ՀՀ-ում կան մեծ ու փոքր նարկոբարոններ, որոնց ենթակա փոքրիկ բարոնիկները վխտում են շրջաններում.Գագիկ Համբարձումյան

«Հայաստանում թմրանյութերի այս չափ մեծ իրացում չի եղել եւ ոչ մի ժամանակահատվածում, թմրանյութեր իրացնողները սոցցանցերում, իսկ սրանք արդյունաբերությանը, արտադրությանը զարկ են տալիս թմրամիջոցի հաշվին` արտադրական կանեփ օրինականացնելով, հետո մարմնավաճությանը զարկ կտան բյուջեն լցնելու համար։ Սա խայտառակություն է, երբ այսօր թմրամիջոցները խեղդում են, ոչինչ չի ձեռնարկվում, անգամ վիճակագրությամբ ներկայացվող թվերով որևէ թմրանյութ վաճառող չի բռնվում, բռնվում են, այսպես ասած, պահողները, օգտագործողները»,-անդրադառնալով ՀՀ-ում թմրանյութերի իրացման օր-օրի ահագնացող մտահոգություններին, ասաց  նախկին փոխոստիկանապետ, պահեստազորի սպա Գագիկ Համբարձումյանը, ընդգծելով.

-Դե, այսքանից հետո ի՞նչ ասեմ, զարկ են տալիս թմրամոլության զարգացմանը ու դրանով փող են գռփում։ Արտադրական կանեփը դրել են չգիտեմ ինչի անվան տակ, որ հետո դարձնեն թմրամիջոցի զարգացում, մեծ թվերով փողեր կգռփեն՝ թքած ունենալով, թե ժողովուրդը, հատկապես երիտասարդությունն ինչի կվերածվի։ Այս ամենը շատ ծիծաղելի կլիներ, եթե այդքան լացելու չլիներ։ Սա երկրի մասին մտածողի վարք չէ։ Ես միշտ ասել եմ, սրանց ամեն մի քայլ, գործողություն՝ կա՛մ բացահայտ, կա՛մ քողարկված, երկիրը տանում է կործանման:  Այսքանից հետո դեռ համարձակվում են ասել, թե պայքար են մղում թմրամոլության դեմ, մեկը չի հարցնում, ինչ եղավ 1 տոննա թմրանյութի գործը: Ոչ մի երկիր նման քանակի թմրանյութերի անգամ տարանցիկ անցկացում առանց տարանցիկ երկրների երաշխավորության չեն տեղափոխի: Իսկ, երաշխիք ո՞վ կարող է տալ, թող այս հարցի պատասխանը տա յուրաքանչյուր քաղաքացի:

-Պարոն Համբարձումյան, բայց նախկինում էլ պակաս մտահոգիչ թվեր չունեինք թմրանյութերի իրացման հետ կապված:

-Բայց նախկինում թմրանյութերի, առհասարակ թմրաբիզնեսի բացահայտումը ընկած է ոստիկանության թիվ մեկ պլանում: Այն ստորաբաժանումները, որոնք թերանում էին թմրանյութերի հայտնաբերման գործում` խիստ նկատողությունների էր արժանանում, դա պատասխանատու աշխատանքի չափանիշներից մեկն էր: Իսկ հիմա ո՞ւմ է դա հետաքրքրում, ոչ մեկի:  Ընդհակառակը, այսօրվա իրականությունը խոսում է այն մասին, որ ՀՀ-ում ամեն մի թաղամասում կան մեծ ու փոքր նարկոբարոններ, որոնց ենթակա փոքրիկ բարոնիկները վխտում են շրջաններում, թե չէ էս աստիճան խայտառակ պատկեր չէինք ուենա:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝