը խախտել է նոյեմբերի 9-ի եռակողմ հայտարարության հիմնական դրույթներից մեկը` կրակի դադարեցումից հետո  անհապաղ բոլորը՝ բոլորի դիմաց պետք է տեղի ունենար գերիների, պահվող անձանց, դիակների փոխանակում:

— Ալիեւին ներկայացնել, որպես Ֆրիտյոֆ Նանսեն կամ Մահաթմա Գանդի, թե տեսեք` ինչ մարդասիրական ակտ է արել, անմեղսունակություն է: Իհարկե, հիմա Հայաստանն ուզում է ներկայացնել, որ այս մարդասիրական ժեստը արվել է ընդամենը նրա համար, որ Հայաստանը զիջել է ՄԱԿ-ի «Կլիմայի փոփոխության շուրջ» կոնֆերանսի անցկացումը Ադրբեջանին, ինչը քաղաքական կուտ է: Գերիները վերադարձվել են, սակայն նրանց դիմաց Հայաստանը վերադարձրել է երկու մարդասպան դիվերսանտի, որոնցից մեկը Զանգեզուրի պղնձամոլիբդենային կոմբինատի պահնորդական ծառայության աշխատակից Հայրապետ Մելիքսեթյանին սպանած մարդասպանն է: Ինձ հետ կապվեց Հայրապետ Մելիքսեթյանի աղջիկը` Անին: Նա անզորությունից լաց էր լինում: Ասում էր` գոնե մեկը իրենց տուն չի եկել: Մարդիկ մամուլից են տեղեկացել, որ իրենց հորը սպանած մարդասպանին, բանտիկը վրան դրած, հանձնել են Ադրբեջանին: Եվ արդեն ադրբեջանական տելեգրամ ալիքներում այդ ընտանիքը տեսնում է, թե ինչպես են իրենց հորը սպանած մարդասպանին Բաքվում դիմավորում` որպես հերոս, ինչպես Բուդապեշտից դիմավորեցին հայ սպային կացնահարած Ռամիլ Սաֆարովին:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝